ಐಸಿಐಸಿಐ ಬ್ಯಾಂಕ್‌ ಅಧ್ಯಕ್ಷ ವಾಘಲ್‌ಗೆ ಕೆಕೆ ಪೈ ಬ್ಯಾಂಕಿಂಗ್‌ ಪ್ರಶಸ್ತಿ

ಮಣಿಪಾಲ : ಐಸಿಐಸಿಐ ಬ್ಯಾಂಕ್‌ ಅಧ್ಯಕ್ಷ ಎನ್‌. ವಾಘಲ್‌ ಈ ಸಾಲಿನ ಪ್ರತಿಷ್ಟಿತ ಕೆಕೆ ಪೈ ರಾಷ್ಟ್ರೀಯ ಬ್ಯಾಂಕಿಂಗ್‌ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ.

ರಾಷ್ಟ್ರೀಯ ಬ್ಯಾಂಕರ್‌ ಆಗಿರುವ ವಾಘಲ್‌ ಅವರು ಐಸಿಐಸಿಐ ಬಳಗವನ್ನು ಒಂದು ಬೃಹತ್‌ ಹಣಕಾಸು ಸೇವಾ ಬಳಗವನ್ನಾಗಿ ಬೆಳೆಸಿದ ಕೀರ್ತಿಗೆ ಪಾತ್ರರಾಗಿದ್ದಾರೆ. ಹೂಡಿಕೆ ಬ್ಯಾಂಕ್‌, ವಾಣಿಜ್ಯ ಬ್ಯಾಂಕ್‌, ಸೊತ್ತು ನಿರ್ವಹಣಾ ಸಂಸ್ಥೆ, ವೆಂಚರ್‌ ಕ್ಯಾಪಿಟಲ್‌ ಸಂಸ್ಥೆಗಳ ಸ್ಥಾಪಕರು ಹಾಗೂ ಪ್ರಥಮ ಕ್ರೆಡಿಟ್‌ ರೇಟಿಂಗ್‌ ಸಂಸ್ಥೆಯಾದ ಕ್ರಿಸಿಲ್‌ನ ಸ್ಥಾಪಕರೂ ಹೌದು.

ಕಳೆದ ಹದಿನಾರು ವರ್ಷಗಳಿಂದ ಐಸಿಐಸಿಐ ಬ್ಯಾಂಕ್‌ನ ಅಧ್ಯಕ್ಷರಾಗಿರುವ ವಾಘಲ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ಅಧ್ಯಕ್ಷರಾಗಿ, ಸೆಂಟ್ರಲ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ಕಾರ್ಯಕಾರಿ ನಿರ್ದೇಶಕರಾಗಿ ಕೆಲಸ ಮಾಡಿದ ಅನುಭವ ಉಳ್ಳವರು. ಪ್ರಸ್ತುತ ವಿವಿಧ ಸಂಸ್ಥೆಗಳ ಆಡಳಿತ ಮಂಡಳಿಯಲ್ಲಿ ನಿರ್ದೇಶಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

(ಇನ್ಫೋ ವಾರ್ತೆ)