ಜೀವಮಾನದಲ್ಲೇ ಇಂಥಾ ಯಾತನೆ ಅನುಭವಿಸಿರಲಿಲ್ಲ- ಕರುಣಾನಿಧಿ

ಚೆನ್ನೈ : ಪೊಲೀಸರು ನನ್ನನ್ನು ಈ ಹಿಂದೆ ಹಲವಾರು ಬಾರಿ ಬಂಧಿಸಿದ್ದಾರೆ. ಆದರೆ ಜೂನ್‌ 30ರ ಶನಿವಾರ ಅನುಭವಿಸಿದ ನರಕ ಯಾತನೆ ಜೀವಮಾನದಲ್ಲೇ ಆಗಿರಲಿಲ್ಲ. ಐದು ದಿನಗಳ ಸೆರೆವಾಸದಿಂದ ಬುಧವಾರ ಬಿಡುಗಡೆಯಾದ 78ರ ಇಳಿ ವಯಸ್ಸಿನ ಕರುಣಾನಿಧಿ ಕಷ್ಟ ಪಟ್ಟು ಕೈ ಮಡಚುತ್ತಾ , ಕಣ್ಣಲ್ಲಿ ನೀರು ತುಂಬಿಕೊಂಡು ಆಡಿದ ಮಾತಿದು.

ಕಿಕ್ಕಿರಿದ ಸುದ್ದಿಗೋಷ್ಠಿ ಅದು. ಕರುಣಾನಿಧಿ ಮನಸ್ಸಲ್ಲಿ ಅದೇ ಘಟನೆ ಅವುಡುಗಚ್ಚುತ್ತಿರುವುದು ಸ್ಪಷ್ಟವಾಯಿತು. ತಳ್ಳಿದರು, ಹಿಸುಕಿದರು, ಮೆಟ್ಟಿಲುಗಳ ಮೇಲೆ ದರದರನೆ ಎಳೆದಾಡಿದರು, ಫುಟ್‌ಬಾಲಿನಂತೆ ಒದ್ದರು. ಬಲಗೈ ನೋವಿನ ಯಮ ಯಾತನೆ ಅನುಭವಿಸುತ್ತಿದ್ದರೂ, ಸಿಬಿ- ಸಿಐಡಿ ಡಿಐಜಿ ಮೊಹಮ್ಮದ್‌ ಅಲಿ ಬಲವಂತವಾಗಿ ಹೊತ್ತೊಯ್ದರು... ಇಷ್ಟು ಹೇಳುವಷ್ಟರಲ್ಲಿ ಭಾರವೋ ಎಂಬಂತೆ ಬಲಗೈಯನ್ನು ಮೆತ್ತಗೆ ಆಡಿಸಿದ ಕರುಣಾನಿಧಿ ಕಣ್ಣುಗಳಲ್ಲಿ ಮತ್ತೆ ತೇವ ಆಡಿತು.

(ಯುಎನ್‌ಐ)