‘ನಕಲಿ ಹಾವಳಿ ತಡೆಗೆ ಶೀಘ್ರವೇ ಡಿಜಿಟಲ್‌ ಪಾಸ್‌ಪೋರ್ಟ್‌ ವ್ಯವಸ್ಥೆ’

ಬೆಂಗಳೂರು: ನಕಲಿ ಪಾಸ್‌ಪೋರ್ಟ್‌ ಹಾವಳಿ ತಡೆಗಟ್ಟಲು ಕಂಪ್ಯೂಟರ್‌ ನೆರವಿನಿಂದ ಡಿಜಿಟಲ್‌ ಪಾಸ್‌ಪೋರ್ಟ್‌ ವ್ಯವಸ್ಥೆಯನ್ನು ಜಾರಿಗೆ ತರಲು ನಿರ್ಧರಿಸಲಾಗಿದೆ. ಇದು ಸದ್ಯದಲ್ಲೇ ಜಾರಿಗೂ ಬರಲಿದೆ ಎಂದು ಬೆಂಗಳೂರು ಪಾಸ್‌ಪೋರ್ಟ್‌ ಕಚೇರಿಯ ಅಧಿಕಾರಿ ಟಿ.ವಿ. ನಾಗೇಂದ್ರ ಪ್ರಸಾದ್‌ ತಿಳಿಸಿದ್ದಾರೆ.

ಕಂಪ್ಯೂಟರ್‌ ನೆರವಿನಿಂದ ಭಾವಚಿತ್ರಗಳನ್ನು ಸ್ಕ್ಯಾನ್‌ ಮಾಡಿ, ಹೆಸರು ಮತ್ತಿತರ ವಿವರಗಳನ್ನು ಮುದ್ರಿಸುವುದರಿಂದ ನಕಲಿ ಪಾಸ್‌ಪೋರ್ಟ್‌ ತಯಾರಿಕೆಗೆ ಅವಕಾಶ ಇರುವುದಿಲ್ಲ ಎಂದು ಅವರು ಹೇಳಿದ್ದಾರೆ. ಹಾಲಿ ಪಾಸ್‌ಪೋರ್ಟ್‌ ಸಿದ್ಧಪಡಿಸಲು 9 ಪ್ರತ್ಯೇಕ ಅಧಿಕಾರಿಗಳನ್ನು ನೇಮಿಸಲಾಗಿದೆ. ಒಬ್ಬ ಅಧಿಕಾರಿ ಪ್ರತಿದಿನ 60 ಪಾಸ್‌ಪೋರ್ಟ್‌ ಬರೆಯುತ್ತಾರೆ.

ಕಂಪ್ಯೂಟರ್‌ ಮೂಲಕ ಪಾಸ್‌ಪೋರ್ಟ್‌ ನೀಡುವ ವ್ಯವಸ್ಥೆ ಜಾರಿಗೆ ಬಂದರೆ, ಶ್ರಮವೂ ಕಡಿಮೆ ಆಗುವುದಲ್ಲದೆ, ಸುಲಭವೂ ಆಗಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಮುಂದಿನ ಎರಡು ತಿಂಗಳಲ್ಲಿ ಈ ಕಾರ್ಯ ಪೂರ್ಣವಾಗಲಿದೆ.

ಈವರೆಗೆ 14 ಲಕ್ಷ ಪಾಸ್‌ಪೋರ್ಟ್‌ ದಾಖಲೆಗಳನ್ನು ಕಂಪ್ಯೂಟರ್‌ಗೆ ಅಳವಡಿಸಲಾಗಿದೆ. ಕಂಪ್ಯೂಟರ್‌ಗೆ ಪ್ರಿಂಟರ್‌ಗಳ ಅಳವಡಿಕೆಯಾದರೆ, ಪ್ರತಿದಿನ ಹೆಚ್ಚು ಪಾಸ್‌ಪೋರ್ಟ್‌ಗಳನ್ನು ನೀಡಲು ಅವಕಾಶ ಆಗುತ್ತದೆ. ಇದರಿಂದ ಜನರ ಸಮಯವೂ ಉಳಿಯಲಿದೆ ಎಂದು ಅವರು ಹೇಳಿದ್ದಾರೆ.

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...