ಹೆಸರು ಸೂಚಿಸಿ, ಉಚಿತವಾಗಿ ತಿಮ್ಮಪ್ಪನ ದರ್ಶನ ಭಾಗ್ಯ ಗಿಟ್ಟಿಸಿ

ಬೆಂಗಳೂರು : ಇದನ್ನು ಸ್ಪರ್ಧೆ ಎಂದಾದರೂ ಅಂದುಕೊಳ್ಳಿ, ಅಥವಾ ನಿಮ್ಮ ಕಲ್ಪನಾ ವಿಲಾಸ ಗರಿಗೆದರಲು ಪಂಥಾಹ್ವಾನ ಅಂತಲಾದರೂ ಅಂದುಕೊಳ್ಳಿ. ಒಟ್ಟಿನಲ್ಲಿ ಪ್ರವಾಸೋದ್ಯಮ ಸಚಿವ ಆರ್‌.ರೋಷನ್‌ಬೇಗ್‌ ಅವರ ಕನಸಿನ ಕೂಸಿಗೊಂದು ಕುಲಾವಿ ಬೇಕಿದೆ.

ತಿರುಪತಿ ತಿಮ್ಮಪ್ಪನ ದರ್ಶನಕ್ಕಾಗಿ ರಾಜ್ಯದಿಂದ ತೆರಳುವ ಭಕ್ತರ ಅನುಕೂಲಕ್ಕಾಗಿ ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ ಸುಸಜ್ಜಿತ ಭವನವೊಂದನ್ನು ನಿರ್ಮಿಸುತ್ತಿದೆ. ನಾಲ್ಕು ಎಕರೆ ಪ್ರದೇಶದಲ್ಲಿ ಎದ್ದು ನಿಲ್ಲಲಿರುವ ಈ ಭವನಕ್ಕೊಂದು ಹೆಸರು ಬೇಕಾಗಿದೆ. ಮುದ್ದಾಗಿರಬೇಕು, ಚಿಕ್ಕದಾಗಿ- ಚೊಕ್ಕವಾಗಿ, ಅರ್ಥಪೂರ್ಣವಾಗಿರಬೇಕು.

ಸಚಿವರು ಮೆಚ್ಚುವ ಸೂಕ್ತ ಹೆಸರನ್ನು ಸೂಚಿಸಿದಲ್ಲಿ - ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ ನಿಮಗೆ ತಿರುಮಲಕ್ಕೆ ಉಚಿತ ಯೋಜಿತ ಪ್ರವಾಸದ ವ್ಯವಸ್ಥೆ ಮಾಡಲಿದೆ ಎಂದು ರೋಷನ್‌ಬೇಗ್‌ ತಿಳಿಸಿದ್ದಾರೆ. ಹೆಸರು ಹೊಳೆದಲ್ಲಿ ಜೂನ್‌ 27 ರೊಳಗೆ ರೋಷನ್‌ಬೇಗ್‌ ಅವರಿಗೆ ಪತ್ರದ ಮೂಲಕ ತಿಳಿಸಬಹುದು. ವಿಳಾಸ- ಆರ್‌. ರೋಷನ್‌ ಬೇಗ್‌, ಪ್ರವಾಸೋದ್ಯಮ ಹಾಗೂ ಹಜ್‌ ಸಚಿವರು, ಕರ್ನಾಟಕ ಸರ್ಕಾರ ಕೊಠಡಿ ಸಂಖ್ಯೆ 366 ಎ, 3 ನೇ ಮಹಡಿ, ವಿಧಾನಸೌಧ, ಬೆಂಗಳೂರು-1.

(ಇನ್ಫೋ ವಾರ್ತೆ)