ಎಂ.ಪಿ.ಹುಸೇನ್‌ ಸೂಪರ್‌ ಟ್ಯಾಂಕರ್‌ಮುಳುಗಡೆ, 4 ಸಾವು ?

(ಮಂಗಳೂರು ಪ್ರತಿನಿಧಿಯಿಂದ)

ಮಂಗಳೂರು : ಇಲ್ಲಿಗೆ 380 ನಾಟಿಕಲ್‌ ಮೈಲ್‌ ದೂರದಲ್ಲಿ ಹಡಗೊಂದು ಸಮುದ್ರದಲ್ಲಿ ಮುಳುಗಿ ಕನಿಷ್ಠ 4 ಮಂದಿ ಜಲ ಸಮಾಧಿಯಾಗಿದ್ದಾರೆಂದು ಶಂಕಿಸಲಾಗಿದೆ.

ಸಿಂಗಾಪುರದಿಂದ ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ನ ಫ್ಯುಜಿಯಾಪುರಕ್ಕೆ ಹೊರಟಿದ್ದ ಎಂ.ಪಿ.ಹುಸೇನ್‌ ಸೂಪರ್‌ ಟ್ಯಾಂಕರ್‌ ಮಂಗಳವಾರ ರಾತ್ರಿ 11 ಗಂಟೆ 15 ನಿಮಿಷಕ್ಕೆ ಆಳ ಸಮುದ್ರದಲ್ಲಿ ಮುಳುಗಿತು ಎಂದು ನವ ಮಂಗಳೂರು ಬಂದರು ಮಂಡಳಿ ಟ್ರಾಫಿಕ್‌ ಮೇನೇಜರ್‌ ರೇವಣ್ಕರ್‌ ಇಂಡಿಯಾಇನ್ಫೋಗೆ ತಿಳಿಸಿದ್ದಾರೆ.

ಮುಳುಗಿರುವ ಹಡಗು ಯಾವುದೇ ಸರಕು ಕೊಂಡೊಯ್ಯುತ್ತಿರಲಿಲ್ಲ . ಗೋವಾಕ್ಕೆ 290 ನಾಟಿಕಲ್‌ ಮೈಲ್‌ ದೂರದಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಹಡಗಿನಲ್ಲಿ 42 ಸಿಬ್ಬಂದಿಯಿದ್ದು , 38 ಮಂದಿಯನ್ನು ಕರಾವಳಿ ತಟ ರಕ್ಷಣಾ ಪಡೆ ರಕ್ಷಿಸಿದೆ ಎಂದು ರಕ್ಷಣಾ ಪಡೆಯ ಮೂಲಗಳು ತಿಳಿಸಿವೆ. ಕರಾವಳಿ ತಟ ರಕ್ಷಣಾ ಪಡೆಯ ಮುಂಬಯಿ ಕೇಂದ್ರದಡಿ ಪರಿಹಾರ ಕಾರ್ಯಗಳು ಸಾಗುತ್ತಿದ್ದು , ಕಣ್ಮರೆಯಾಗಿರುವ ನಾಲ್ವರು ಜಲ ಸಮಾಧಿಯಾಗಿರಬೇಕೆಂದು ಶಂಕಿಸಲಾಗಿದೆ.

ಹಡಗು ಮುಳುಗಲು ಸ್ಫೋಟ ಕಾರಣವೆಂದು ಪ್ರಾಥಮಿಕ ವರದಿಗಳು ಹೇಳಿದ್ದರೂ, ದುರಂತಕ್ಕೆ ಕಾರಣವಾದ ಅಧಿಕೃತ ಮಾಹಿತಿ ಇದುವರೆಗೂ ಬಂದಿಲ್ಲ .