‘ಉಮಾಲಿಯಾ-5’ ಬಾರ್ಜ್‌ನಿಂದ ಸಮುದ್ರಸೇರದ ಮಳೆ ನೀರು

ಪಡುಬಿದ್ರಿ : ಅತ್ತ ಕಡಲು ಕೊರೆತದ ಭಯವಿದ್ದರೆ, ಇತ್ತ ಕೂಲಿಂಗ್‌ ಪ್ಲಾಂಟ್‌ ಬಾರ್ಜ್‌ ಸಮುದ್ರ ದಂಡೆಯಲ್ಲಿ ಠಿಕಾಣಿ ಹೂಡಿದ್ದು, ಪಡುಬಿದ್ರಿಯ ರೈತರನ್ನು ಇಕ್ಕಳದಲ್ಲಿ ಅರೆಯುತ್ತಿದೆ.

ಕಳೆದ ತಿಂಗಳ 23ರಂದು ಯೂವುದೇ ಪೂರ್ವ ಸೂಚನೆ ಇಲ್ಲದೆ ಅನಿರೀಕ್ಷಿತವಾಗಿ ಸಮುದ್ರ ದಂಡೆಗೆ ಬಂದು ತಂಗಿರುವ ಸುಮಾರು 12 ಕೋಟಿ ರೂಪಾಯಿ ಮೌಲ್ಯದ ಕೂಲಿಂಗ್‌ ಪ್ಲಾಂಟ್‌ ‘ಉಮಾಲಿಯಾ- 5’ ಬಾರ್ಜ್‌, ಮಳೆ ನೀರನ್ನು ಸಮುದ್ರಕ್ಕೆ ಸೇರಲು ಬಿಡುತ್ತಿಲ್ಲ . ಇದರಿಂದ ಪಡುಬಿದ್ರಿಯ ಭತ್ತದ ಗದ್ದೆಗಳು ಮಳೆ ಹೆಚ್ಚಾದಂತೆಲ್ಲಾ ನೀರು ತುಂಬಿಕೊಳ್ಳುತ್ತಿವೆ.

ಮಳೆಗಾಲ ಇನ್ನೂ ಆರಂಭದ ಹಂತದಲ್ಲಿ ಇರುವುದರಿಂದ ಸಮಸ್ಯೆ ಇನ್ನೂ ಗಂಭೀರವಾಗಿಲ್ಲ . ಆದರೆ ಮುಂಬೈ ಸೇರಬೇಕಿದ್ದ ಬಾರ್ಜ್‌ ಸಮುದ್ರ ದಡ ಸೇರಿ 23 ದಿನಗಳಾದರೂ ಅಲ್ಲಿಂದ ಕದಲದೇ ಇರುವುದರಿಂದ ಗ್ರಾಮಸ್ಥರು ಆತಂಕಕ್ಕೆ ಒಳಗಾಗಿದ್ದಾರೆ.

ಯಂತ್ರಾಗಾರದ ಸಾಗಾಣಿಕೆ ಹೊಣೆ ಹೊತ್ತಿರುವ ರೇಷಮ್‌ ಸಿಂಘ್‌ ಕಂಪೆನಿ ವಕ್ತಾರ ಕ್ಯಾಪ್ಟನ್‌ ಸವಾರಾ ಪ್ರಕಾರ, ಬಾರ್ಜ್‌ನ್ನು ಒಂದು ವಾರದ ಹಿಂದೆಯೇ ಟಗ್‌ ಮೂಲಕ ಎಳೆಯ ಬೇಕಿತ್ತು. ಆದರೆ ಬಾರ್ಜ್‌ನ್ನು ಅಲ್ಲಿಂದ ಸ್ಥಳಾಂತರಿಸುವ ಕುರಿತು ಯಾವುದೇ ಕೆಲಸ ನಡೆಯುತ್ತಿಲ್ಲ.

ಈ ನಡುವೆ ಪಡುಬಿದ್ರಿಯಲ್ಲಿ ಒನಕೆ ಧಾರೆ ಸುರಿಯುತ್ತಿದೆ. ಗಾಳಿ ಮಳೆಯಿಂದಾಗಿ ಪಡುಬಿದ್ರಿ ಕಂಚಿನಡ್ಕದ ಶಕುಂತಳಾ ಎಂಬುವರ ಮನೆ ಕುಸಿದು ಬಿದ್ದಿದೆ. ಇಕ್ಬಾಲ್‌ ಎಂಬುವರ ಮನೆ ಮೇಲೆ ಮರದ ಕೊಂಬೆ ಮುರಿದು ಬಿದ್ದಿದೆ.

(ಇನ್ಫೋ ವಾರ್ತೆ)