ಕೆ.ವಿ. ಶಂಕರಗೌಡ ಪ್ರಶಸ್ತಿಗೆ ಕಾರಂತ,ದೇಜಗೌ, ನಂದೀಶ್‌ ಆಯ್ಕೆ

ಮಂಡ್ಯ : ಇಲ್ಲಿನ ಕೆ. ವಿ. ಶಂಕರ ಗೌಡ ಸಾಂಸ್ಕೃತಿಕ ಪ್ರತಿಷ್ಠಾನ ಈ ಬಾರಿಯ ಕೆ.ವಿ. ಶಂಕರಗೌಡ ಪ್ರಶಸ್ತಿಗಳನ್ನು ರಂಗಕರ್ಮಿ ಡಾ. ಬಿ.ವಿ. ಕಾರಂತ್‌, ಡಾ. ದೇ. ಜವರೇಗೌಡ ಹಾಗೂ, ಮಂಡ್ಯದ ಹೆಸರಾಂತ ಶಸ್ತ್ರ ಚಿಕಿತ್ಸಕ ಡಾ. ನಂದೀಶ್‌ ಅವರಿಗೆ ನೀಡಲು ನಿರ್ಧರಿಸಿದೆ.

ಪ್ರತಿಷ್ಠಾನದ ಅಧ್ಯಕ್ಷ, ವಿಧಾನ ಪರಿಷತ್‌ ಸದಸ್ಯ ಎಚ್‌. ಹೊನ್ನಪ್ಪ ಗುರುವಾರದ ಸುದ್ದಿ ಗೋಷ್ಠಿಯಲ್ಲಿ ಪ್ರಶಸ್ತಿಗಳನ್ನು ಪ್ರಕಟಿಸಿದರು. ಪ್ರತಿಷ್ಠಾನವು ಪ್ರತಿವರ್ಷ ರಂಗಭೂಮಿ, ಸಮಾಜ ಸೇವೆ ಮತ್ತು ಜಿಲ್ಲಾ ಮಟ್ಟದಲ್ಲಿ ವಿಶಿಷ್ಟ ಸೇವೆ ಸಲ್ಲಿಸಿದವರಿಗೆ ಈ ಪ್ರಶಸ್ತಿಯನ್ನು ನೀಡುತ್ತಾ ಬಂದಿದೆ. ಸಮಾಜ ಸೇವೆಗಾಗಿ ಈ ಬಾರಿ ಪದ್ಮಶ್ರೀ ಡಾ. ದೇ. ಜವರೇ ಗೌಡರು ಆಯ್ಕೆಯಾಗಿದ್ದರೆ, ರಂಗಭೂಮಿಗೆ ಬಿ.ವಿ. ಕಾರಂತರನ್ನು ಆಯ್ಕೆ ಮಾಡಲಾಗಿದೆ. ಜಿಲ್ಲೆಯಲ್ಲಿ ವಿಶೇಷ ಸೇವೆ ಸಲ್ಲಿಸಿದವರಿಗೆ ನೀಡುವ ಪ್ರಶಸ್ತಿಯನ್ನು ಡಾ. ನಂದೀಶ್‌ ಪಡೆಯಲಿದ್ದಾರೆ.

ಪ್ರಶಸ್ತಿಯು 15 ಸಾವಿರ ರೂಪಾಯಿ ನಗದು ಮತ್ತು ಪ್ರಶಸ್ತಿ ಫಲಕವನ್ನೊಳಗೊಂಡಿರುತ್ತದೆ. ಕೆ. ವಿ. ಶಂಕರ ಗೌಡರ ಜನ್ಮ ದಿನವಾದ ಜುಲೈ 15ರಂದು ನಗರದ ರೈತ ಸಭಾಂಗಣದಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ.

(ಇನ್ಫೋ ವಾರ್ತೆ)