ಪೇಜಾವರ ಮಠಾಧೀಶ ವಿಶ್ವೇಶತೀರ್ಥರಿಗೆ ‘ವೆ’ೖ ದರ್ಜೆ ರಕ್ಷಣೆ

ಉಡುಪಿ : ಇನ್ನುಮುಂದೆ ಪೇಜಾವರ ಮಠಾಧೀಶರನ್ನು ಸುಲಭವಾಗಿ ನೋಡುವಂತಿಲ್ಲ . ಅವರೀಗ ಭದ್ರತಾ ಸಿಬ್ಬಂದಿಯ ಬಂಧಿ. ಅರ್ಥಾತ್‌, ಜೀವ ಬೆದರಿಕೆ ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ ಉಡುಪಿಯ ಪೇಜಾವರ ಮಠಾಧೀಶ ವಿಶ್ವೇಶ ತೀರ್ಥ ಸ್ವಾಮೀಜಿ ಅವರಿಗೆ ಮುನ್ನೆಚ್ಚರಿಕೆ ಕ್ರಮವಾಗಿ ಪೊಲೀಸ್‌ ಇಲಾಖೆ ವೈ ದರ್ಜೆಯ ರಕ್ಷಣೆ ನೀಡಿದೆ.

ಇತ್ತೀಚಿನ ದಿನಗಳಲ್ಲಿ ಅನೇಕ ಮಠಾಧೀಶರ ಮೇಲೆ ಹಲ್ಲೆಗಳು ನಡೆದಿರುವ ಉದಾಹರಣೆಗಳ ಹಿನ್ನೆಲೆಯಲ್ಲಿ ವಿಶ್ವೇಶತೀರ್ಥರಿಗೆ ರಕ್ಷಣೆ ನೀಡಲಾಗಿದೆ. ಈಗಾಗಲೇ ಭದ್ರತಾ ಸಿಬ್ಬಂದಿ ಸ್ವಾಮೀಜಿಯವರ ರಕ್ಷಣಾ ಕಾರ್ಯದಲ್ಲಿ ತೊಡಗಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯಾಬ್ಬರು ಶುಕ್ರವಾರ ತಿಳಿಸಿದ್ದಾರೆ.

ರಕ್ಷಣೆ ನಾವಾಗಿಯೇ ಕೇಳಿದ್ದಲ್ಲ : ಪೊಲೀಸ್‌ ರಕ್ಷಣೆಯನ್ನು ನಾವಾಗಿಯೇ ಕೇಳಿದ್ದಲ್ಲ . ಅವರಾಗಿಯೇ ಕೊಟ್ಟಿದ್ದಾರೆ. ಅವರ ಕೆಲಸ ಮಾಡಿಕೊಂಡು ಹೋಗುತ್ತಿದ್ದಾರೆ ಎಂದು ತಮಗೆ ಒದಗಿಸಿರುವ ರಕ್ಷಣೆಯ ಕುರಿತು ವಿಶ್ವೇಶತೀರ್ಥ ಸ್ವಾಮೀಜಿ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ಕೆಲವು ತಿಂಗಳ ಹಿಂದೆ ಬಂದ ಅನಾಮಧೇಯ ಪತ್ರದ ಬೆದರಿಕೆಯ ಹಿನ್ನೆಲೆಯಲ್ಲಿ ಸ್ವಾಮೀಜಿಯವರಿಗೆ ರಕ್ಷಣೆ ನೀಡಲಾಗಿದೆ.

(ಇನ್ಫೋ ವಾರ್ತೆ)