ಕೋಲ್ಕತಾ ಎಂಜಿನಿಯರಿಂಗ್‌ ಕಾಲೇಜ್‌- ಹಾರ್ವರ್ಡ್‌ ವಿವಿ ಬೆಸುಗೆ

* ಕ್ರಿತ್ತಿವಾಸ್‌ ಮುಖರ್ಜಿ

ಕೋಲ್ಕತ : ನಗರದಲ್ಲಿ ಅನಿವಾಸಿ ಭಾರತೀಯರು ನಡೆಸುತ್ತಿರುವ ಖಾಸಗಿ ಎಂಜಿನಿಯರಿಂಗ್‌ ಕಾಲೇಜಿನೊಟ್ಟಿಗೆ ಹಾರ್ವರ್ಡ್‌ ವಿಶ್ವವಿದ್ಯಾಲಯ ಶೈಕ್ಷಣಿಕ ಒಪ್ಪಂದ ಮಾಡಿಕೊಳ್ಳಲಿದೆ.

ಶೈಕ್ಷಣಿಕ ಕೊಡು-ಕೊಳ್ಳುವಿಕೆ ಬಗ್ಗೆ ಹಾರ್ವರ್ಡ್‌ ವಿಶ್ವವಿದ್ಯಾಲಯದ ಅಧಿಕಾರಿಗಳ ಜೊತೆ ಮಾತುಕತೆ ನಡೆಸಿದ್ದೇವೆ. ಅದು ಖಂಡಿತ ಫಲದಾಯಕವಾಗಲಿದೆ ಎಂಬ ಭರವಸೆ ನಮ್ಮದು ಎನ್ನುತ್ತಾರೆ ಪಶ್ಚಿಮ ಬಂಗಾಳದ ಪ್ರಥಮ ಖಾಸಗಿ ಎಂಜಿನಿಯರಿಂಗ್‌ ಕಾಲೇಜು, ಇನ್ಸ್‌ಟಿಟ್ಯೂಟ್‌ ಆಫ್‌ ಎಂಜಿನಿಯರಿಂಗ್‌ ಅಂಡ್‌ ಮ್ಯಾನೇಜ್‌ಮೆಂಟ್‌ (ಐಇಎಂ) ನ ವ್ಯವಸ್ಥಾಪಕ ನಿರ್ದೇಶಕ ಸತ್ಯಜಿತ್‌ ಚಕ್ರವರ್ತಿ.

ಇನ್ನು ಎರಡು ತಿಂಗಳಲ್ಲಿ ಒಡಂಬಡಿಕೆ ಜಾರಿಗೆ ಬರುವ ನಿರೀಕ್ಷೆಯಿದೆ. ಒಪ್ಪಂದದಿಂದ ಮೊದಲು ಸಂಶೋಧಕ- ಬೋಧಕರ ವಿನಿಮಯ ಸಾಧ್ಯವಾಗಲಿದೆ. ತದ ನಂತರ, ಎರಡನೇ ಹಂತದಲ್ಲಿ ಅಧ್ಯಾಪಕರ ವಿನಿಮಯ ಕಾರ್ಯಕ್ರಮ ಜಾರಿಗೆ ಬರಲಿದೆ. ಮೂರನೇ ಹಂತದಲ್ಲಿ ಹಾರ್ವಡ್‌ ವಿವಿ ಹಾಗೂ ಕೋಲ್ಕತಾ ಕಾಲೇಜಿನ ವಿದ್ಯಾರ್ಥಿಗಳ ನಡುವೆ ವಿಚಾರ ವಿನಿಮಯ ಸಾಧ್ಯವಾಗಲಿದೆ ಎಂದು ಚಕ್ರವರ್ತಿ ವಿವರಿಸಿದರು.

ಅಂದಹಾಗೆ, ಹಾರ್ವರ್ಡ್‌ ವಿಶ್ವವಿದ್ಯಾಲಯದೊಟ್ಟಿಗೆ ಸಂಬಂಧ ಬೆಳೆಸಹೊರಟಿರುವ ಭಾರತದ ಮೊದಲ ಸಂಸ್ಥೆ ಇದಾಗಿದೆ.

(ಐಎಎನ್‌ಎಸ್‌)