ತಮಿಳುನಾಡಿನಿಂದ ಕರ್ನಾಟಕ ಕಾಡಿಗೆ ಓಡಿ ಬಂದ ವೀರಪ್ಪನ್‌!

ಮೈಸೂರು: ವೀರಪ್ಪನ್‌ ವಿರುದ್ಧ ತಮಿಳುನಾಡು ಗಡಿಯಲ್ಲಿ ಕಾರ್ಯಾಚರಣೆ ತೀವ್ರಗೊಂಡಿರುವ ಹಿನ್ನೆಲೆಯಲ್ಲಿ ವೀರಪ್ಪನ್‌ ತನ್ನ ಸಹಚರರೊಂದಿಗೆ ಕರ್ನಾಟಕ ಅರಣ್ಯವನ್ನು ಪ್ರವೇಶಿಸಿದ್ದಾನೆ ಎಂದು ರಾಜ್ಯದ ವಿಶೇಷ ಗುಪ್ತಚಾರ ದಳ, ಎಸ್‌.ಟಿ.ಎಫ್‌.ಗೆ ಮಾಹಿತಿ ನೀಡಿದೆ.

ಸೋಮವಾರ ಮಧ್ಯ ರಾತ್ರಿಯ ನಂತರ - ಮಂಗಳವಾರ ನಸುಕಿನ ಅವಧಿಯಲ್ಲಿ ವೀರಪ್ಪನ್‌ ತನ್ನ ತಂಡದೊಂದಿಗೆ ಕರ್ನಾಟಕ ಕಾಡನ್ನು ಪ್ರವೇಶಿಸಿದ್ದಾನೆ ಎಂಬ ಸ್ಪಷ್ಟ ಸುಳಿವು ದೊರೆತಿರುವ ಹಿನ್ನೆಲೆಯಲ್ಲಿ ಈ ಪ್ರದೇಶದಲ್ಲಿ ಕಾರ್ಯಾಚರಣೆ ತೀವ್ರಗೊಳಿಸಲಾಗಿದೆ. ರಾಜ್ಯದ ವ್ಯಾಪ್ತಿಯಲ್ಲಿರುವ ಎಲ್ಲ ಎಸ್‌ಟಿಎಫ್‌ ಶಿಬಿರಗಳಿಗೆ ಕಟ್ಟೆಚ್ಚರ ವಹಿಸುವಂತೆ ಸೂಚಿಸಲಾಗಿದೆ.

ದಿಂಬಂ, ಮೆಟ್ಟೂರು ಅರಣ್ಯ ಪ್ರದೇಶದಲ್ಲಿ ಜೂನ್‌ 21ರಿಂದಲೇ ಕಾರ್ಯಾಚರಣೆ ನಡೆಯುತ್ತಿದೆ. ಈ ಹಿನ್ನೆಲೆಯಲ್ಲಿ ವೀರಪ್ಪನ್‌ಗೆ ಕರ್ನಾಟಕ ಕಾಡಿಗೆ ಪಲಾಯನ ಮಾಡದೆ ವಿಧಿಯೇ ಇರಲಿಲ್ಲ ಎನ್ನಲಾಗಿದೆ. ಲಾರಿಯಾಂದರಲ್ಲಿ ಗೇರು ಮಾಳಂ ಮಾರ್ಗವಾಗಿ ಕತ್ತಲಲ್ಲಿ ತಪ್ಪಿಸಿಕೊಂಡು ಬಂದಿರುವ ವೀರಪ್ಪನ್‌ ಸಹಚರರು ಪ್ರಸ್ತುತ ಬೈಲೂರು ಅರಣ್ಯ ಪ್ರದೇಶದಲ್ಲಿ ಬೀಡುಬಿಟ್ಟಿರಬಹುದು ಎಂದು ಶಂಕಿಸಲಾಗಿದೆ.