‘ಇಂದೋ, ನಾಳೆಯೋ ವಾಜಪೇಯಿ ಪುಟ್ಟ ಪುಟ್ಟ ಹೆಜ್ಜೆ ಇಡ್ತಾರೆ’

ಮುಂಬಯಿ : ಗುರುವಾರ ಬ್ರೀಚ್‌ಕ್ಯಾಂಡಿ ಆಸ್ಪತ್ರೆಯಲ್ಲಿ ಬಲ ಮಂಡಿಯ ಶಸ್ತ್ರ ಚಿಕಿತ್ಸೆಗೊಳಗಾದ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರ ದೇಹಸ್ಥಿತಿ ಉತ್ತಮವಾಗಿದ್ದು, ಒಂದೆರಡು ದಿನಗಳಲ್ಲಿ ಅವರು ಹೆಜ್ಜೆ ಊರಿ ನಡೆಯಬಹುದಾಗಿದೆ ಎಂದು ಶಸ್ತ್ರಚಿಕಿತ್ಸೆ ಮಾಡಿರುವ ವೈದ್ಯ ಡಾ.ಚಿತ್ತರಂಜನ್‌ ರಣಾವತ್‌ ತಿಳಿಸಿದ್ದಾರೆ.

ಶುಕ್ರವಾರವೇ ವಾಜಪೇಯಿ ಹಾಸಿಗೆ ಬಿಟ್ಟು ಮೇಲೇಳುವ ಸಾಧ್ಯತೆಯಿದೆ. ಅಕಸ್ಮಾತ್‌ ಕಷ್ಟವಾದಲ್ಲಿ ಶನಿವಾರದಿಂದ ಅವರು ನಿಧಾನ ಹೆಜ್ಜೆ ಇಡಬಹುದು. 8-10 ದಿನಗಳ ಕಾಲ ಅವರು ಆಸ್ಪತ್ರೆಯಲ್ಲೇ ಉಳಿಯಬೇಕು. ಇನ್ನು ಮೂರು ದಿನಗಳ ಕಾಲ ಅವರ ಭೇಟಿ ಮಾಡುವುದನ್ನು ನಿರ್ಬಂಧಿಸಲಾಗಿದೆ ಎಂದು ರಣಾವತ್‌ ಹೇಳಿದರು.

ಎಂಟು ತಿಂಗಳ ಹಿಂದೆ ಎಡ ಮಂಡಿಯ ಶಸ್ತ್ರಚಿಕಿತ್ಸೆ ಮಾಡಿದಂತೆಯೇ ಬಲ ಮಂಡಿಯ ಶಸ್ತ್ರಚಿಕಿತ್ಸೆಯನ್ನೂ ಮಾಡಿದ್ದೇನೆ. ಎರಡು ತಾಸುಗಳ ಕಾಲದ ಈ ಶಸ್ತ್ರಚಿಕಿತ್ಸೆ ವೇಳೆ ವಾಜಪೇಯಿ ಅವರು ಪ್ರಜ್ಞಾವಸ್ಥೆಯಲ್ಲೇ ಇದ್ದರು. ಆದರೆ ಶಸ್ತ್ರಚಿಕಿತ್ಸೆಯನ್ನು ನೋಡಲಿಲ್ಲ ಎಂದು ಚಿತ್ತರಂಜನ್‌ ವಿವರಿಸಿದರು.

(ಇನ್ಫೋ ವಾರ್ತೆ)