ನರಹಂತಕನ ಹುಟ್ಟಡಗಿಸಲು ಹೊಸತಂತ್ರಕ್ಕಾಗಿ ಸೋಮವಾರ ಸಭೆ

ಬೆಂಗಳೂರು : ವೀರಪ್ಪನ್‌ ಶಿಕಾರಿಗೆ ಹೊಸ ತಂತ್ರ ರೂಪಿಸಲು ಕರ್ನಾಟಕ ಹಾಗೂ ತಮಿಳುನಾಡಿನ ಅಧಿಕಾರಿಗಳು ಸೋಮವಾರ ಚೆನ್ನೈನಲ್ಲಿ ಸಭೆ ಸೇರಲಿದ್ದಾರೆ.

ಹೊಸದಾಗಿ ನೇಮಕಗೊಂಡಿರುವ ಉಭಯ ರಾಜ್ಯಗಳ ಎಸ್‌ಟಿಎಫ್‌ ಮುಖ್ಯಸ್ಥರಾದ ಥೇವಾರಂ, ಐಜಿಪಿ ಕೆಂಪಯ್ಯ, ಎರಡೂ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳು, ಗೃಹ ಕಾರ್ಯದರ್ಶಿಗಳು ಹಾಗೂ ಪೊಲೀಸ್‌ ಮಹಾ ನಿರ್ದೇಶಕರು ಸೋಮವಾರ ಚೆನ್ನೈನಲ್ಲಿ ಸಭೆ ಸೇರಲಿದ್ದಾರೆ. ವೀರಪ್ಪನ್‌ ಹಿಡಿಯಲು ಹೊಸ ಕಾರ್ಯತಂತ್ರವನ್ನು ರೂಪಿಸುವುದು ಈ ಸಭೆಯ ಉದ್ದೇಶ ಎಂದು ಕರ್ನಾಟಕದ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಜಯಲಲಿತಾ ಈ ಹಿಂದೆ ತಮಿಳುನಾಡು ಮುಖ್ಯಮಂತ್ರಿಯಾಗಿದ್ದಾಗ ವೀರಪ್ಪನ್‌ ಕೂದಲೆಳೆಯಲ್ಲಿ ತಪ್ಪಿಸಿಕೊಂಡಿದ್ದ. ಈಗ ಇದೇ ಜಯಲಲಿತಾ ಮತ್ತೆ ತಮಿಳುನಾಡಿನಲ್ಲಿ ಅಧಿಕಾರಕ್ಕೆ ಬಂದ ಕೆಲವೇ ದಿನಗಳಲ್ಲಿ ವೀರಪ್ಪನ್‌ ಹಿಡಿಯುವ ಸಂಕಲ್ಪ ಮಾಡಿದ್ದಾರೆ. ವಾಲ್ಟರ್‌ ಥೇವಾರಂ ಅವರನ್ನು ತಮಿಳುನಾಡು ಎಸ್‌ಟಿಎಫ್‌ ಪಡೆಯ ಮುಖ್ಯಸ್ಥರನ್ನಾಗಿ ನೇಮಿಸಿದ್ದಾರೆ.

ವೀರಪ್ಪನ್‌ ಸುಳಿವು ಕೊಟ್ಟವರಿಗೆ ಘೋಷಿಸಲಾಗಿದ್ದ ಬಹುಮಾನದ ಮೊತ್ತವನ್ನೂ ಹೆಚ್ಚಿಸಿದ್ದಾರೆ. ಈ ಎಲ್ಲಾ ಹೆಜ್ಜೆಗಳ ನಂತರ ನಡೆಯಲಿರುವ ಈ ಸಭೆ ವೀರಪ್ಪನ್‌ ಶಿಕಾರಿ ಪ್ರಕ್ರಿಯೆಗೆ ಹೊಸ ಚಾಲನೆ ದಕ್ಕಿಸಿಕೊಡುವ ನಿರೀಕ್ಷೆಯಿದೆ. ಹೊಸ ಬಾಟಲಿಯಲ್ಲಿ ಹಳೆ ಮದ್ಯ ಎಂಬಂತಾಗದೆ ಈ ಸಭೆ ವೀರಪ್ಪನ್‌ ಜುಟ್ಟನ್ನು ಹಿಡಿಯುವ ಬಿಗಿ ಪಟ್ಟಾಗಿ ಹೊಮ್ಮುವುದೋ, ಏನೋ ಕಾದು ನೋಡಬೇಕು.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ