ಪಿಟಿವಿಯಲ್ಲಿ ಮುಷರ್ರಫ್‌ ಭಾರತ ಭೇಟಿಯ ನೇರ ಪ್ರಸಾರ

ಇಸ್ಲಮಾಬಾದ್‌ : ಜುಲೈ 14 ರಿಂದ ಪ್ರಾರಂಭವಾಗುವ ಪಾಕಿಸ್ತಾನ ಅಧ್ಯಕ್ಷ ಪರ್ವೇಜ್‌ ಮುಷರ್ರಫ್‌ ಅವರ ಮೂರು ದಿನಗಳ ಭಾರತ ಭೇಟಿಯ ಮುಖ್ಯಾಂಶಗಳನ್ನು ಪಾಕ್‌ ಟೆಲಿವಿಷನ್‌ (ಪಿಟಿವಿ) ನೇರ ಪ್ರಸಾರ ಮಾಡಲಿದೆ.

ಜುಲೈ 14 ರಿಂದ 16 ರವರೆಗಿನ ನವದೆಹಲಿ, ಆಗ್ರಾ, ಜೈಪುರ ಹಾಗೂ ಅಜ್ಮೀರ್‌ಗಳಲ್ಲಿನ ಮುಷರ್ರಫ್‌ ಅವರ ಕಾರ್ಯಕ್ರಮಗಳ ಮುಖ್ಯ ಭಾಗಗಳನ್ನು ನೇರ ಪ್ರಸಾರ ಮಾಡುವುದಕ್ಕಾಗಿ ಪಿಟಿವಿ ಎರಡು ವಿಶೇಷ ತಂಡಗಳನ್ನು ರಚಿಸಿದೆ. ಆನ್‌ಲೈನ್‌ ಸುದ್ದಿ ಸಂಸ್ಥೆ ಈ ವಿಷಯವನ್ನು ವರದಿ ಮಾಡಿದೆ.

ಭಾರತ ಸರ್ಕಾರಿ ಸ್ವಾಮ್ಯದ ದೂರದರ್ಶನದೊಂದಿಗೆ ಒಪ್ಪಂದವನ್ನು ಮಾಡಿಕೊಂಡಿರುವ ಪಿಟಿವಿ, ಸ್ಟಾರ್‌ ಟಿವಿಯಾಂದಿಗೂ ಮುಷರ್ರಫ್‌ ಅವರ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುವ ಉದ್ದೇಶದಿಂದ ಸಂಪರ್ಕ ಸಾಧಿಸಿದೆ. ಪಿಟಿವಿ ರೂಪಿಸಿರುವ ತಂಡಗಳಲ್ಲಿ ಮೊದಲನೆ ತಂಡ ಜುಲೈ 11 ರಂದೇ ದೆಹಲಿಗೆ ಬಂದು ಮೂಲಭೂತ ಸೌಲಭ್ಯಗಳನ್ನು ಕಲ್ಪಿಸಿಕೊಳ್ಳಲಿದೆ. ಮುಷರ್ರಫ್‌ ಅವರ ಸುದ್ದಿಗೋಷ್ಠಿಗಳು, ಸಭೆಗಳು, ಭಾರತದ ಅಧಿಕಾರಿಗಳೊಂದಿಗೆ ಮಾತುಕತೆ ಮುಂತಾದ ಕಾರ್ಯಕ್ರಮಗಳನ್ನು ಪಿಟಿವಿ ಬಿತ್ತರಿಸಲಿದೆ ಎಂದು ಹಿರಿಯ ಅಧಿಕಾರಿಯಾಬ್ಬರು ಹೇಳಿದ್ದಾರೆ.

ಭಾರತದ ವಿದೇಶಾಂಗ ಸಚಿವ ಜಸ್ವಂತ್‌ ಸಿಂಗ್‌ ಹಾಗೂ ಗೃಹ ಸಚಿವ ಎಲ್‌.ಕೆ. ಅಡ್ವಾಣಿ ಅವರ ಸಂದರ್ಶನ ನಡೆಸಲಿರುವ ಪಿಟಿವಿ, ಸಮಿತ್‌ ಸದಸ್ಯರೊಂದಿಗೆ ಸರಣಿ ಟಾಕ್‌ ಷೋಗಳನ್ನು ನಡೆಸಲಿದೆ.

(ಐಎಎನ್‌ಎಸ್‌)