ಎಚ್ಚರ!ಬೆಂಗಳೂರಿನ ಪಂಚತಾರಾ ಹೊಟೇಲುಗಳಲ್ಲಿ ಠಕ್ಕರಿದ್ದಾರೆ

ಬೆಂಗಳೂರು : ಅಶೋಕ, ಗೇಟ್‌ ವೇ, ಲೀ ಮೆರಿಡಿಯನ್‌, ಏಟ್ರಿಯಾ... ನಗರದ ಈ ಪಂಚತಾರಾ ಹೊಟೇಲ್‌ಗಳಲ್ಲಿ ಕಳ್ಳತನ ವ್ಯಾಪಕವಾಗುತ್ತಿದೆ.

ಗುರುವಾರ ಲೀ ಮೆರಿಡಿಯನ್‌ನಲ್ಲಿ 3 ಲಕ್ಷ ರುಪಾಯಿ ನಗದು ಕಳುವಾಗಿದ್ದರೆ, ಶನಿವಾರ ಏಟ್ರಿಯಾದಲ್ಲಿ ಸಾಫ್ಟ್‌ವೇರ್‌ ಎಂಜಿನಿಯರ್‌ ಒಬ್ಬರ ಕೆಮೆರಾ ಮೊದಲಾದ 45 ಸಾವಿರ ರುಪಾಯಿ ಬೆಲೆಯ ವಸ್ತುಗಳು ಕಳುವಾಗಿವೆ. ಇತ್ತೀಚೆಗೆ ಸಾಕಷ್ಟು ಚುರುಕಾಗಿರುವ ನಗರದ ಪೊಲೀಸರಿಗೆ ಇದೊಂದು ಸವಾಲಾಗಿದೆ.

ನಗರದ ಬಿಎಂಟಿಸಿ ಬಸ್ಸುಗಳಿಗೆ ಇದ್ದಕ್ಕಿದ್ದಂತೆ ಪೊಲೀಸರು ನುಗ್ಗುತ್ತಾರೆ. ಹೆಂಗಸರಿಗಾಗಿ ಮೀಸಲಿರುವ ಸೀಟಲ್ಲಿ ಕುಳಿತಿದ್ದಿರೋ ಕೆಟ್ಟಿರಿ. ಜುಲ್ಮಾನೆ ಕಟ್ಟಬೇಕು. ಹಣ ಇಲ್ಲದಿದ್ದರೆ, ಪೊಲೀಸರ ಅತಿಥಿಯಾಗಬೇಕು. ಕಳೆದೊಂದು ವಾರದಲ್ಲಿ ಇಂಥಾ 440 ಗಂಡಸರನ್ನು ಪೊಲೀಸರು ಪತ್ತೆ ಮಾಡಿ, ದೂರು ದಾಖಲಿಸಿಕೊಂಡಿದ್ದಾರೆ.

ಬಸ್ಸುಗಳಲ್ಲಿ ಹೆಂಗಸರ್ಯಾರೂ ಇಲ್ಲದಿರುವಾಗ ಅವರಿಗೆ ಮೀಸಲಿರುವ ಸೀಟುಗಳಲ್ಲಿ ಕುಳಿತುಕೊಳ್ಳಬಹುದೆ ? ಕೆಲವು ಪೊಲೀಸರು ಇದಕ್ಕೂ ಅವಕಾಶ ಕೊಡುತ್ತಿಲ್ಲ. ಪ್ರಕರಣ ದಾಖಲು ಮಾಡಿಕೊಳ್ಳುವುದು ಅವರ ಉದ್ದಿಶ್ಯ ಅಲ್ಲ, ಕಾಸು ಮಾಡಿಕೊಳ್ಳುವುದೇ ಇದರ ಹಿಂದಿನ ಉದ್ದೇಶ ಎಂಬುದು ನಾಗರಿಕರ ದೂರು.

ಕಳೆದೊಂದು ವಾರದಲ್ಲಿ ಕ್ರೆೃಂ ಸಿಟಿಯಲ್ಲಿ ಪೊಲೀಸರು ಬಯಲು ಮಾಡಿರುವ ಪ್ರಕರಣಗಳ ಪಟ್ಟಿ ಇಂತಿದೆ...

• ಬೀದಿ ಕಾಮಣ್ಣರು- 206
• ಪರವಾನಿಗೆ ಉಲ್ಲಂಘಿಸಿ ಮದ್ಯ ಮಾರಾಟ ಮಾಡಿರುವ ಅಂಗಡಿಗಳು- 19
• ಭದ್ರತಾ ಪ್ರಕರಣಗಳು- 149
• ಈ ಹಿಂದೆ ಸಜೆಗೆ ಗುರಿಯಾಗಿ, ಜೈಲಿನಿಂದ ತಪ್ಪಿಸಿಕೊಂಡಿದ್ದ 49 ಆರೋಪಿಗಳ ಪತ್ತೆ
• ಜೂಜಾಟ ಪ್ರಕರಣಗಳು- 391
• ವೇಶ್ಯಾವಾಟಿಕೆ - 6
• ಕಲಬೆರಕೆ ವಗೈರೆ- 8

(ಇನ್ಫೋ ವಾರ್ತೆ)