ಕೊಳತ್ತೂರು ಮಣಿ ಬಂಧನ ಎಸ್‌ಟಿಎಫ್‌ನ ತಪ್ಪು ನಡೆಯೇ?

* ಪಾಪ್ರಿ ಶ್ರೀರಾಮನ್‌

ಚೆನ್ನೈ: ನರ ಹಂತಕ ವೀರಪ್ಪನ್‌ನೊಂದಿಗೆ ಸಂಪರ್ಕ ಹೊಂದಿರುವ ತಮಿಳು ರಾಷ್ಟ್ರೀಯವಾದಿ ಕೊಳತ್ತೂರು ಮಣಿ ಅವರನ್ನು ಬಂಧಿಸುವ ಮೂಲಕ ವಿಶೇಷ ಕಾರ್ಯಾಚರಣೆ ಪಡೆ ತಪ್ಪು ಮಾಡಿದೆಯೇ? ತನ್ನ ಕಾರ್ಯಾಚರಣೆಯಲ್ಲಿ ಅಡ್ಡ ಹೆಜ್ಜೆ ಇಟ್ಟಿದೆಯೇ? ಹೌದೆನ್ನುತ್ತಾರೆ, ವೀರಪ್ಪನ್‌ ಪ್ರಕರಣವನ್ನು ಆದ್ಯಂತವಾಗಿ ಬಲ್ಲ ವಿಶ್ಲೇಷಕರು.

ವೀರಪ್ಪನ್‌ ಮರ್ಮವನ್ನು ಬಲ್ಲ ರಾಷ್ಟ್ರೀವಾದಿಗಳ ಮೂಲಕ ಎಸ್‌ಟಿಎಫ್‌ ವೀರಪ್ಪನನ್ನು ಉಪಾಯವಾಗಿ ಸೇರಲು ಸಾಧ್ಯವಿತ್ತು . ಆದರೆ, ಜೂನ್‌ 25 ರಂದು ಕೊಳತ್ತೂರು ಮಣಿಯನ್ನು ವಶಕ್ಕೆ ತೆಗೆದುಕೊಳ್ಳುವ ಮೂಲಕ ವೀರಪ್ಪನ್‌ ಸಂಪರ್ಕ ಸಾಧಿಸಲು ಇದ್ದ ಅವಕಾಶಗಳನ್ನು ಎಸ್‌ಟಿಎಫ್‌ ಕೈಯಾರೆ ಹಾಳು ಮಾಡಿಕೊಂಡಿದೆ ಎಂಬುದು ವಿಶ್ಲೇಷಕರ ಅಭಿಪ್ರಾಯ.

ಎರಡು ವರ್ಷಗಳ ಹಿಂದೆ ಬಂಧಿತರಾಗಿದ್ದ ಎಸ್‌.ಎ. ಮಣಿಕಂಠನ್‌ ಎನ್ನುವ ಮತ್ತೊಬ್ಬ ತಮಿಳು ರಾಷ್ಟ್ರೀಯವಾದಿ , ಸರ್ಕಾರ ಕ್ಷಮಾದಾನ ನೀಡಲು ಮುಂದಾದಲ್ಲಿ ವೀರಪ್ಪನ್‌ ಶರಣಾಗತಿಗೆ ತಾವು ಹಾಗೂ ಪಿ. ನೆಡುಮಾರನ್‌ ಪ್ರಯತ್ನಿಸಲು ಸಿದ್ಧ ಎಂದು ಜೂನ್‌ 26 ರಂದು ನೀಡಿದ ಹೇಳಿಕೆಯನ್ನು ಇಲ್ಲಿ ಗಮನಿಸಬಹುದು.

ಪ್ರಸ್ತುತ ಮಣಿ ಅವರ ಬಂಧನ ನೆಡುಮಾರನ್‌ ಅವರು ಸೇರಿದಂತೆ ತಮಿಳು ರಾಷ್ಟ್ರೀಯವಾದಿಗಳನ್ನು ಕೆರಳಿಸಿದೆ. ಇದರಿಂದಾಗಿ ಹೆಚ್ಚೂ ಕಡಿಮೆ, ತಮಿಳು ರಾಷ್ಟ್ರೀಯವಾದಿಗಳ ಮೂಲಕ ಸಾಧಿಸಬಹುದಾಗಿದ್ದ ವೀರಪ್ಪನ್‌ ಸಂಪರ್ಕದ ಬಾಗಿಲುಗಳು ಮುಚ್ಚಿದಂತೆಯೇ. ಎಸ್‌ಟಿಎಫ್‌ ಪ್ರಸ್ತುತ ಹೊಸದಾರಿಗಳನ್ನು ಹುಡುಕಿಕೊಳ್ಳುವುದು ಅನಿವಾರ್ಯ.

(ಐಎಎನ್‌ಎಸ್‌)

ಮುಖಪುಟ / ವೀರಪ್ಪನ್‌ ಶಿಕಾರಿ