ಅಮೆರಿಕೆಯ ವಿಗತಿ ಭಾರತಕ್ಕೆ ಅವಕಾಶದ ಬುತ್ತಿ - ವಿನೋದ್‌ ಧಾಮ್‌

* ಸುಖ್‌ಜಿತ್‌ ಪುರೇವಾಲ್‌

ಸಾಂತಕ್ಲಾರ : ಅಮೆರಿಕೆಯ ಆರ್ಥಿಕ ವಿಗತಿ ಹಾಗೂ ಡಾಟ್‌ಕಾಂ ಉದ್ಯಮ ಕರಗುವಿಕೆ ಭಾರತಕ್ಕೆ ವರದಾನವಾಗಲಿದೆ ಎಂಬ ಮಾತು 8ನೇ ವಾರ್ಷಿಕ ಟಿಐಇಕಾನ್‌ನ ಎರಡನೇ ದಿನವಾದ ಸೋಮವಾರ ಕೇಳಿಬಂತು.

ಬ್ರಾಡ್‌ಕಾಮ್‌ ಕಾರ್ಪೊರೇಷನ್ನಿನ ಉಪಾಧ್ಯಕ್ಷ ವಿನೋದ್‌ ಧಾಮ್‌ ಸುದ್ದಿಗೋಷ್ಠಿಯಲ್ಲಿ ನಗುನಗುತ್ತಾ ಮಾತಾಡಿದರು. ಐಟಿ ನಕಾಶೆಯಲ್ಲಿ ಭಾರತಕ್ಕೆ ಇನ್ನಷ್ಟು ಹೊಳಹು ಸಿಗುವ ಸದವಕಾಶವಿದು. ಭಾರತಕ್ಕೆ ಕೇವಲ ಸಾಫ್ಟ್‌ವೇರ್‌ ಉತ್ಪಾದನೆ ಮಾಡುವುದಷ್ಟೇ ಅಲ್ಲದೆ, ಇಡೀ ಉಪಕರಣ ತಯಾರಿಸುವ ಸಾಮರ್ಥ್ಯವಿದೆ ಎಂದರು.

ಭಾರತ ಐಟಿ ಪರಿಣತರ ತಾಣ ಅನ್ನೋದು ಸಾಬೀತಾಗಿದೆ. ಹೀಗಿರುವಾಗ ನಾವು ತಾಂತ್ರಿಕ ನೆರವನ್ನಷ್ಟೇ ಯಾಕೆ ಕೊಡಬೇಕು? ಸಾಫ್ಟ್‌ವೇರ್‌ ವಿನ್ಯಾಸವಷ್ಟೇ ನಮ್ಮ ಕೆಲಸವಾ? ನಮಗೆ ಬುದ್ಧಿ ಇದೆ. ತಾಕತ್ತಿದೆ. ನಮ್ಮ ಸಹಾಯ ಪಡೆವ ಇತರೆ ರಾಷ್ಟ್ರಗಳು ಯಾವ ದರದಲ್ಲಿ ಮಾಹಿತಿ ತಂತ್ರಜ್ಞಾನ ಉತ್ಪನ್ನಗಳನ್ನು ಮಾರುಕಟ್ಟೆಗೆ ತರುತ್ತವೋ ಅದಕ್ಕಿಂತ ಕಡಿಮೆ ದರದಲ್ಲಿ ನಾವೇ ಉತ್ಪಾದಿಸಿದ ಉಪಕರಣಗಳನ್ನು ಮಾರುಕಟ್ಟೆಗೆ ತರುವ ಒಳ್ಳೆ ಅವಕಾಶವಿದು ಎಂದು ವಿನೋದ್‌ ಅಭಿಪ್ರಾಯಪಟ್ಟರು.

2010ನೇ ಇಸವಿ ಹೊತ್ತಿಗೆ ಸಾಫ್ಟ್‌ವೇರ್‌ ವಿನ್ಯಾಸ ಮೊದಲುಗೊಂಡು ಐಟಿ ಕ್ಷೇತ್ರದ ಉತ್ಪಾದನೆಯ ದಿಗ್ಗಜ ಎಂದು ಭಾರತ ಗುರ್ತಿಸಿಕೊಳ್ಳಲಿದೆ ಎಂಬ ಒಕ್ಕೊರಲು ಟಿಐಇಕಾನ್‌ನಲ್ಲಿ ಕೇಳಿಬಂತು.

(ಐಎಎನ್‌ಎಸ್‌)