ಬೀಜಿಂಗ್‌ಗೆ 2008 ನೇ ಸಾಲಿನ ಒಲಂಪಿಕ್ಸ್‌ ಆತಿಥ್ಯ

ಮಾಸ್ಕೋ : ಚೀನಾದ ರಾಜಧಾನಿ ಬೀಜಿಂಗ್‌ನಲ್ಲಿ 2008 ನೇ ಸಾಲಿನ ಒಲಂಪಿಕ್ಸ್‌ ಕ್ರೀಡಾಕೂಟ ನಡೆಸಲು ಅಂತರರಾಷ್ಟ್ರೀಯ ಒಲಂಪಿಕ್‌ ಸಮಿತಿ ಒಪ್ಪಿಕೊಂಡಿದೆ.

ಮಾಸ್ಕೋದಲ್ಲಿ ಶುಕ್ರವಾರ ಸಭೆ ಸೇರಿದ ಅಂತರರಾಷ್ಟ್ರೀಯ ಒಲಂಪಿಕ್ಸ್‌ ಸಮಿತಿಯ ಸದಸ್ಯರು ಒಲಂಪಿಕ್ಸ್‌ ಕ್ರೀಡಾಕೂಟದ ಆತಿಥ್ಯವನ್ನು ಚೀನಾಕ್ಕೆ ವಹಿಸಿಕೊಡಲು ಒಪ್ಪಿಕೊಂಡರು. ಕ್ರೀಡಾಕೂಟದ ಆತಿಥ್ಯ ವಹಿಸಲು ಬೀಜಿಂಗ್‌ನೊಂದಿಗೆ ಪ್ಯಾರಿಸ್‌, ಟೊರಾಂಟೊ ಹಾಗೂ ಒಸಾಕ ತೀವ್ರ ಸ್ಪರ್ಧೆ ಒಡ್ಡಿದ್ದವು.

ಒಲಂಪಿಕ್ಸ್‌ ನಡೆಸುವ ಸ್ಥಳವನ್ನು ನಿರ್ಧರಿಸಲು ಅಂತರರಾಷ್ಟ್ರೀಯ ಒಲಂಪಿಕ್ಸ್‌ ಸಮಿತಿಯ 105 ಸದಸ್ಯರು ಮತ ಚಲಾಯಿಸಿದರು. ಮೊದಲ ಸುತ್ತಿನಲ್ಲಿ ಯಾವುದೇ ನಗರಕ್ಕೆ ಸ್ಪಷ್ಟ ಬಹುಮತ ಕಂಡು ಬರಲಿಲ್ಲವಾದ್ದರಿಂದ ಎರಡನೆ ಸುತ್ತಿನಲ್ಲಿ ಮತ ಚಲಾವಣೆ ಮಾಡಲಾಯಿತು. ಅಂತಿಮವಾಗಿ ಬೀಜಿಂಗ್‌ 56 ಮತಗಳನ್ನು ಪಡೆದರೆ, ಟೊರಾಂಟೊ 22 ಮತಗಳನ್ನು ಹಾಗೂ ಪ್ಯಾರಿಸ್‌ 18 ಮತಗಳನ್ನು ಪಡೆದವು. ಇಸ್ತಾನ್‌ಬುಲ್‌ಗೆ 9 ಮತಗಳು ದೊರೆತರೆ, ಜಪಾನಿನ ಒಸಾಕ ಮೊದಲ ಸುತ್ತಿನಲ್ಲಿಯೇ ಸ್ಪರ್ಧೆಯಿಂದ ನಿರ್ಗಮಿಸಿತು.

ಚೀನಾದಲ್ಲಿ ಸಂಭ್ರಮ : 2008 ನೇ ಸಾಲಿನ ಒಲಂಪಿಕ್ಸ್‌ ನಡೆಸುವ ಗೌರವ ಬೀಜಿಂಗ್‌ಗೆ ದೊರೆತ ಸುದ್ದಿ ಪ್ರಕಟವಾದ ಕೂಡಲೇ, ಚೀನಾದಲ್ಲಿ ಸಂಭ್ರಮ ಹುಚ್ಚು ಹೊಳೆಯಾಗಿದೆ. ವಿಶ್ವ ನಮ್ಮನ್ನು ಗುರ್ತಿಸಿದೆ, ನಾವು ಗೆದ್ದೆವು ಎಂದು ಘೋಷಣೆಗಳನ್ನು ಕೂಗಿದ ಚೀನೀಯರು, ಬೀದಿಗಳಲ್ಲಿ ಪಟಾಕಿ ಸಿಡಿಸಿ ಸಂಭ್ರಮಿಸಿದ ಸುದ್ದಿಗಳು ಬೀಜಿಂಗ್‌ನಿಂದ ವರದಿಯಾಗಿವೆ.

(ಇನ್ಫೋ ವಾರ್ತೆ)