ಬಿ.ಡಿ.ಎ.ಯಿಂದ ಬೆಂಗಳೂರಿಗರಿಗೆ 5000 ನಿವೇಶನ ಮಂಜೂರು
ಬೆಂಗಳೂರು : 2001ನೇ ವರ್ಷದಲ್ಲಿ ಸುಮಾರು 20 ಸಾವಿರ ನಿವೇಶನಗಳನ್ನು ಬೆಂಗಳೂರಿಗರಿಗೆ ಹಂಚಲು ನಿರ್ಧರಿಸಿರುವ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಪ್ರಥಮ ಹಂತವಾಗಿ ಈಗಾಗಲೇ 5 ಸಾವಿರ ನಿವೇಶನಗಳನ್ನು ಮಂಜೂರು ಮಾಡಿದೆ. ಆಗಸ್ಟ್ ಮೊದಲ ವಾರದೊಳಗೆ ಇನ್ನೂ 10 ಸಾವಿರ ನಿವೇಶನಗಳನ್ನು ಹಂಚಲು ಅರ್ಜಿ ಅಹ್ವಾನಿಸಲಿದೆ.
ಈ ವಿಷಯವನ್ನು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಆಯುಕ್ತ ಜೈಕರ್ ಜರೋಮ್ ಬುಧವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. ಬನಶಂಕರಿ 6ನೇ ಹಂತದ ಯೋಜನೆಯಲ್ಲಿ 10 ಸಾವಿರ ನಿವೇಶನಗಳನ್ನು ವಿಂಗಡಿಸಿ ವಿತರಿಸುವ ಗುರಿ ಪ್ರಾಧಿಕಾರದ ಮುಂದಿದೆ. ವಿಧಾನಸೌಧಕ್ಕೆ ಕೇವಲ 17 ಕಿ.ಮೀಟರ್ ಅಂತರದಲ್ಲಿರುವ ಅಂಜನಾಪುರ ಬಡಾವಣೆಯಲ್ಲಿ ಕೇವಲ ಮೂರು ತಿಂಗಳ ಅವಧಿಯಲ್ಲಿ 5 ಸಾವಿರ ನಿವೇಶನ ಅಭಿವೃದ್ಧಿಪಡಿಸಿ ಹಂಚಲಾಗಿದೆ ಎಂದು ಅವರು ಹೇಳಿದರು.
ಬನಶಂಕರಿ 6ನೇ ಹಂತದ ವಿಸ್ತರಣೆಯಲ್ಲಿ 10 ಸಾವಿರ ನಿವೇಶನ ಹಂಚಲು ಉದ್ದೇಶಿಸಲಾಗಿದೆ. ಇದಕ್ಕಾಗಿ ಆಗಸ್ಟ್ ಮೊದಲ ವಾರದಲ್ಲಿ ಅರ್ಜಿ ಕರೆಯಲಾಗುವುದು ಎಂದೂ ಅವರು ಸ್ಪಷ್ಟಪಡಿಸಿದ್ದಾರೆ. ನಿವೇಶನದ ಮಂಜೂರಾತಿಯ ಜತೆಗೇ ಆಕ್ಷೇಪಣಾ ರಹಿತ ಪತ್ರವನ್ನು ನೀಡಲಾಗುತ್ತದೆ ಎಂದೂ ಅವರು ಹೇಳಿದರು.
ನಿವೇಶನ ಮಂಜೂರಾದ ವ್ಯಕ್ತಿಗಳು ನಿವೇಶನದ ಮೌಲ್ಯವನ್ನು ಸಂದಾಯ ಮಾಡಿದ ಕೂಡಲೇ ಶುದ್ಧ ಕ್ರಯಪತ್ರವನ್ನು ನೀಡುವ ವ್ಯವಸ್ಥೆಯನ್ನೂ ಜಾರಿಗೆ ತರಲಾಗಿದೆ. 2001 ಜೂನ್ 30ರವರಗೆ ಸುಮಾರು 9400 ಕ್ರಯಪತ್ರ ವಿತರಿಸಲಾಗಿದೆ ಎಂದು ಅವರು ವಿವರಿಸಿದರು.