ಕೆಆರ್‌ಎಸ್‌ಗೆ 10 ಅಡಿ ನೀರು, ನೀರಿನ ಮಟ್ಟ ಈಗ 84.50 ಅಡಿ

ಮೈಸೂರು : ಕಳೆದ ವಾರ ಕಾವೇರಿ ಜಲಾನಯನ ಪ್ರದೇಶದಲ್ಲಿ ಬಿದ್ದ ಮಳೆಯಿಂದಾಗಿ ಕೃಷ್ಣರಾಜ ಸಾಗರಕ್ಕೆ ಸುಮಾರು 10 ಅಡಿಗೂ ಹೆಚ್ಚು ನೀರು ಹರಿದುಬಂದಿದೆ. ಆದರೆ, ಈಗ ಮಳೆಯ ಪ್ರಮಾಣ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ಜಲಾಶಯಕ್ಕೆ ಹರಿದು ಬರುತ್ತಿದ್ದ ನೀರಿನ ಪ್ರಮಾಣವೂ ಗಣನೀಯವಾಗಿ ಕುಸಿದಿದೆ.

ಆದಾಗ್ಯೂ 124 ಅಡಿಗಳ ಗರಿಷ್ಠ ಮಟ್ಟದ ಜಲಾಶಯದಲ್ಲಿ ಇಂದು ನೀರಿನ ಮಟ್ಟ 84.50 ಅಡಿಗಳನ್ನು ತಲುಪಿದ್ದು, ಮೊನ್ನೆ ಮೊನ್ನೆಯ ತನಕ ಮತ್ತೆ ಗೋಚರಿಸಿದ್ದ ಕನ್ನಂಬಾಡಿಯ ವೇಣುಗೋಪಾಲ ಸ್ವಾಮಿ ದೇವಾಲಯ ನೀರಿನಲ್ಲಿ ಮುಳುಗಿದೆ.

ಕಳೆದ 10 ದಿನಗಳ ಅವಧಿಯಲ್ಲಿ ಭಾಗಮಂಡಲ ಪ್ರದೇಶದಲ್ಲಿ ಸುಮಾರು 10 ಸೆಂಟಿ. ಮೀಟರ್‌ನಷ್ಟು ಮಳೆ ಬಿದ್ದ ಹಿನ್ನೆಲೆಯಲ್ಲಿ ಜಲಾಶಯಕ್ಕೆ ಭಾರಿ ಪ್ರಮಾಣದಲ್ಲಿ ನೀರು ಹರಿದು ಬಂದಿದೆ. ಜೂನ್‌ 15ರಂದು ಜಲಾಶಯದಲ್ಲಿ ಕೇವಲ 73.10 ಅಡಿಗಳಷ್ಟು ನೀರಿತ್ತು.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...