‘ಹಾಹಾಕಾರ ಎದ್ದಿರುವಾಗ ಸರ್ಕಾರಕ್ಕೆ ಸರ್ಟಿಫಿಕೇಟ್‌’-ಹೆಗಡೆ ಲೇವಡಿ

ಗುಲ್ಬರ್ಗಾ : ಬರದಿಂದ ರಾಜ್ಯ ತತ್ತರಿಸುತ್ತಿದ್ದು , ಎಲ್ಲೆಡೆ ಹಾಹಾಕಾರ ಎದ್ದಿರುವ ಸಂದರ್ಭದಲ್ಲಿ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಸರ್ಕಾರ ಉತ್ತಮ ಸಾಧನೆ ಮಾಡಿದೆ ಎಂದು ಕಾಂಗೈ ಹೈಕಮಾಂಡ್‌ನ ಪರಾಮರ್ಶನ ಸಮಿತಿ ನೀಡಿರುವ ಸರ್ಟಿಫಿಕೇಟನ್ನು ಮಾಜಿ ಮುಖ್ಯಮಂತ್ರಿ ಹಾಗೂ ಸಂಯುಕ್ತ ಜನತಾದಳದ ಮುಖಂಡ ರಾಮಕೃಷ್ಣ ಹೆಗಡೆ ಟೀಕಿಸಿದ್ದಾರೆ.

ನಾಲ್ಕೈದು ಜಿಲ್ಲೆಗಳನ್ನು ಹೊರತುಪಡಿಸಿ, ರಾಜ್ಯದ ಇತರ ಜಿಲ್ಲೆಗಳಲ್ಲಿ ಮಳೆ ಬೀಳದೆ ಜನತೆ ಕಂಗಾಲಿಗೆ ಬಿದ್ದಿದ್ದಾರೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಹೆಗಡೆ ಹೇಳಿದರು. ರೈತ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾನೆ. ಬಿತ್ತಿದ ಬೀಜ ಸುಟ್ಟು ಹೋಗುತ್ತಿದೆ. ಅನೇಕ ಕಡೆಗಳಲ್ಲಿ ಬಿತ್ತನೆಯೇ ಆಗಿಲ್ಲ . ಇಂತಹ ಸಂದರ್ಭದಲ್ಲಿ ಪರಾಮರ್ಶನ ಸಮಿತಿ ಸರ್ಕಾರಕ್ಕೆ ‘ಸರ್ಟಿಫಿಕೇಟ್‌’ ನೀಡುತ್ತದೆ ಎಂದು ಅವರು ವ್ಯಂಗ್ಯವಾಡಿದರು.

ಪರಾಮರ್ಶನ ಸಮಿತಿಯ ಔಚಿತ್ಯದ ಕುರಿತು ಕಟುವಾಗಿ ಮಾತನಾಡಿದ ಹೆಗಡೆ, ರಾಜ್ಯದಲ್ಲಿ ಬರದ ಪರಿಸ್ಥಿತಿ ಮೂಡಿರುವಾಗ ಪರಾಮರ್ಶನ ಸಮಿತಿ ಸರ್ಟಿಫಿಕೇಟ್‌ ನೀಡಲಿಕ್ಕೆ ಕೃಷ್ಣ ಅವರು ಮಾಡಿರುವುದಾದರೂ ಏನು ? ಅವರು ಏನೇನು ಪರಿಹಾರ ಕಾರ್ಯಗಳನ್ನು ಹಮ್ಮಿಕೊಂಡಿದ್ದಾರೆ ಎಂದು ಪ್ರಶ್ನಿಸಿದರು.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಕೃಷ್ಣ ಗಾರುಡಿ