ಅಮೆರಿಕ ದೂತಾವಾಸ ಸ್ಫೋಟ ಸಂಚು : ಮತ್ತೊಬ್ಬನ ಬಂಧನ

ನವದೆಹಲಿ : ಇಲ್ಲಿನ ಅಮೆರಿಕ ರಾಯಭಾರಿ ಕಚೇರಿಯನ್ನು ಸ್ಫೋಟಿಸಲು ಸಂಚು ನಡೆಸಿದ್ದ ಮತ್ತೊಬ್ಬ ಆರೋಪಿಯನ್ನು ಶನಿವಾರ ರಾತ್ರಿ ಬಂಧಿಸಲಾಗಿದೆ. ಅಂತಾರಾಷ್ಟ್ರೀಯ ಭಯೋತ್ಪಾದನೆಯ ರೂವಾರಿ ಒಸಾಮಾ ಬಿನ್‌ ಲಾಡೆನ್‌ ನಿಕಟವರ್ತಿ ಎಂದು ಶಂಕಿಸಲಾಗಿರುವ ಸುಡಾನ್‌ ನಿವಾಸಿ ಹಾಗೂ ಆತನ ಮತ್ತೊಬ್ಬ ಸಹಚರನನ್ನು ಶುಕ್ರವಾರ ದೆಹಲಿ ಪೊಲೀಸರು ಬಂಧಿಸಿದ್ದರು.

ಸುಡಾನ್‌ ಪೌರ ಅಬ್ದುಲ್‌ ರವೂಪ್‌ ಹವಶ್‌ ಹಾಗೂ ಆತನ ಭಾರತೀಯ ಸಹಚರ ಶಮೀಮ್‌ ಸರ್ವಾರ್‌ನನ್ನು ದಕ್ಷಿಣ ದೆಹಲಿಯ ನಿಜಾಮುದ್ದೀನ್‌ ಪ್ರದೇಶದಲ್ಲಿ ಶುಕ್ರವಾರ ಬಂಧಿಸಲಾಗಿತ್ತು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಬ್ಬಾಸ್‌ ಎಂಬ ಮತ್ತೊಬ್ಬನನ್ನು ರಾಜಾಸ್ಥಾನದ ಉದಯಪುರ್‌ ಪ್ರದೇಶದಲ್ಲಿ ಶನಿವಾರ ರಾತ್ರಿ ಬಂಧಿಸಲಾಗಿದೆ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಶುಕ್ರವಾರ ರಾತ್ರಿ ಬಂಧಿಸಲಾದ ಆರೋಪಿಗಳನ್ನು ಪೊಲೀಸರು, ಮೆಟ್ರೋ ಪಾಲಿಟಿನ್‌ ಮ್ಯಾಜಿಸ್ಟ್ರೇಟ್‌ ವಿನೋದ್‌ ಕುಮಾರ್‌ ಅವರ ಸಮ್ಮುಖದಲ್ಲಿ ಶನಿವಾರ ಹಾಜರುಪಡಿಸಿದ್ದರು. ಈ ಇಬ್ಬರು ಆರೋಪಿಗಳನ್ನು ಜೂನ್‌ 26ರ ವರೆಗೆ ಪೊಲೀಸ್‌ ಕಸ್ಟಡಿಗೆ ಒಪ್ಪಿಸಲಾಗಿದೆ. ಆರೋಪಿಗಳಿಂದ 6 ಕೆ.ಜಿ. ಆರ್‌ಡಿಎಕ್ಸ್‌ ಮತ್ತು ಐಇಡಿಯನ್ನು ವಶಪಡಿಸಿಕೊಳ್ಳಲಾಗಿದೆ.