ಪ್ರಧಾನಿ ವಾಜಪೇಯಿ ಬಲ ಮಂಡಿ ಶಸ್ತ್ರಚಿಕಿತ್ಸೆ ಯಶಸ್ವಿ

ಮುಂಬಯಿ : ಪ್ರಧಾನಿ ವಾಜಪೇಯಿ ಅವರ ಬಲ ಮಂಡಿಗೆ ಇಲ್ಲಿನ ಬ್ರೀಚ್‌ಕ್ಯಾಂಡಿ ಆಸ್ಪತ್ರೆಯಲ್ಲಿ ಗುರುವಾರ ಬೆಳಿಗ್ಗೆ ಯಶಸ್ವಿ ಶಸ್ತ್ರ ಚಿಕಿತ್ಸೆ ನಡೆಸಲಾಯಿತು.

ಬೆಳಿಗ್ಗೆ 8.45 ರ ಸುಮಾರಿಗೆ ಗಾಲಿ ಕುರ್ಚಿಯಲ್ಲಿ ವಾಜಪೇಯಿ ಅವರನ್ನು ಶಸ್ತ್ರಚಿಕಿತ್ಸೆ ಕೊಠಡಿಯಾಳಗೆ ಕರೆದೊಯ್ಯಲಾಯಿತು. ಸುಮಾರು ಒಂದು ಗಂಟೆ ಕಾಲ ಶಸ್ತ್ರಚಿಕಿತ್ಸೆ ನಡೆಸಲಾಯಿತು. ನ್ಯೂಯಾರ್ಕ್‌ ಮೂಲದ ಡಾ. ರಣಾವತ್‌ ಶಸ್ತ್ರಚಿಕಿತ್ಸೆ ನಡೆಸಿದ ವೈದ್ಯರ ತಂಡದ ನೇತೃತ್ವ ವಹಿಸಿದ್ದರು. ಸಂಜೆ 4 ಗಂಟೆಗೆ ರಣಾವತ್‌ ಅವರು ಪ್ರಧಾನಿಯವರ ಶಸ್ತ್ರ ಚಿಕಿತ್ಸೆಯ ವಿವರಗಳನ್ನು ಸಹ್ಯಾದ್ರಿ ಅತಿಥಿ ಗೃಹದಲ್ಲಿ ಸುದ್ದಿಗಾರರಿಗೆ ವಿವರಿಸುವರು.

ಬುಧವಾರ ಸಂಜೆಯೇ ದೆಹಲಿಯಿಂದ ಮುಂಬಯಿಗೆ ಆಗಮಿಸಿದ ಗೃಹ ಸಚಿವ ಎಲ್‌.ಕೆ. ಅದ್ವಾನಿ ಶಸ್ತ್ರಚಿಕಿತ್ಸೆ ಕೊಠಡಿಗೆ ತೆರಳುವ ಮುನ್ನ ವಾಜಪೇಯಿ ಅವರನ್ನು ಬೆಳಗ್ಗೆ 7.30 ರ ವೇಳೆಗೆ ಭೇಟಿ ಮಾಡಿದರು. ಬೆಳಗ್ಗೆ 7 ರ ಸುಮಾರಿಗೆ ಮಾಹಿತಿ ತಂತ್ರಜ್ಞಾನ ಸಚಿವ ಪ್ರಮೋದ್‌ ಮಹಾಜನ್‌ ಅವರು ಪ್ರಧಾನಿಯವರನ್ನು ಭೇಟಿ ಮಾಡಿದ್ದರು. ಶಸ್ತ್ರ ಚಿಕಿತ್ಸೆ ನಡೆಯುವ ಸಂದರ್ಭದಲ್ಲಿ ವಾಜಪೇಯಿ ಅವರ ಕುಟುಂಬದ ಸದಸ್ಯರು ಶಸ್ತ್ರಚಿಕಿತ್ಸೆ ಕೊಠಡಿಯ ಹೊರಭಾಗದಲ್ಲಿ ದುಗುಡದಿಂದ ಕಾಯುತ್ತಿದ್ದರು.

(ಇನ್ಫೋ ವಾರ್ತೆ)