ನಿರೀಕ್ಷಿಸಿ ! ಕರ್ನಾಟಕಕ್ಕೆ ಬರುತ್ತಿದೆ‘ಪ್ಯಾಲೇಸ್‌ ಆನ್‌ ವ್ಹೀಲ್ಸ್‌’

ಬೆಂಗಳೂರು : ರಾಜ್ಯ ಪ್ರವಾಸೋದ್ಯಮದ ಮೂಲಭೂತ ಸೌಕರ್ಯ ಅಭಿವೃದ್ಧಿಪಡಿಸಲು ಕರ್ನಾಟಕ ಪ್ರವಾಸೋದ್ಯಮ ಇಲಾಖೆ ಸದ್ಯದಲ್ಲೇ ವಸತಿ ಮತ್ತು ನಗರಾಭಿವೃದ್ಧಿ ನಿಗಮ (ಹುಡ್ಕೋ) ಕ್ಕೆ 100 ಕೋಟಿ ರುಪಾಯಿ ಸಾಲದ ಕೋರಿಕೆಯ ಪ್ರಸ್ತಾವನೆ ಸಲ್ಲಿಸಲಿದೆ.

ಭಾರೀ ಕೈಗಾರಿಕೆ ಸಚಿವ ಆರ್‌.ವಿ.ದೇಶಪಾಂಡೆ ‘ಎಕ್ಸ್‌ಪ್ಲೋಸಿಟಿ’ಗೆ ಶುಕ್ರವಾರ ಈ ವಿಷಯ ತಿಳಿಸಿದ್ದಾರೆ. ಪ್ರತಿ ಜಿಲ್ಲೆಯ ಮೂಲಭೂತ ಸೌಕರ್ಯದ ಸ್ವರೂಪ ಕುರಿತಂತೆ ವರದಿ ಸಲ್ಲಿಸುವಂತೆ ಜಿಲ್ಲಾಧಿಕಾರಿಗಳನ್ನು ಕೋರಲಾಗಿದೆ. ಅವುಗಳ ಅಗತ್ಯದ ಆಧಾರದ ಮೇಲೆ ಸಾಲ ಯಾಚಿಸಲಾಗುವುದು. ಮೊದಲು ಮೂಲಭೂತ ಸೌಕರ್ಯಕ್ಕೇ ನಮ್ಮ ಒತ್ತು. ನಂತರ ಪ್ರಾಚೀನ ಶಿಲ್ಪ ಕಲೆ ಮೊದಲಾದ ಸಂಪತ್ತನ್ನು ರಕ್ಷಿಸುವುದಕ್ಕೆ ಆದ್ಯತೆ ಎಂದರು.

ಪ್ಯಾಲೇಸ್‌ ಆನ್‌ ವ್ಹೀಲ್ಸ್‌ ಎಂಬ ಹಳೆಯ ರಾಜ ಮಹಾರಾಜರ ವೈಭವ ಬಿಂಬಿಸುವ ರೈಲು ಗಾಡಿಯಾಂದನ್ನು ಪ್ರವಾಸೋದ್ಯಮ ಇಲಾಖೆ ಸದ್ಯದಲ್ಲೇ ಪ್ರದರ್ಶನಕ್ಕೆ ತರಲಿದೆ. ಮೈಸೂರು, ಹಂಪಿ, ಬೇಲೂರು ಹಾಗೂ ಹಳೇಬೀಡು ಮಾರ್ಗದಲ್ಲಿ ಈ ರೈಲು ಸಂಚರಿಸಲಿದೆ ಎಂದು ಪ್ರವಾಸೋದ್ಯಮ ಸಚಿವ ರೋಷನ್‌ ಬೇಗ್‌ ತಿಳಿಸಿದರು.

ಪ್ರವಾಸೋದ್ಯಮ ಅವಕಾಶಗಳನ್ನು ಕ್ರೋಢೀಕರಿಸುವ ಹಾದಿಯಲ್ಲಿ ರಾಜ್ಯ ಪ್ರವಾಸೋದ್ಯಮ ಮತ್ತು ಅಭಿವೃದ್ಧಿ ನಿಗಮ, ರಾಜ್ಯದ ಸಂಪತ್ತಿನ ಖಾಸಗೀಕರಣದ ಸಾಧ್ಯತೆ ಕುರಿತು ಅಧ್ಯಯನ ಕೂಡ ನಡೆಸಿದೆ.

(ಇನ್ಫೋ ವಾರ್ತೆ)