ಮಾಲೂರು : ಸಾಲ ತೀರಿಸಲಾರದ ರೈತ ಕುಟುಂಬ ಸರ್ವನಾಶ

ಮಾಲೂರು : ಬೆಳೆಗೆ ತಕ್ಕ ಬೆಲೆ ದಕ್ಕದೆ, ಸಾಲದಿಂದ ಬೆಂದ ರೈತನೊಬ್ಬ ಪತ್ನಿ ಹಾಗೂ 6 ತಿಂಗಳ ಹಸುಳೆ ಸೇರಿದಂತೆ ಮೂವರು ಮಕ್ಕಳನ್ನು ಕೊಂದು, ತಾನೂ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ತಾಲ್ಲೂಕಿನ ದೊಡ್ಡಶಿವಾರದ ಕೃಷ್ಣಾರೆಡ್ಡಿ (45) ಆಲೂಗಡ್ಡೆ ಬೆಳೆದಿದ್ದ. ಕೈಸಾಲ, ಗ್ರಾಮೀಣ ಬ್ಯಾಂಕಿನ ಸಾಲ, ಅವುಗಳಿಗೆ ಬಡ್ಡಿ ಸೇರಿದಂತೆ ಸುಮಾರು 2.5 ಲಕ್ಷ ರುಪಾಯಿ ತೀರಿಸಬೇಕಿತ್ತು. ಕಳೆದ ಎರಡು ವರ್ಷಗಳಿಂದ ಆಲೂಗಡ್ಡೆಗೆ ಬೆಂಬಲ ಬೆಲೆ ದೊರೆಯದ ಕಾರಣ ಸಾಲ ತೀರಿಸಲಾಗಲಿಲ್ಲ. ಬುಧವಾರ ಮುಂಜಾನೆ ಪತ್ನಿ ರಾಮಕ್ಕ (30), ಮಕ್ಕಳಾದ ಅಂಬಿಕಾ (8), ಶುಭಾ (6) ಹಾಗೂ 6 ತಿಂಗಳ ಮಗು ಶ್ರೀನಾಥ್‌ನನ್ನು ತನ್ನ ಚಿಕ್ಕಪ್ಪನ ಜಮೀನಿಗೆ ಕರೆದೊಯ್ದು, ಮಾವಿನ ಮರವೊಂದರ ಕೆಳಗೆ ಅವರೆಲ್ಲರ ಕೊರಳಿಗೆ ಹಗ್ಗ ಬಿಗಿದು ಕೊಂದಿದ್ದಾನೆ.

ನಂತರ ತಾನೂ ಮರಕ್ಕೆ ಹಗ್ಗ ಬಿಗಿದು, ನೇಣು ಹಾಕಿಕೊಂಡಿದ್ದಾನೆ. ಕೊಂಚ ಹೊತ್ತು ಉಸಿರುಗಟ್ಟಿದ ನಂತರ ಹಗ್ಗ ತುಂಡಾಗಿ, ಕೃಷ್ಣಾರೆಡ್ಡಿ ಕೆಳಗೆ ಬಿದ್ದು, ಒದ್ದಾಡಿದ್ದನ್ನು ಗ್ರಾಮದ ಬಾಬು ಎಂಬುವರು ನೋಡಿದ್ದಾರೆ. ಆ ಜಾಗೆಗೆ ಗ್ರಾಮಸ್ಥರನ್ನು ಕರೆ ತರುವ ಹೊತ್ತಿಗೆ ಕೃಷ್ಣಾರೆಡ್ಡಿ ಕೂಡ ಮೃತಪಟ್ಟಿದ್ದ.

ಮೊದಲನೇ ಹೆಂಡತಿ ಮೃತಪಟ್ಟ ನಂತರ ಕೃಷ್ಣಾರೆಡ್ಡಿ ರಾಮಕ್ಕಳನ್ನು ಮದುವೆಯಾಗಿದ್ದ. ಕೃಷ್ಣಾರೆಡ್ಡಿ ಕೊಂದ ಅಂಬಿಕಾ ಹಾಗೂ ಶುಭಾ ಮೊದಲ ಹೆಂಡತಿಯ ಮಕ್ಕಳು. ಯಾರ್ಯಾರಿಗೆ ಎಷ್ಟೆಷ್ಟು ಹಣ ಕೊಡಬೇಕು ಎಂಬುದನ್ನು ಕೃಷ್ಣಾರೆಡ್ಡಿ ಚೀಟಿಯಾಂದರಲ್ಲಿ ಬರೆದಿದ್ದು, ಕುಟುಂಬದ ಶವಗಳು ಪತ್ತೆಯಾದ ಜಾಗದಲ್ಲಿ ಚೀಟಿಯೂ ಸಿಕ್ಕಿದೆ.

ಜಿಲ್ಲಾ ಉಸ್ತುವಾರಿ ಸಚಿವ ವಿ.ಮುನಿಯಪ್ಪ, ಲೋಕಸಭಾ ಸದಸ್ಯ ಕೆ.ಎಚ್‌.ಮುನಿಯಪ್ಪ, ಪೊಲೀಸ್‌ ಅದಿಕಾರಿಗಳು ಹಾಗೂ ಇತರೆ ಸ್ಥಳೀಯ ಮುಖಂಡರು ಸ್ಥಳಕ್ಕೆ ಭೇಟಿ ನೀಡಿದ್ದರು.

(ಇನ್ಫೋ ವಾರ್ತೆ)