ಆಟೋ ಚಾಲಕರ ಹಠಾತ್‌ ಮುಷ್ಕರ; ಪೊಲೀಸರ ಲಾಠಿ ಪ್ರಹಾರ

ಬೆಂಗಳೂರು : ಕನ್ನಡ ಸಂಖ್ಯಾ ಫಲಕ ಹಾಕುವ ಆಟೋ ಚಾಲಕರಿಗೆ ಬೆಂಗಳೂರು ಸಂಚಾರಿ ಪೊಲೀಸರು ನೀಡುತ್ತಿರುವ ಕಿರುಕುಳವನ್ನು ಪ್ರತಿಭಟಿಸಿ ಮೆಜೆಸ್ಟಿಕ್‌ ಪ್ರದೇಶದಲ್ಲಿ ಬುಧವಾರ ಹಠಾತ್‌ ಮುಷ್ಕರ ನಡೆಸಿದ ಆಟೋ ಚಾಲಕರ ಮೇಲೆ ಪೊಲೀಸರು ಲಾಠಿ ಪ್ರಹಾರ ನಡೆಸಿದರು.

ಈ ಘಟನೆಯಿಂದಾಗಿ ಬುಧವಾರ ಮಧ್ಯಾಹ್ನ ಕೆಂಪೇಗೌಡ ಬಸ್‌ನಿಲ್ದಾಣ ಪ್ರದೇಶದಲ್ಲಿ ಉದ್ರಿಕ್ತ ಪರಿಸ್ಥಿತಿ ನಿರ್ಮಾಣವಾಗಿತ್ತಲ್ಲದೆ, ಸಂಚಾರ ಹಲವು ಗಂಟೆಗಳ ಕಾಲ ಅಸ್ತವ್ಯಸ್ತವಾಗಿತ್ತು. ಸದಾ ಏನಾದರೂ ಒಂದು ಕಾರಣ ಹೇಳಿ ಕಿರುಕುಳ ನೀಡುವ ಬೆಂಗಳೂರು ಸಂಚಾರಿ ಪೊಲೀಸರು ಈಗ ಕನ್ನಡ ಸಂಖ್ಯಾಫಲಕ ಹಾಕಿದ ಆಟೋ ಚಾಲಕರಿಗೆ ಉಪದ್ರವ ನೀಡುತ್ತಿದ್ದಾರೆ ಎಂದು ಆರೋಪಿಸಿ, ಆಟೋ ಚಾಲಕರು ರೈಲ್ವೆ ನಿಲ್ದಾಣದ ಎದುರು ಸಂಚಾರ ಸ್ಥಗಿತಗೊಳಿಸಿ ಮುಷ್ಕರ ಹೂಡಿದರು.

ಇದರಿಂದಾಗಿ ಮೆಜೆಸ್ಟಿಕ್‌ ಪ್ರದೇಶದಲ್ಲಿ ಸಂಚಾರ ವ್ಯವಸ್ಥೆ ಸಂಪೂರ್ಣ ಅಸ್ತವ್ಯಸ್ತವಾಯಿತು. ಕೂಡಲೇ ಸ್ಥಳಕ್ಕೆ ಆಗಮಿಸಿದ ಪೊಲೀಸ್‌ ಅಧಿಕಾರಿಗಳು ಮುಷ್ಕರ ಹಿಂದಕ್ಕೆ ಪಡೆಯುವಂತೆ ಕೋರಿದರೂ ಫಲಕಾರಿಯಾಗಲಿಲ್ಲ. ಪೊಲೀಸರು ಕನ್ನಡ ಸಂಖ್ಯಾಫಲಕ ಹಾಕಿರುವ ಆಟೋ ಚಾಲಕರಿಗೆ ಕಿರುಕುಳ ನೀಡುವುದಿಲ್ಲ ಎಂಬ ಭರವಸೆ ದೊರೆಯುವವರೆಗೂ ತಾವು ಹೋರಾಟ ನಡೆಸುವುದಾಗಿ ಆಟೋಚಾಲಕರು ಪಟ್ಟು ಹಿಡಿದರು.

ಜೈ ಕರ್ನಾಟಕ ಮಾತೆ, ಜೈ ಭುವನೇಶ್ವರಿ, ಪೊಲೀಸರಿಗೆ ಧಿಕ್ಕಾರ ಎಂಬ ಘೋಷಣೆಗಳು ಮೊಳಗಿದವು. ಕೆಲವು ಚಾಲಕರು ಕಲ್ಲು ತೂರಾಟದಲ್ಲಿ ನಿರತರಾದರು. ಪೊಲೀಸರ ಲಾಠಿಗಳು ಗರಿಗೆದರಿದವು, ಪೊಲೀಸರ ಬೂಟುಗಳು ವಿಜೃಂಭಿಸಿದವು. ಏಟು ತಿಂದ ಚಾಲಕರು ದಿಕ್ಕಾಪಾಲಾಗಿ ಓಡಿದರು. ಈ ಲಾಠಿ ಪ್ರಹಾರದ ಸಂದರ್ಭದಲ್ಲಿ ಹಲವು ಆಟೋ ಚಾಲಕರು ಗಾಯಗೊಂಡಿದ್ದಲ್ಲದೆ, ಹತ್ತಾರು ಆಟೋಗಳೂ ಜಖಂಗೊಂಡವು.

ಪೊಲೀಸರು ಮುಷ್ಕರ ಸಂಬಂಧ 20 ಮಂದಿ ಆಟೋ ಚಾಲಕರನ್ನು ಬಂಧಿಸಿದ್ದಾರೆ. ಪಶ್ಚಿಮ ವಲಯದ ಡಿಸಿಪಿ ನಿಸ್ಸಾರ್‌ ಅಹ್ಮದ್‌ ಹಾಗೂ ಇನ್ನಿತರ ಹಿರಿಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿದ್ದರು. ಸುಮಾರು ಮೂರ್ನಾಲ್ಕು ಗಂಟೆಗಳ ಬಳಿಕ ಪರಿಸ್ಥಿತಿ ನಿಯಂತ್ರಣಕ್ಕೆ ಬಂತು.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...