ರಾಯಚೂರು : ಅಂತರರಾಷ್ಟ್ರೀಯ ಕ್ರೀಡಾಂಗಣಕ್ಕೆ ಶೀಘ್ರ ಕೆಸರು ಕಲ್ಲು

ರಾಯಚೂರು : ಪಟ್ಟಣದಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ ಸ್ಟೇಡಿಯಂ ನಿರ್ಮಿಸಲು ನಿರ್ಧರಿಸಲಾಗಿದ್ದು, ಆ ಕುರಿತ ಪೂರ್ವ ಕಾಮಗಾರಿ ಸಭೆ ಕರ್ನಾಟಕ ಕ್ರಿಕೆಟ್‌ ಅಸೋಸಿಯೇಷನ್‌ನ ಕಾರ್ಯದರ್ಶಿ ಬ್ರಿಜೇಶ್‌ ಪಟೇಲ್‌ ಅವರ ನೇತೃತ್ವದಲ್ಲಿ ಇತ್ತೀಚೆಗೆ ನಡೆಯಿತು.

ಒಂದು ವರ್ಷದ ಕೆಳಗೆ ರಾಯಚೂರಿನಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ ಸ್ಟೇಡಿಯಂ ನಿರ್ಮಾಣ ಕನಸಿನ ಮಾತೆಂದೇ ಪರಿಗಣಿಸಲ್ಪಟ್ಟಿತ್ತು. ಆದರೆ ರಾಯಚೂರಿನಲ್ಲಿ ಸ್ಟೇಡಿಯಂ ಸಹಾಯಾರ್ಥ ಕಳೆದ ಫೆಬ್ರವರಿಯಲ್ಲಿ ಕರ್ನಾಟಕ ಇಲೆವೆನ್‌ ಹಾಗೂ ಇಂಡಿಯಾ ಇಲೆವನ್‌ ತಂಡಗಳ ನಡುವಿನ ಒಂದು ದಿನದ ಮ್ಯಾಚ್‌ನಿಂದ 47.7 ಲಕ್ಷ ರೂಪಾಯಿ ಸಂಗ್ರಹಿಸಲಾಗಿತ್ತು. ಈ ಪಂದ್ಯವನ್ನು ಆಯೋಜಿಸುವಲ್ಲಿ ಭಾರತ ಕ್ರಿಕೆಟ್‌ ತಂಡದ ಉಪನಾಯಕ ರಾಹುಲ್‌ ದ್ರಾವಿಡ್‌ ಪ್ರಮುಖ ಪಾತ್ರ ವಹಿಸಿದ್ದರು.

ಸ್ಮರಣ ಸಂಚಿಕೆ, ದೇಣಿಗೆ ಮತ್ತು ಜಾಹೀರಾತಿನ ಮುಖಾಂತರ ಸ್ಟೇಡಿಯಂ ನಿರ್ಮಾಣಕ್ಕಾಗಿ ಹಣ ಹೊಂದಿಸಿಕೊಳ್ಳಲಾಗಿದ್ದು ಇನ್ನೊಂದು ತಿಂಗಳಲ್ಲಿ ಸ್ಟೇಡಿಯಂ ಕಾಮಗಾರಿಗೆ ಕೆಸರು ಕಲ್ಲು ಹಾಕಲಾಗುವುದು ಎಂದು ಬ್ರಿಜೇಶ್‌ ಪಟೇಲ್‌ ಹೇಳಿದ್ದಾರೆ.

ಪೂರ್ವ ಕಾಮಗಾರಿ ಸಭೆಯಲ್ಲಿ ರಾಜ್ಯ ಕ್ರಿಕೆಟ್‌ ಅಸೋಸಿಯೇಷನ್‌ನ ಅಧ್ಯಕ್ಷ ಕೆ.ಎಂ. ರಾಮ್‌ ಪ್ರಸಾದ್‌, ಉಪ ಆಯುಕ್ತ ಜಿ. ಕುಮಾರ ನಾಯಕ್‌ ಉಪಸ್ಥಿತರಿದ್ದರು. ಬ್ರಿಜೇಶ್‌ ಪಟೇಲ್‌ ಹಾಗೂ ಜಿ. ಕುಮಾರ್‌ ನಾಯಕ್‌ ಅವರು ಕ್ರೀಡಾಂಗಣ ನಿರ್ಮಾಣ್ಕಕ್ಕೆ ಸಂಗ್ರಹಿಸಿರುವ ಹಣವನ್ನು ಬ್ಯಾಂಕ್‌ನಲ್ಲಿ ಠೇವಣಿ ಇಟ್ಟು ಸ್ಟೇಡಿಯಂ ಕೆಲಸವನ್ನು ಆರಂಭಿಸಬೇಕು ಎಂದು ಕ್ರಿಕೆಟ್‌ ಅಸೋಸಿಯೇಷನ್‌ ಸಂಯೋಜಕ ಅಬ್ದುಲ್‌ ಹಕೀಮ್‌ ಅವರಿಗೆ ಸೂಚಿಸಿದ್ದಾರೆ.

(ಇನ್ಫೋ ವಾರ್ತೆ)