ಮಹಾವೀರ ಜೈನ್‌ ಕೇಂದ್ರದಿಂದ ಅಪರೂಪದ ಹೃದಯ ಶಸ್ತ್ರ ಚಿಕಿತ್ಸೆ

ಬೆಂಗಳೂರು : ಹೃದಯ ಬಡಿತ ಏಕಾಏಕಿ ನಿಂತು ಸಾವು ಸಂಭವಿಸುವುದನ್ನು ತಡೆಯುವ ಪುಟ್ಟ ಯಂತ್ರವೊಂದನ್ನು ಅಳವಡಿಸುವ ಶಸ್ತ್ರಚಿಕಿತ್ಸೆಯನ್ನು ನಗರದ ಭಗವಾನ್‌ ಮಹಾವೀರ ಜೈನ್‌ ಕೇಂದ್ರ ಯಶಸ್ವಿಯಾಗಿ ನೆರವೇರಿಸಿದೆ. ಇದು ತೀರಾ ಅಪರೂಪದ ಶಸ್ತ್ರ ಚಿಕಿತ್ಸೆಯಾಗಿದ್ದು , ಈವರೆಗೆ ದೇಶದಲ್ಲಿ ಈ ಬಗೆಯ ಸುಮಾರು 120 ಯಂತ್ರಗಳನ್ನು ಅಳವಡಿಸಲಾಗಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಹಠಾತ್‌ ಹೃದಯ ನಿಲ್ಲುವುದರಿಂದ ದೇಶದಲ್ಲಿ ಪ್ರತಿವರ್ಷ 10 ಲಕ್ಷ ಮಂದಿ ಸಾಯುತ್ತಿದ್ದಾರೆ. ಈ ರೀತಿಯ ಸಮಸ್ಯೆ ಹೊಂದಿರುವ ರೋಗಿಗಳಿಗೆ ಇಂಪ್ಲಾಂಟೇಬಲ್‌ ಕಾರ್ಡಿಯಾ ಡಿಫಿಬ್ರಿಲೇಟರ್ಸ್‌ (ಐಸಿಡಿ) ಅಳವಡಿಸಲಾಗುವುದು. ಹೃದಯ ಬಡಿತದ ವ್ಯತ್ಯಾಸಗಳನ್ನು ತಕ್ಷಣ ಗ್ರಹಿಸುವ ಈ ಯಂತ್ರ, ಅ ವ್ಯತ್ಯಾಸಗಳನ್ನು ತಕ್ಷಣ ಸರಿಪಡಿಸುತ್ತಿದೆ. ಈ ಕುರಿತು ಆಸ್ಪತ್ರೆಯ ಪ್ರಕಟಣೆ ತಿಳಿಸಿದೆ.

ಕತ್ತಿನ ಎಲುಬಿನ ಬಳಿ ಸುಮಾರು ನಾಲ್ಕು ಅಂಗುಲ ಕುಯ್ದು , 5 ಮಿಮೀ ಅಳತೆಯ ತೆಳುವಾದ ತಂತಿಯನ್ನು ಒಳಗೆ ಸೇರಿಸಿ ಅದರ ತುದಿಯನ್ನು ಹೃದಯದಲ್ಲಿ ಅಳವಡಿಸಲಾಗುವುದು. ಮತ್ತೊಂದು ತುದಿಯ ತಂತಿಯನ್ನು ಐಸಿಡಿಗೆ ಜೋಡಿಸಲಾಗುವುದು. ಐಸಿಡಿಯ ಕಾರ್ಯ ನಿರ್ವಹಣೆ ಪರಿಶೀಲಿಸಿದ ನಂತರ ಕತ್ತರಿಸಿದ ಭಾಗವನ್ನು ಹೊಲಿಗೆ ಹಾಕಿ ಮುಚ್ಚಲಾಗುವುದು ಎಂದು ಐಸಿಡಿ ಅಳವಡಿಸುವ ಶಸ್ತ್ರಚಿಕಿತ್ಸೆ ಯ ಬಗೆಗೆ ಆಸ್ಪತ್ರೆಯ ಪ್ರಕಟಣೆ ವಿವರಗಳನ್ನು ತಿಳಿಸಿದೆ. ಅಂದಹಾಗೆ, ಭಗವಾನ್‌ ಮಹಾವೀರ ಜೈನ್‌ ಹೃದಯ ಕೇಂದ್ರ ನಡೆಸಿರುವ ಶಸ್ತ್ರಚಿಕಿತ್ಸೆ ಸಾಹಸದಲ್ಲಿ ವೈದ್ಯರುಗಳಾದ ಡಾ.ಎಸ್‌. ಎಸ್‌. ರಮೇಶ್‌, ಡಾ. ಆರ್‌. ಕೇಶವ್‌ ಹಾಗೂ ಡಾ. ಗಣೇಶ ನಾಯಕ್‌ ಭಾಗವಹಿಸಿದ್ದರು.

(ಇನ್ಫೋ ವಾರ್ತೆ)