ಪ.ನಾ.ಹಳ್ಳಿಯಲ್ಲಿ ರಾಜ್ಯದ ಭಾರೀ ‘ಸಾಮೂಹಿಕ ವಿವಾಹ ಮೇಳ’

ಶಿರಾ : ತಾಲ್ಲೂಕಿನ ಪಟ್ಟನಾಯಕನಹಳ್ಳಿಯಲ್ಲಿ ಭಾನುವಾರ (ಜೂನ್‌ 17) ಜರುಗಿದ ಉಚಿತ ಸಾಮೂಹಿಕ ವಿವಾಹ ಕಾರ್ಯಕ್ರಮ ಈ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಶ್ರೀ ಗುರುಗುಂಡ ಬ್ರಹ್ಮೇಶ್ವರ ಮಠ ಆಯೋಜಿಸಿದ್ದ ಈ ಕಾರ್ಯಕ್ರಮದಲ್ಲಿ 264 ಜೋಡಿಗಳು ಸತಿ ಪತಿಗಳಾದರು. ಈ ಮುಂಚಿನ ದಾಖಲೆ 255 ಜೋಡಿಗಳದು ಎಂದು ಮಠದ ಮೂಲಗಳು ತಿಳಿಸಿವೆ.

ಭಾರೀ ಪ್ರಮಾಣದ ಈ ಸಾಮೂಹಿಕ ವಿವಾಹ ಕಾರ್ಯಕ್ರಮ ಜರುಗಿದ್ದು ಗುರುಗುಂಡ ಮಠದ ಶ್ರೀ ನಂಜಾವಧೂತ ಸ್ವಾಮೀಜಿಯವರ ದಶಮಾನೋತ್ಸವದ ಅಂಗವಾಗಿ. ದಶಮಾನೋತ್ಸವ ಕಾರ್ಯಕ್ರಮವನ್ನು ಉದ್ಘಾಟಿಸಿದ ರಾಜ್ಯಪಾಲರಾದ ವಿ.ಎಸ್‌. ರಮಾದೇವಿ- ರಾಷ್ಟ್ರದ ಪ್ರಗತಿ ಪಥದಲ್ಲಿ ಮಠಗಳ ಪಾತ್ರ ದೊಡ್ಡದು ಎಂದು ಬಣ್ಣಿಸಿದರು.

ಸಾಮಾಜಿಕ ಕಳಕಳಿ ಹಾಗೂ ಧಾರ್ಮಿಕ ಜಾಗೃತಿಗೆ ಹೆಸರಾದ ಪ.ನಾ.ಹಳ್ಳಿ ಶ್ರೀಮಠ, ಗ್ರಾಮೀಣ ಮಟ್ಟದಲ್ಲಿ ಶೈಕ್ಷಣಿಕ ಬೆಳವಣಿಗೆಯತ್ತ ಸಾಗುತ್ತಿದೆ. ಈ ಪರಂಪರೆ ಉಳಿದ ಮಠಗಳಗೂ ಮಾದರಿಯಾಗಲಿ ಎಂದು ರಮಾದೇವಿ ಆಶಿಸಿದರು. ಇತರ ರಾಜಕಾರಣಿಗಳಂತೆ ತಾವು ಭರವಸೆ ನೀಡುವುದಿಲ್ಲವೆಂದು ಸ್ಪಷ್ಟಪಡಿಸಿದ ಅವರು, ಶ್ರೀ ಕ್ಷೇತ್ರಕ್ಕೆ 10 ಸಾವಿರ ರುಪಾಯಿ ಕೊಡುಗೆ ನೀಡಿದರು.

ಸ್ವಾಮೀಜಿಗಳ ಚಟುವಟಿಕೆ ಸಾಫ್ಟ್‌ವೇರ್‌ ಇದ್ದಂತೆ
ಸೇತುವೆ, ರಸ್ತೆ , ಕಟ್ಟಡ ನಿರ್ಮಾಣದಂಥ ಕಾಮಗಾರಿಗಳಲ್ಲಿ ತೊಡಗುವ ಸರ್ಕಾರದ ಚಟುವಚಿಕೆ ಹಾರ್ಡ್‌ವೇರ್‌ನಂತಾದರೆ, ದೇಶದಲ್ಲಿ ಸಂಸ್ಕೃತಿಯನ್ನು ಕಾಯುವ ಸ್ವಾಮೀಜಿಗಳ ಚಟುವಟಿಕೆ ಸಾಫ್ಟ್‌ವೇರ್‌ ಇದ್ದಂತೆ ಎಂದು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಕೇಂದ್ರ ಸಂಸ್ಕೃತಿ ಖಾತೆ ಸಚಿವ ಅನಂತಕುಮಾರ್‌ ಬಣ್ಣಿಸಿದರು.

ತಂದೆಯ ಹೆಸರಿನಲ್ಲಿ 10 ತಿಂಗಳೊಳಗೆ ಶ್ರೀಕ್ಷೇತ್ರದಲ್ಲಿ 15 ಲಕ್ಷ ರುಪಾಯಿಗಳ ವೆಚ್ಚದಲ್ಲಿ ಪ್ರಾರ್ಥನಾ ಮಂದಿರವನ್ನು ನಿರ್ಮಿಸಿಕೊಡುವುದಾಗಿ ಉನ್ನತ ಶಿಕ್ಷಣ ಸಚಿವ ಡಾ.ಜಿ. ಪರಮೇಶ್ವರ್‌ ಹೇಳಿದರು. ಕಳೆದ 50 ವರ್ಷಗಳಲ್ಲಿ ಕಾಡು, ಹಸಿರು ಮಾತ್ರವಲ್ಲದೆ ದೇಶದ ಯುವಜನತೆಯ ಮನಸ್ಸನ್ನೂ ರಾಜಕಾರಣಿಗಳು ಹಾಳು ಮಾಡಿದ್ದಾರೆ. ಇಂಥಾ ಸಂದರ್ಭದಲ್ಲಿ ಆಸಮಾನತೆಯನ್ನು ತೊಲಗಿಸುವ ಕಾರ್ಯ ಸ್ವಾಮೀಜಿಗಳಿಂದ ನಡೆಯುತ್ತಿದೆ ಎಂದು ಪರಮೇಶ್ವರ್‌ ಹೇಳಿದರು.

ಆದಿಚುಂಚನಗಿರಿಯ ಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿ ದಶಮಾನೋತ್ಸವ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿದ್ದರು. ಕೃಷಿ ಸಚಿವ ಟಿ.ಬಿ.ಜಯಚಂದ್ರ, ಶಾಸಕ ಪಿ.ಎಂ.ರಂಗನಾಥಪ್ಪ , ಸಂಸದ ಜಿ.ಎಸ್‌.ಬಸವರಾಜು ಸೇರಿದಂತೆ ವಿವಿಧ ರಾಜಕೀಯ ಗಣ್ಯರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಇದೇ ಸಂದರ್ಭದಲ್ಲಿ ಶ್ರೀಮಠ ನಿರ್ಮಿಸಿರುವ ಗಣಕಕೇಂದ್ರವನ್ನು ಉದ್ಘಾಟಿಸಲಾಯಿತು ಹಾಗೂ ವಿವಿಧ ಕ್ಷೇತ್ರಗಳಲ್ಲಿ ದುಡಿದ ಗಣ್ಯರನ್ನು ಸನ್ಮಾನಿಸಲಾಯಿತು.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...