ಬಿಳಿಯ ಷೆರ್ವಾನಿ ಧರಿಸಿದ್ದ ಮುಷರ್ರಫ್‌ಗೆ ಮಳೆಯ ಸ್ವಾಗತ

ನವದೆಹಲಿ : ಇಸ್ಲಮಾಬಾದ್‌ನಿಂದ ದೆಹಲಿಗೆ ಶನಿವಾರ ಬೆಳಗ್ಗೆ ಆಗಮಿಸಿದ ಪಾಕ್‌ ಅಧ್ಯಕ್ಷ ಮುಷರ್ರಫ್‌ ವಿಮಾನ ನಿಲ್ದಾಣದಿಂದ ರಾಷ್ಟ್ರಪತಿ ಭವನದ ಅಶೋಕ ಹಾಲ್‌ ಪ್ರವೇಶಿಸುವುದಕ್ಕೂ ಮಳೆ ಸುರಿಯುವುದಕ್ಕೂ ಸರಿಯಾಯಿತು. ತಕ್ಷಣವೇ ಸ್ವಾಗತದ ಎಲ್ಲ ವಿಧಿಗಳನ್ನೂ ಭವನದ ಒಳಭಾಗದಲ್ಲಿಯೇ ಪೂರೈಸಲು ಅಧಿಕಾರಿಗಳು ತೀರ್ಮಾನಿಸಿದರು.

ಮುಷರ್ರಫ್‌ ಆಗಮನದ ಬೆಳಗಿನ ಅಧ್ಯಾಯದ ಪ್ರಮುಖ ಪುಟಗಳು ಇಂತಿವೆ-

• ಮುಷರ್ರಫ್‌ ಅವರ ಗೌರವಾರ್ಥ ಗಾಳಿಯಲ್ಲಿ 21 ತೋಫುಗಳನ್ನು ಹಾರಿಸುವ (21- ಗನ್‌ ಸೆಲ್ಯೂಟ್‌) ಮೂಲಕ ಸ್ವಾಗತ ಕೋರಲಾಯಿತು.
• ಮಳೆಯ ಕಾರಣ ಮುಷರ್ರಫ್‌ ಅವರಿಗೆ ಸ್ವಾಗತ ಕೋರುವ ವಿಧಿಗಳು ರಾಷ್ಟ್ರಪತಿ ಭವನದಲ್ಲಿ ತುಸು ವಿಳಂಬವಾಗಿ ಆರಂಭ.

• ರಾಷ್ಟ್ರಪತಿ ಭವನದಲ್ಲಿ ಭಾರೀ ಪೊಲೀಸ್‌ ಬಂದೋಬಸ್ತ್‌ . ಎದ್ದು ಕಾಣುವಂತೆ ಪಾಕಿಸ್ತಾನ ಹಾಗೂ ಭಾರತ ಧ್ವಜಗಳ ಹಾರಾಟ.
• ಪಾಲಂ ವಿಮಾನ ನಿಲ್ದಾಣದಿಂದ ರಾಷ್ಟ್ರಪತಿ ಭವನದ ದಾರಿ ಮುಷರ್ರಫ್‌ ಆಗಮನಕ್ಕಾಗಿ ವಾಹನಗಳಿಂದ ಸಂಪೂರ್ಣ ತೆರವಾಗಿತ್ತು .
• ಬಿಳಿಯ ಷೆರ್ವಾನಿಯನ್ನು ಧರಿಸಿದ್ದ ಮುಷರ್ರಫ್‌, ಇಸ್ಲಾಮಾಬಾದಿನಲ್ಲಿ ದೆಹಲಿಗೆ ತೆರಳಲು ವಿಮಾನ ಹತ್ತುವ ಮುನ್ನ ತಮ್ಮ 81 ವರ್ಷದ ವೃದ್ಧೆ ತಾಯಿಗೆ ಅಕ್ಕರೆಯಿಂದ ಮುತ್ತಿಟ್ಟರು.

(ಇನ್ಫೋ ವಾರ್ತೆ)