‘ಪ್ರಶಸ್ತಿ ವಿಜೇತರಿಂದ ಸರಕಾರ ಇನ್ನಷ್ಟು ಸಾಧನೆ ನಿರೀಕ್ಷಿಸುತ್ತದೆ’

ಮಂಗಳೂರು : ಪ್ರಶಸ್ತಿ ನೀಡುವುದು ಸಾಂಕೇತಿಕ ಮಾತ್ರವಾಗಿದ್ದು, ಪ್ರಶಸ್ತಿ ಪಡೆದವರಿಂದ ಸರಕಾರ ಇನ್ನಷ್ಟು ಸಾಧನೆಯನ್ನು ನಿರೀಕ್ಷಿಸುತ್ತದೆ ಎಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವೆ ರಾಣಿ ಸತೀಶ್‌ ಹೇಳಿದ್ದಾರೆ.

ಮಂಗಳೂರಿನಲ್ಲಿ ಸೋಮವಾರ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪ್ರದಾನ ಮಾಡಿ ಮಾತನಾಡುತ್ತಿದ್ದ ಅವರು ಪ್ರಶಸ್ತಿ ವಿಜೇತರು ಭಾಷೆ ಮತ್ತು ಸಂಸ್ಕೃತಿಯ ಮೇಲಿನ ಅಭಿಮಾನದಿಂದ ಇನ್ನೂ ಹೆಚ್ಚಿನ ಕೆಲಸ ಮಾಡಬೇಕು ಎಂದರು. ಕೊಂಕಣಿ ಅಕಾಡಮಿ ಪ್ರಶಸ್ತಿ ವಿಜೇತರ ಪಟ್ಟಿಯಲ್ಲಿ ಮಹಿಳೆಯರೇ ಇಲ್ಲದಿರುವುದಕ್ಕೆ ವಿಷಾದಿಸುತ್ತಾ, ಭಾಷಾ ಅಕಾಡೆಮಿಗಳಿಗೆ ನೀಡುತ್ತಿರುವ ಅನುದಾನವನ್ನು ಹೆಚ್ಚಿಸಲು ತನ್ನಿಂದಾದ ಪ್ರಯತ್ನ ಮಾಡುವುದಾಗಿ ಭರವಸೆ ಇತ್ತರು.

ಪ್ರಶಸ್ತಿ ವಿಜೇತರು : ವಿಕ್ಟರ್‌ ರೋಡ್ರಿಗಸ್‌ (ಸಾಹಿತ್ಯ), ಕೋಟಾ ನರಸಿಂಹ ಪೈ (ನಾಟಕ), ಮೆಲ್ವಿನ್‌ ಪೆರಿಸ್‌ (ಸಂಗೀತ) ಕೀರ್ತನ ಕೇಸರಿ ಅನಂತ ಯಶವಂತ ಭಟ್‌ (ಜಾನಪದ) ಮತ್ತು ಫಾ. ಮಾರ್ಕ್‌ ವಾಲ್ಡರ್‌ (ಪತ್ರಿಕೋದ್ಯಮ).

ಸಮಾರಂಭದಲ್ಲಿ ಸಂತ ಅಲೋಶಿಯಸ್‌ ಕಾಲೇಜಿನ ಕೊಂಕಣಿ ವಿಭಾಗ ಮತ್ತು ಕೊಂಕಣಿ ಅಕಾಡೆಮಿ ಜಂಟಿಯಾಗಿ ಪ್ರಕಟಿಸಿದ ಕೊಂಕಣಿ ಕಲಿಯೋಣ ಎನ್ನುವ ಪ್ರೇಮ್‌ ಕುಮಾರ್‌ ಅವರ ಪುಸ್ತಕವನ್ನು ಸಚಿವೆ ಬಿಡುಗಡೆ ಮಾಡಿದರು.

(ಇನ್ಫೋ ವಾರ್ತೆ)