ಮುಂಗಾರು ವೈಫಲ್ಯದ ಪರಿಣಾಮ, ರಾಜ್ಯದಲ್ಲಿ ವಿದ್ಯುತ್‌ ಕ್ಷಾಮ

ಬೆಂಗಳೂರು : ರಾಜ್ಯದ ಜಲ ವಿದ್ಯುತ್‌ ಯೋಜನೆಗಳ ಪ್ರಮುಖ ಮೂಲಗಳಾದ ಲಿಂಗನಮಕ್ಕಿ ಹಾಗೂ ಸೂಪಾ ಜಲಾಶಯಗಳಲ್ಲಿ ದಿನದಿಂದ ದಿನಕ್ಕೆ ನೀರಿನ ಒಳಹರಿವು ಕಡಿಮೆಯಾಗುತ್ತಿದ್ದು , ರಾಜ್ಯ ಭೀಕರ ವಿದ್ಯುತ್‌ ಕ್ಷಾಮದ ದವಡೆಯಲ್ಲಿದೆ.

ಪ್ರಸ್ತುತ 9 ದಶಲಕ್ಷ ಯೂನಿಟ್‌ ವಿದ್ಯುತ್‌ ಕೊರತೆಯನ್ನು ರಾಜ್ಯ ಎದುರಿಸುತ್ತಿದ್ದು , ಮಳೆ ಬರದಿದ್ದಲ್ಲಿ ಮುಂದಿನ ದಿನಗಳಲ್ಲಿ ವಿದ್ಯುತ್‌ ಕೊರತೆ ಮತ್ತಷ್ಟು ಹೆಚ್ಚಾಗುವ ಇಂಗಿತವನ್ನು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಇಂಧನ ಖಾತೆ ಸಚಿವ ವೀರಕುಮಾರ್‌ ವ್ಯಕ್ತ ಪಡಿಸಿದರು.

ಪ್ರತಿದಿನ ರಾಜ್ಯದಲ್ಲಿ 50 ಸಾವಿರದ 883 ದಶಲಕ್ಷ ಯೂನಿಟ್‌ ವಿದ್ಯುತ್‌ ಉತ್ಪಾದಿಸಲಾಗುತ್ತಿದೆ ಹಾಗೂ 22 ಲಕ್ಷ ದ 537 ಯೂನಿಟ್‌ ವಿದ್ಯುತ್ತನ್ನು ನೆರೆ ರಾಜ್ಯಗಳಿಂದ ಪಡೆಯಲಾಗುತ್ತಿದೆ. ಆದರೂ ರಾಜ್ಯದಲ್ಲಿ 9 ದಶಲಕ್ಷ ಯೂನಿಟ್‌ ವಿದ್ಯುತ್‌ ಕೊರತೆಯಿದೆ. ಜಲಾಶಯಗಳಲ್ಲಿ ನೀರಿನ ಮಟ್ಟ ಕಡಿಮೆಯಿರುವುದೇ ಇದಕ್ಕೆ ಕಾರಣ ಎಂದು ವೀರಕುಮಾರ್‌ ಹೇಳಿದರು.

1819 ಅಡಿ ಗರಿಷ್ಠ ಮಟ್ಟವನ್ನು ಹೊಂದಿರುವ ಲಿಂಗನಮಕ್ಕಿ ಜಲಾಶಯದಲ್ಲಿ ಪ್ರಸ್ತುತ 1715 ಅಡಿ ಮಾತ್ರ ನೀರಿದೆ. ಅದೇ ರೀತಿ 564 ಮೀಟರ್‌ ಗರಿಷ್ಠ ಮಿತಿಯ ಸೂಪಾ ಅಣೆಕಟ್ಟೆಯಲ್ಲಿ 494 ಅಡಿ ನೀರಿದೆ. ಮಳೆಗಾಲದ ಬಿರುಸಿನ ಈ ದಿನಗಳಲ್ಲಿ ಜಲಾಶಯ ಸಾಮಾನ್ಯವಾಗಿ ತುಂಬಿರುತ್ತಿದ್ದುದು ವಾಡಿಕೆ.

(ಇನ್ಫೋ ವಾರ್ತೆ)