ಆಸ್ಪತ್ರೆಯಲ್ಲಿಯೇ ಮುಖ್ಯ ದಾಖಲೆಗಳ ಪರಿಶೀಲಿಸುತ್ತಿರುವ ವಾಜಪೇಯಿ

ಮುಂಬಯಿ : ಬಲ ಮಂಡಿ ಶಸ್ತ್ರ ಚಿಕಿತ್ಸೆ ನಡೆದು ಐದು ದಿನಗಳು ಕಳೆದಿದ್ದು, ಪ್ರಧಾನಿ ವಾಜಪೇಯಿ ತ್ವರಿತಗತಿಯಲ್ಲಿ ಚೇತರಿಸಿಕೊಳ್ಳುತ್ತಿದ್ದಾರೆ. ಆಡಳಿತಕ್ಕೆ ಸಂಬಂಧಿಸಿದ ಬಹಳ ಮುಖ್ಯ ಫೈಲುಗಳನ್ನು ಪ್ರಧಾನಿ ಪರಿಶೀಲಿಸುತ್ತಿದ್ದಾರೆಂದು ಬ್ರೀಚ್‌ಕ್ಯಾಂಡಿ ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಪ್ರಧಾನಿ ಆರೋಗ್ಯವಾಗಿದ್ದಾರೆ. ನಿರೀಕ್ಷೆಯ ಮಟ್ಟಕ್ಕೆ ವಾಜಪೇಯಿ ಚೇತರಿಸಿಕೊಳ್ಳುತ್ತಿರುವ ಬಗೆಗೆ ಅವರಿಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯ ವೃಂದ ತೃಪ್ತಿ ವ್ಯಕ್ತಪಡಿಸಿದೆ ಎಂದು ಭಾರತೀಯ ಜನತಾ ಪಕ್ಷದ ಸ್ಥಳೀಯ ಶಾಸಕ ಮನ್‌ಗಲ್‌ ಪ್ರಭಾತ್‌ ಲೋಧಾ ಮಂಗಳವಾರ ಹೇಳಿದ್ದಾರೆ.

ವಾಕರ್‌ ಸಹಾಯದಿಂದ ಪ್ರಧಾನಿ ಕೆಲ ಹೆಜ್ಜೆಗಳನ್ನು ಹಾಕುತ್ತಿದ್ದಾರೆ ಹಾಗೂ ಕೆಲವು ಪ್ರಮುಖ ದಾಖಲೆಗಳನ್ನು ಪರಿಶೀಲಿಸಲು ಕೆಲವು ಹೊತ್ತು ಕೂರುತ್ತಿದ್ದಾರೆ ಎಂದು ಲೋಧಾ ತಿಳಿಸಿದ್ದಾರೆ.

(ಯುಎನ್‌ಐ)