ಜುಲೈ 9, ಪಾಕ್‌ ಮಿಲಿಟರಿ ಅಧಿಕಾರಿ ಮುಷರ್ರಫ್‌ ದೆಹಲಿಗೆ-ಜಂಗ್‌

ಇಸ್ಲಮಾಬಾದ್‌ : ಪಾಕಿಸ್ತಾನದ ಮಿಲಿಟರಿ ಅಧಿಕಾರಿ ಜನರಲ್‌ ಪರ್ವೇಜ್‌ ಮುಷರ್ರಫ್‌ ಅವರು ಭಾರತದ ಪ್ರಧಾನಿ ವಾಜಪೇಯಿ ಅವರೊಂದಿಗಿನ ಉನ್ನತ ಮಟ್ಟದ ಮಾತುಕತೆಗಳ ಹಿನ್ನೆಲೆಯಲ್ಲಿ ಜುಲೈ 9 ರಿಂದ ಮೂರು ದಿನಗಳ ಭಾರತ ಪ್ರವಾಸ ಕೈಗೊಳ್ಳುವರು ಎಂದು ಪಾಕಿಸ್ತಾನದ ಉರ್ದು ದೈನಿಕ್‌ ‘ಜಂಗ್‌’ ವರದಿ ಮಾಡಿದೆ.

ಉನ್ನತ ಮೂಲಗಳನ್ನುದ್ದೇಶಿಸಿ ವರದಿಯನ್ನು ಪ್ರಕಟಿಸಿರುವ ಜಂಗ್‌, ಜನರಲ್‌ ಮುಷರ್ರಫ್‌ ಅವರ ಭೇಟಿಯ ದಿನಾಂಕ ನಿಗದಿಯಾಗಿದೆ. ಈ ದಿನಾಂಕಗಳ ಬಗ್ಗೆ ಒಪ್ಪಿಗೆಗೆ ಭಾರತದ ಪ್ರತಿಕ್ರಿಯೆಗೆ ಕಾಯಲಾಗುತ್ತಿದೆ. ಭಾರತದ ಪ್ರತಿಕ್ರಿಯೆಯ ನಂತರವಷ್ಟೇ ಇಸ್ಲಮಾಬಾದ್‌ ಹಾಗೂ ದೆಹಲಿಯಿಂದ ಅಧಿಕೃತ ಪ್ರಕಟಣೆ ಹೊರಬೀಳಲಿದೆ ಎಂದು ಜಂಗ್‌ ವರದಿ ತಿಳಿಸಿದೆ.

ಆದರೆ, ಇಸ್ಲಮಾಬಾದ್‌ನಲ್ಲಿನ ಭಾರತೀಯ ರಾಯಭಾರಿ ಕಚೇರಿಯ ವಕ್ತಾರರೊಬ್ಬರು ಹೇಳುವಂತೆ-ಭೇಟಿಯ ದಿನಾಂಕದ ತೀರ್ಮಾನ ಇನ್ನೂ ನಡೆಯುತ್ತಿದೆ. ಈ ಬಗ್ಗೆ ನವದೆಹಲಿ ಹಾಗೂ ಇಸ್ಲಮಾಬಾದ್‌ಗಳಿಂದ ಏಕ ಕಾಲದಲ್ಲಿ ಪ್ರಕಟಣೆ ಹೊರಬೀಳಲಿದೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ಪಾಕಿಸ್ತಾನದ ಅಧಿಕಾರಿಗಳು ಲಭ್ಯರಾಗಿಲ್ಲ .

ಜಂಗ್‌ ತಿಳಿಸಿರುವ ಪ್ರಕಾರ- ಮುಷರ್ರಫ್‌ ಅವರು ಎರಡು ರಾತ್ರಿ ಹಾಗೂ ಮೂರು ಹಗಲುಗಳನ್ನು ದೆಹಲಿಯಲ್ಲಿ ಕಳೆಯುವರು. ಈ ನಡುವೆ ಮುಷರ್ರಫ್‌ ಅವರ ಉದ್ದೇಶಿತ ಭೇಟಿಯ ವಿವರಗಳನ್ನು ಅಂತಿಮಗೊಳಿಸಲು ಯಾವುದೇ ಭಾರತೀಯ ನಿಯೋಗ ಪಾಕಿಸ್ತಾನಕ್ಕೆ ತೆರಳುವುದಿಲ್ಲ ಎಂದು ಇಸ್ಲಮಾಬಾದ್‌ನಲ್ಲಿನ ಭಾರತೀಯ ರಾಯಭಾರಿ ಸುಧೀರ್‌ ವ್ಯಾಸ್‌ ಹೇಳಿದ್ದಾರೆ.

(ಏಜೆನ್ಸೀಸ್‌)