ಎನ್‌.ಜಿ.ಇ.ಎಫ್‌. ಖಾಸಗೀಕರಣಕ್ಕೆ ಜಾಗತಿಕ ಟೆಂಡರ್‌ ನಿರ್ಧಾರ

ಬೆಂಗಳೂರು: ಕರ್ನಾಟಕದ ಹೆಮ್ಮೆಯ ಕಾರ್ಖಾನೆಗಳಲ್ಲಿ ಒಂದಾಗಿದ್ದ ಎನ್‌.ಜಿ.ಇ.ಎಫ್‌. ಕಾರ್ಖಾನೆ ಈಗ ಮಾರಾಟಕ್ಕಿದೆ. ಭಾರಿ ನಷ್ಟ ಅನುಭವಿಸುತ್ತಿರುವ ಈ ಕಾರ್ಖಾನೆಯನ್ನು ಖಾಸಗೀಕರಣಗೊಳಿಸುವುದನ್ನು ಬಿಟ್ಟು ಅನ್ಯಮಾರ್ಗವೇ ಇಲ್ಲ ಎಂದು ಸರಕಾರ ತೀರ್ಮಾನಿಸಿಯಾಗಿದೆ.

ಈ ಹಿನ್ನೆಲೆಯಲ್ಲಿ ಎನ್‌.ಜಿ.ಇ.ಎಫ್‌. ಅನ್ನು ಖಾಸಗಿಯವರಿಗೆ ಒಪ್ಪಿಸಲು ಇನ್ನೊಂದು ತಿಂಗಳ ಅವಧಿಯಾಳಗೆ ಜಾಗತಿಕ ಟೆಂಡರ್‌ ಕರೆಯಲಾಗುವುದು ಎಂದು ಸಂಸ್ಥೆಯ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ವಿ. ಗೋವಿಂದರಾಜ್‌ ಮಂಗಳವಾರ ತಿಳಿಸಿದ್ದಾರೆ.

ಅರ್ನೆಸ್ಟ್‌ ಅಂಡ್‌ ಯಂಗ್‌ ಎಂಬ ಜಾಗತಿಕ ಮಟ್ಟದ ಸಲಹಾ ಸಂಸ್ಥೆಗೆ ಈ ಸಂಬಂಧ ಜಾಹೀರಾತು ಪ್ರಕಟಿಸಲು ಔದ್ಯಮಿಕ ಹಾಗೂ ಆರ್ಥಿಕ ಪುನರುಜ್ಜೀವನ ಮಂಡಳಿ ಅನುಮತಿ ನೀಡಿದೆ. ಸಂಸ್ಥೆಯು ಬಿಡ್‌ ಮೌಲ್ಯಮಾಪನದ ಜವಾಬ್ದಾರಿಯನ್ನು ವಹಿಸಿಕೊಂಡಿದೆ ಎಂದು ಅವರು ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದ್ದಾರೆ.

ಎನ್‌ಜಿಇಎಫ್‌ ಪರಭಾರೆ ಪ್ರಕ್ರಿಯೆಗೆ ಪೂರಕವಾಗಿ ಕಾರ್ಖಾನೆಯ ಎಲ್ಲ ಚರ ಹಾಗೂ ಸ್ಥಿರ ಆಸ್ತಿಗಳ ಮೌಲ್ಯಮಾಪನ ಕಾರ್ಯ ಆರಂಭವಾಗಿದೆ. ಐ.ಡಿ.ಬಿ.ಐ. ಖಾಸಗೀಕರಣ ಬಿಡ್‌ಗಳನ್ನು ನಿರ್ವಹಿಸಲಿದೆ ಎಂದೂ ಅವರು ತಿಳಿಸಿದ್ದಾರೆ.