ಶಿಕ್ಷೆಯಾಗಿದೆ ಭಾರೀ ಹೆಚ್ಚು ! ವಿದ್ಯುತ್‌ ಕದ್ದೀರಿ ಜೋಕೆ ಜೋಕೆ!

ಬೆಂಗಳೂರು : ಕರ್ನಾಟಕ ವಿದ್ಯುತ್‌ ಕಾಯ್ದೆ (1910) ಗೆ ಬರುವ ವಿಧಾನಮಂಡಲ ಅಧಿವೇಶನದಲ್ಲಿ ತಿದ್ದುಪಡಿ ತರಲು ನಿರ್ಧರಿಸಿರುವ ರಾಜ್ಯ ಸರ್ಕಾರ, ವಿದ್ಯುತ್‌ ಕಳ್ಳರಿಗೆ ಗರಿಷ್ಠ 5 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಲು ತೀರ್ಮಾನಿಸಿದೆ.

ತಿದ್ದುಪಡಿ ಪ್ರಕಾರ ವಿದ್ಯುತ್‌ ಕಳ್ಳರಿಗೆ ಶಿಕ್ಷೆ ಮತ್ತು ದಂಡದ ಪ್ರಮಾಣಗಳನ್ನು ಗಮನಾರ್ಹವಾಗಿ ಹೆಚ್ಚಿಸಲು ಗುರುವಾರ ನಡೆದ ಸಚಿವ ಸಂಪುಟ ಸಭೆ ನಿರ್ಧರಿಸಿದೆ. ಕಾಯ್ದೆಯ 39 ನೇ ಕಲಮನ್ನು ಕೈ ಬಿಟ್ಟು , 49 ನೇ ಕಲಮಿಗೆ ಉಪ ಕಲಮುಗಳನ್ನು ಸೇರಿಸಿ ಕರ್ನಾಟಕ ವಿದ್ಯುತ್‌ ತಿದ್ದುಪಡಿ ಕಾಯ್ದೆಯನ್ನು ಅಧಿವೇಶನದಲ್ಲಿ ಮಂಡಿಸಲಾಗುವುದು ಎಂದು ವಾರ್ತಾ ಸಚಿವ ಬಿ.ಕೆ. ಚಂದ್ರಶೇಖರ್‌ ಸಂಪುಟ ಸಭೆಯ ನಂತರ ಸುದ್ದಿಗಾರರಿಗೆ ತಿಳಿಸಿದರು.

ಪ್ರಸ್ತುತ ವಿದ್ಯುತ್‌ ಕಾಯ್ದೆಯಲ್ಲಿ ವಿದ್ಯುತ್‌ ಕಳ್ಳರಿಗೆ ಶಿಕ್ಷೆ ಅಥವಾ ದಂಡ ಎರಡರಲ್ಲಿ ಒಂದನ್ನಷ್ಟೇ ವಿಧಿಸಲು ಸಾಧ್ಯವಿದೆ. ಪ್ರಸ್ತುತ ಆರೋಪಿಗೆ 3 ತಿಂಗಳು ಮಾತ್ರ ಜೈಲು ಶಿಕ್ಷೆ ಅಥವಾ 1000 ರುಪಾಯಿ ದಂಡ ವಿಧಿಸಬಹುದಾಗಿದೆ. ಹೊಸ ತಿದ್ದುಪಡಿಯ ಪ್ರಕಾರ ಜೈಲು ಶಿಕ್ಷೆ 3 ರಿಂದ 5 ವರ್ಷಗಳವರೆಗೆ ಹಾಗೂ ದಂಡ 5 ರಿಂದ 50 ಸಾವಿರ ರುಪಾಯಿವರೆಗೆ ಹೆಚ್ಚಾಗಲಿದೆ.

(ಇನ್ಫೋ ವಾರ್ತೆ)