ಎರಡು ದಿನಗಳಿಂದ ಮಂಗಳೂರಿನಲ್ಲಿ ಮಳೆರಾಯನ ಝಾಂಡಾ

ಮಂಗಳೂರು : ಕರಾವಳಿಯಲ್ಲಿ ಮಳೆ ಧೋಗುಟ್ಟಲಾರಂಭಿಸಿ ಎರಡು ದಿನಗಳಾಯಿತು. ಇಲ್ಲಿನವರು ಬಿಸಿಲ ಕಿರಣ ಕಂಡಿಲ್ಲ. ಸಿಡಿಲು ಬಡಿದು ಕುಸಿದ ಮನೆ, ಭೂಕುಸಿತದಿಂದ ಮುಚ್ಚಿದ ದಾರಿ, ರಸ್ತೆ ಮೇಲೆ ತುಂಬಿ ಹರಿಯುತ್ತಿರುವ ನೀರಿನಿಂದ ಸಂಚಾರಕ್ಕೆ ತೊಂದರೆ .. ಹೀಗೆ ಸಾಲು ಸಂಕಷ್ಟಗಳು.

ಮಂಗಳೂರು ತಾಲ್ಲೂಕಿನ ಗಂಜಿ ಮಠದ ಬಳಿಯ ಮಳಲಿಯಲ್ಲಿ ರೆಚ್ಚೆಗಟ್ಟಿ ಸುರಿಯುತ್ತಿರುವ ಮಳೆಯ ನಡುವೆ ಹೂವಯ್ಯ ಮಡಿವಾಳ ಎಂಬುವರ ಮನೆ ಮೇಲೆ ಎರಗಿದ ಸಿಡಿಲಿಗೆ ಮನೆಯ ಗೋಡೆ ಕುಸಿದು ಬಿದ್ದಿದೆ. ಹಟ್ಟಿಯಲ್ಲಿದ್ದ ದನ ಅಸು ನೀಗಿದೆ. ನಷ್ಟದ ಅಂದಾಜು 25 ಸಾವಿರ ದಾಟಿದೆ.

ಮಂಗಳೂರು ನಗರದ ಕೋರ್ಟು ಗುಡ್ಡೆಯಲ್ಲಿ ಭೂಕುಸಿತ ಸಂಭವಿಸಿ ಜನರು ಕೋರ್ಟ್‌ಗೆ ಮತ್ತು ಅಲೋಷಿಯಸ್‌ ಕಾಲೇಜಿಗೆ ಹೋಗಲು ಬಳಸುತ್ತಿದ್ದ ಮಾರ್ಗದ ಮೇಲೆ ಮಣ್ಣು ರಾಶಿ ಬಿದ್ದಿದೆ. ಇಲ್ಲಿನ ಕೈಬರ್‌ ಪಾಸ್‌ ರಸ್ತೆಯಲ್ಲಿ ಕಳೆದ ವರ್ಷವೂ ಭೂಕುಸಿತದಿಂದಾಗಿ ಸಂಚಾರಕ್ಕೆ ಅಡ್ಡಿಯಾಗಿದ್ದರಿಂದ ಇಲ್ಲಿ ವಾಹನ ಸಂಚಾರವನ್ನು ನಿಷೇಧಿಸಲಾಗಿತ್ತು. ಈಗ ಮತ್ತೊಮ್ಮೆ ಅಲ್ಲಿ ಅಪಾಯದ ಸೂಚನೆಯಾಗಿ ಮಣ್ಣು ಜರಿದು ಬಿದ್ದಿದೆ.

ಮಂಗಳವಾರ ಮತ್ತು ಬುಧವಾರ 31 ಡಿಗ್ರಿಯ ಆಸು ಪಾಸಿನಲ್ಲಿದ್ದ ಉಷ್ಣಾಂಶ ಗುರುವಾರದ ಬೆಳಗ್ಗಿನ ಹೊತ್ತಿಗೆ 26 ಡಿಗ್ರಿಗಿಳಿದಿದ್ದು ಕರಾವಳಿ ತಂಪಾಗಿದೆ. ಬುಧವಾರ ಮಂಗಳೂರಿನಲ್ಲಿ ಸುಮಾರು 11 ಸೆಂಟಿ ಮೀಟರಿಗೂ ಹೆಚ್ಚು ಮಳೆ ಬಿದ್ದಿದೆ. ಬಂಟ್ವಾಳದಲ್ಲಿ ಸರಾಸರಿ ಗರಿಷ್ಠ ಅಂದರೆ 151.4 ಮಿಮೀ ಮಳೆ ಬಂದಿದ್ದರೆ, ಬೆಳ್ತಂಗಡಿಯಲಿ ಕನಿಷ್ಠ 47.2 ಮಿಮೀ ಮಳೆಯಾಗಿರುವ ವರದಿಯಾಗಿದೆ.

(ಮಂಗಳೂರು ಪ್ರತಿನಿಧಿಯಿಂದ)