ಮಂಗಳೂರು ಮೇಯರ್‌ ಪೀಠಕ್ಕೆ ಕಾಂಗ್ರೆಸ್‌ನ ಅಬ್ದುಲ್‌ ಅಜೀಜ್‌

(ಮಂಗಳೂರು ಪ್ರತಿನಿಧಿಯಿಂದ)

ಮಂಗಳೂರು : ಮಂಗಳೂರಿನ 16ನೇ ಮೇಯರ್‌ ಆಗಿ ಅಬ್ದುಲ್‌ ಅಜೀಜ್‌ ಹಾಗೂ ಉಪ ಮೇಯರ್‌ ಆಗಿ ಲ್ಯಾನ್ಸಿ ಪಿಂಟೋ ಮಂಗಳವಾರ ನಡೆದ ಚುನಾವಣೆಯಲ್ಲಿ ಆಯ್ಕೆಯಾಗಿದ್ದಾರೆ.

ಜಿಲ್ಲಾ ಕಾಂಗ್ರೆಸ್‌ ಸದಸ್ಯರ ಒಳಜಗಳದಿಂದಾಗಿ ಮೇಯರ್‌ ಆಯ್ಕೆ ಪ್ರಶ್ನೆ ಕೆಲದಿನಗಳಿಂದ ಕಗ್ಗಂಟಾಗಿಯೇ ಉಳಿದಿತ್ತು. ಮಂಗಳವಾರ ಕೈ ಎತ್ತುವ ಮೂಲಕ ನಡೆದ ಆಯ್ಕೆಯಲ್ಲಿ ಅಬ್ದುಲ್‌ ಅಜೀಜ್‌ 38 ಮತಗಳನ್ನು ಪಡೆದರು. ಎದುರಾಳಿ ಬಿಜೆಪಿಯ ನಾರಾಯಣ ಶೆಟ್ಟಿ ಅವರು 14 ಮತಗಳ ಅಂತರದಿಂದ ಸೋಲನುಭವಿಸಿದರು.

ಮಂಗಳೂರು ಮಹಾ ನಗರ ಪಾಲಿಕೆ 60 ಸದಸ್ಯ ಬಲವನ್ನು ಹೊಂದಿದ್ದು , ಮೇಯರ್‌ ಹಾಗೂ ಉಪಮೇಯರ್‌ ಸ್ಥಾನದೊಂದಿಗೆ ಪಾಲಿಕೆಯಲ್ಲಿ 33 ಸದಸ್ಯರನ್ನು ಹೊಂದಿರುವ ಕಾಂಗ್ರೆಸ್‌ ತನ್ನ ಬಲ ವೃದ್ಧಿಸಿಕೊಂಡಿದೆ. ಪದವಿನಂಗಡಿ ಶಕ್ತಿ ನಗರ ವಾರ್ಡನ್ನು ಪ್ರತಿನಿಧಿಸುವ ಅಬ್ದುಲ್‌ ಅಜೀಜ್‌ ಮುಸ್ಲಿಂ ಸಮುದಾಯದ ಎರಡನೇ ಮೇಯರ್‌. ಉಪ ಮೇಯರ್‌ ಲ್ಯಾನ್ಸಿ ಪಿಂಟೋ ಬಿಜೈ ವಾರ್ಡನ್ನು ಪ್ರತಿನಿಧಿಸುತ್ತಾರೆ.

ಆಯ್ಕೆ ಪ್ರಕ್ರಿಯೆಯ ನಂತರ ಇಂಡಿಯಾ ಇನ್ಫೋದೊಂದಿಗೆ ಮಾತನಾಡಿದ ಮೇಯರ್‌ ಅಬ್ದುಲ್‌ ಅಜೀಜ್‌, ಮೇಯರ್‌ ಆಗಿ ಆಯ್ಕೆಯಾಗಿರುವುದಕ್ಕೆ ಖುಷಿಯಾಗಿದೆ. ಮಂಗಳೂರು ನಗರ ಪಾಲಿಕೆಗೆ ಈಗಾಗಲೇ ಒಳ್ಳೆಯ ಹೆಸರಿದ್ದು , ಅದನ್ನು ಉಳಿಸಿ ಬೆಳಸಲು ಶ್ರಮಿಸುವುದಲ್ಲದೆ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ನಗರದ ಸರ್ವಾಂಗೀಣ ಅಭಿವೃದ್ಧಿಗೆ ಯತ್ನಿಸುವುದಾಗಿ ಹೇಳಿದರು.

ಮುಖಪುಟ / ಇವತ್ತು... ಈ ಹೊತ್ತು...