ಬೆಂಗಳೂರಲ್ಲಿ ತಲೆಯೆತ್ತಲಿದೆ ಇಂದಿರಾಗಾಂಧಿಕಲಾಕೇಂದ್ರದ ಶಾಖೆ

ಬೆಂಗಳೂರು : ಇಂದಿರಾಗಾಂಧಿ ರಾಷ್ಟ್ರೀಯ ಕಲಾ ಕೇಂದ್ರದ ದಕ್ಷಿಣ ಭಾರತ ಪ್ರಾದೇಶಿಕ ಕೇಂದ್ರ ನಗರದಲ್ಲಿ ತಲೆಯೆತ್ತಲಿದೆ. ಜುಲೈ 10ರಂದು ಕೇಂದ್ರದ ಶಂಕುಸ್ಥಾಪನೆ ಮಾಡಲಾಗುವುದು ಎಂದು ಕೇಂದ್ರ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಅನಂತಕುಮಾರ್‌ ಪ್ರಕಟಿಸಿದ್ದಾರೆ.

ಶನಿವಾರ ನಗರದ ಮಾಣಿಕ್‌ವೇಲ್‌ ಮ್ಯಾನ್ಷನ್‌ನಲ್ಲಿ ರಾಷ್ಟ್ರೀಯ ಆಧುನಿಕ ಕಲಾಗಾರಕ್ಕೆ ಶಿಲಾನ್ಯಾಸ ನೆರವೇರಿಸಿ ಅವರು ಮಾತಾಡುತ್ತಿದ್ದರು. ಗುವಾಹಟಿ ಹಾಗೂ ವಾರಾಣಸಿಯಲ್ಲಿ ಇಂದಿರಾಗಾಂಧಿ ರಾಷ್ಟ್ರೀಯ ಕಲಾ ಕೇಂದ್ರದ ಪ್ರಾದೇಶಿಕ ಶಾಖೆಗಳಿವೆ. ದಕ್ಷಿಣ ಭಾರತದ ಶಾಖೆಯನ್ನು ಬೆಂಗಳೂರಿನಲ್ಲಿ ಅಭಿವೃದ್ಧಿಪಡಿಸಲು ಕಲಾಕೇಂದ್ರದ ಕಾರ್ಯ ನಿರ್ವಾಹಕ ಮಂಡಳಿ ಒಪ್ಪಿಗೆ ನೀಡಿದೆ. ಹಸ್ತಲಿಪಿ, ಜಾನಪದ ಕಲೆ ಹಾಗೂ ಸಂಸ್ಕೃತಿಗೆ ಸಂಬಂಧಿಸಿದ ವಸ್ತುಗಳ ಸಂಗ್ರಹ ಇದಾಗಲಿದೆ ಎಂದರು.

ಇದು ಅನನ್ಯ ಕಲಾಗಾರ : ದೆಹಲಿಯಲ್ಲಿ ಸಾಂಸ್ಕೃತಿಕ ಸಮುಚ್ಚಯವಿರುವಂತೆ, ಕಲೆ, ಸಾಹಿತ್ಯ ಹಾಗೂ ಸಂಸ್ಕೃತಿಗೆ ಸಂಬಂಧಪಟ್ಟ ಸಂಸ್ಥೆಗಳನ್ನು ಒಂದೇ ಸೂರಿನಡಿ ತರುವ ಪ್ರಯತ್ನ ನಮ್ಮದು. ಈ ನಿಟ್ಟಿನ ಮೊದಲ ಹೆಜ್ಜೆಗಳಾಗಿ ಆಧುನಿಕ ಕಲಾಗಾರ ಹಾಗೂ ಇಂದಿರಾಗಾಂಧಿ ಕಲಾ ಕೇಂದ್ರದ ಶಾಖೆ ಸ್ಥಾಪನೆ ಹೊಮ್ಮಿವೆ. ಫ್ರಾನ್ಸ್‌, ಇಂಗ್ಲೆಂಡ್‌ ಮೊದಲಾದ ಆಧುನಿಕ ಕಲಾ ಗ್ಯಾಲರಿಗೂ ಭಿನ್ನವಾದ ಮಾದರಿಯಲ್ಲಿ ಆಧುನಿಕ ಕಲಾಗಾರವನ್ನು ಇನ್ನು ಒಂದೂವರೆ ವರ್ಷದಲ್ಲಿ ಅಭಿವೃದ್ಧಿಪಡಿಸಲಾಗುವುದು . ಇದಕ್ಕೆ 7.5 ಕೋಟಿ ರುಪಾಯಿ ಖರ್ಚು ಮಾಡಲಾಗುವುದು ಎಂದು ಅನಂತಕುಮಾರ್‌ ವಿವರಿಸಿದರು.

ಒಳ್ಳೆ ಕೆಲಸಕ್ಕೆ ಆಷಾಢದ ಭಯ ಇಲ್ಲ ಎಂದು ನಗುತ್ತಾ ಮಾತಾಡಿದ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ, ಇಂದಿರಾಗಾಂಧಿ ಕಲಾ ಕೇಂದ್ರ ಸ್ಥಾಪನೆಗೆ ಬೆಂಗಳೂರು ವಿವಿಯ ಜ್ಞಾನಗಂಗೋತ್ರಿ ಆವರಣದಲ್ಲಿ ಜಾಗೆ ನೀಡುವಂತೆ ವಿವಿ ಕುಲಪತಿ ಡಾ.ಕೆ.ಸಿದ್ಧಪ್ಪ ಅವರಿಗೆ ಸೂಚಿಸಲಾಗುವುದು ಎಂದರು.

(ಇನ್ಫೋ ವಾರ್ತೆ)