ಬಡತನ ನಿರ್ಮೂಲನೆ : ಭಾರತಕ್ಕೆ 913.8 ದಶಲಕ್ಷ ಡಾಲರ್‌ ಸಾಲ

ವಾಷಿಂಗ್ಟನ್‌ : ಭಾರತದ ಬಡತನ ನಿರ್ಮೂಲನಾ ಯೋಜನೆಗಳಿಗೆ 913.8 ದಶಲಕ್ಷ ಡಾಲರ್‌ ಮೊತ್ತದ ನಾಲ್ಕು ಸಾಲಗಳನ್ನು ವಿಶ್ವಬ್ಯಾಂಕ್‌ ಮಂಜೂರು ಮಾಡಿದೆ.

ಪ್ರಸ್ತುತ ವಿತ್ತ ವರ್ಷದಲ್ಲಿ ಭಾರತಕ್ಕೆಂದು ಮೀಸಲಿಟ್ಟಿರುವ 2.5 ಬಿಲಿಯನ್‌ ಡಾಲರ್‌ ಮೊತ್ತದ ಹಣದ ಭಾಗ ಇದಾಗಿದೆ. ಕೇಂದ್ರ, ರಾಜ್ಯ ಮತ್ತು ವಿವಿಧ ರಾಜ್ಯಗಳ ಸ್ಥಳೀಯ ಕಾರ್ಯಕ್ರಮಗಳಿಗೆ ಈ ಹಣ ವಿನಿಯೋಗವಾಗಲಿದೆ. ಅದರಲ್ಲೂ ಉತ್ತರ ಭಾರತದ ರಾಜ್ಯಗಳಿಗೆ ಹೆಚ್ಚು ಒತ್ತು ನೀಡಲಾಗುವುದು ಎಂದು ಬ್ಯಾಂಕ್‌ ಪ್ರಕಟಣೆ ತಿಳಿಸಿದೆ.

ಸಾಲದ ಮೊತ್ತದಲ್ಲಿ ಕರ್ನಾಟಕ ಜಲವಸತಿ ಅಭಿವೃದ್ಧಿ ಯೋಜನೆಗೆ 100 ಮಿಲಿಯನ್‌ ಡಾಲರ್‌ ದೊರೆಯಲಿದೆ. ಇದರಿಂದ ಅರೆ ಶುಷ್ಕ ಪ್ರದೇಶಗಳಲ್ಲಿನ ಜನರ ಬಡತನ ನಿವಾರಣೆ ಸಾಧ್ಯವಾಗಲಿದೆ. ಇದಲ್ಲದೆ ಉತ್ತರ ಪ್ರದೇಶ ಹಾಗೂ ಬಿಹಾರದ ರಸ್ತೆ ಅಭಿವೃದ್ಧಿಗೆ ಹಾಗೂ ದೆಹಲಿ- ಕೋಲ್ಕತಾ ಸೇರಿಸುವ ರಾಷ್ಟ್ರೀಯ ಹೆದ್ದಾರಿಯ ಅಗಲೀಕರಣಕ್ಕೆ 589 ದಶಲಕ್ಷ ಡಾಲರ್‌ ಹಣ ವಿನಿಯೋಗಿಸಲಾಗುವುದು .

(ಯುಎನ್‌ಐ)