‘ಗಾಂಧೀಜಿ ಮೇಜಿನ ಮಂಗಗಳಾಗುವುದು ಬೇಡ’- ಬೇಲಿಮಠ ಸ್ವಾಮೀಜಿ

ಬೆಂಗಳೂರು : ಮಹಾತ್ಮಗಾಂಧಿಯವರ ಮೇಜಿನ ಮೇಲಿನ ಮಂಗಗಳಂತೆ ಎಲ್ಲ ಅನ್ಯಾಯವನ್ನು ಸಹಿಸಿಕೊಳ್ಳದೆ, ಪ್ರತಿಭಟಿಸುವ ಗುಣ ರೂಢಿಸಿಕೊಳ್ಳಬೇಕೆಂದು ಬೇಲಿಮಠದ ಶ್ರೀ ಶಿವರುದ್ರ ಸ್ವಾಮೀಜಿ ಹೇಳಿದ್ದಾರೆ.

ಸೌಜನ್ಯ, ಸಜ್ಜನಿಕೆ, ಕರುಣೆಗಳ ಗುತ್ತಿಗೆ ತೆಗೆದುಕೊಂಡವರಂತೆ ಕನ್ನಡಿಗರು ವರ್ತಿಸುತ್ತಿದ್ದಾರೆ. ಫೀಡರ್‌ ಕಾಲುವೆ ನೀರನ್ನು ಆಂಧ್ರದವರು ಕಬಳಿಸಲು ಪ್ರಯತ್ನಿಸುತ್ತಿರುವಾಗ ನಾವು ಕೋರ್ಟಿನತ್ತ ನೋಡುತ್ತಿದ್ದೇವೆ. ರಾಜ್ಯದ ಪಾಲಿನ ನೀರನ್ನು ಉಳಿಸಿಕೊಳ್ಳಲು ಕನ್ನಡಿಗರೂ ಫೀಡರ್‌ ಕಾಲುವೆ ತೋಡಬೇಕು ಎಂದು ಸ್ವಾಮೀಜಿ ಕರೆ ನೀಡಿದರು. ಭಾನುವಾರ ಕಾವೇರಿ ಭವನ ಸಭಾಂಗಣದಲ್ಲಿ ಜರುಗಿದ ಚಿಕ್ಕಪೇಟೆ ವಿಧಾನಸಭಾ ಕ್ಷೇತ್ರದ ಪ್ರಥಮ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಅವರು ಮಾತನಾಡುತ್ತಿದ್ದರು.

ಕಾನೂನಿನಿಂದ ಸಾಧ್ಯವಾಗದಿದ್ದಾಗ ಪರ್ಯಾಯ ಮಾರ್ಗ ಹುಡುಕಿಕೊಳ್ಳುವುದು ಅನಿವಾರ್ಯ. ಏಟಿಗೆ ಪ್ರತಿಯೇಟು ನೀಡಿದರೆ ಯಾರೂ ಕನ್ನಡದ ನೆಲ, ಜಲದ ತಂಟೆಗೆ ಬರುವುದಿಲ್ಲ . ನಾವೂ ಫೀಡರ್‌ ಕಾಲುವೆ ನಿರ್ಮಿಸಿದರೆ ಅವರಾಗಿಯೇ ಸಂಧಾನಕ್ಕೆ ಬರುತ್ತಾರೆ ಎಂದು ಸ್ವಾಮೀಜಿ ಹೇಳಿದರು. ಕನ್ನಡಿಗರು ತಕ್ಷಣ ಎಚ್ಚತ್ತುಕೊಂಡರೆ ನೆಲ, ಜಲದ ರಕ್ಷಣೆ ಸಾಧ್ಯವಾಗುತ್ತದೆ ಎಂದು ಅಭಿಪ್ರಾಯಪಟ್ಟ ಸ್ವಾಮೀಜಿ, ಕಾರ್ಖಾನೆಗಳಲ್ಲಿ ಕನ್ನಡಿಗರಿಗೆ ಉದ್ಯೋಗ ನೀಡಬೇಕೆಂದು ಆಗ್ರಹಿಸಿದರು.

(ಇನ್ಫೋ ವಾರ್ತೆ)