ಕ್ರಿಕೆಟ್‌ : ದಾಖಲೆ ಮೊತ್ತ ಚೆಲ್ಲಿ ಐಟಿಸಿ ಜಾಗೆಗೆ ಸಹಾರ

ನವದೆಹಲಿ : ತಂಬಾಕು ಉತ್ಪನ್ನಗಳ ಕಂಪನಿಗಳು ಕ್ರಿಕೆಟ್ಟಿಗೆ ಪ್ರಾಯೋಜನೆ ಮಾಡುವಂತಿಲ್ಲ ಎಂಬುದೇ ವರದಾನವಾಗಿದೆ. ಇನ್ನು 3 ವರ್ಷಗಳ ಕಾಲ ಕ್ರಿಕೆಟ್ಟಿನ ಪ್ರಾಯೋಜಕತ್ವ ವಹಿಸಿಕೊಂಡಿರುವ ಸಹರಾ ಕಂಪನಿಗಳ ಸಮೂಹ ಇದಕ್ಕಾಗಿ ಸಾರಾಸಗಟಾಗಿ 21 ಮಿಲಿಯನ್‌ ಡಾಲರ್‌ ಹರಿಸಲಿದೆ. ಅಂದಹಾಗೆ, ಇದು ದಾಖಲೆ ಮೊತ್ತ !

ಶುಕ್ರವಾರ ಮಾರುಕಟ್ಟೆಯ ತುಂಬೆಲ್ಲಾ ಇದೇ ಸುದ್ದಿ. ಎಕಾನಮಿಕ್‌ ಟೈಮ್ಸ್‌, ಬಿಜಿನೆಸ್‌ ವರ್ಲ್ಡ್‌ನಂಥಾ ಪತ್ರಿಕೆಗಳು ಶುಕ್ರವಾರ ಈ ಸುದ್ದಿಯನ್ನು ಪ್ರಕಟಿಸಿದ್ದೇ ತಡ, ಎಲ್ಲಾ ಮೂಗಿನ ಮೇಲೆ ಬೆರಳಿಟ್ಟಿದ್ದಾರೆ. ಈ ಹಿಂದೆ ಕ್ರಿಕೆಟ್ಟಿನ ಪ್ರಾಯೋಜಕತ್ವ ವಹಿಸಿದ್ದ ಐಟಿಸಿ ಕಂಪನಿ ಖರ್ಚು ಮಾಡಿದ್ದ ಹಣಕ್ಕಿಂತ ಪ್ರತಿಶತ 49 ರಷ್ಟು ಹೆಚ್ಚು ಹಣವಿದು. ಏರ್‌ಲೈನ್ಸ್‌, ಮೀಡಿಯಾ ಮತ್ತು ರಿಯಲ್‌ ಎಸ್ಟೇಟ್‌ ವಹಿವಾಟು ನಡೆಸುತ್ತಿರುವ ಸಹಾರ, ಕ್ರಿಕೆಟ್‌ ಮೇಲೆ ಸುರಿಯುತ್ತಿರುವ ಈ ಮೊತ್ತ ನೆಸ್ಟ್‌ಲೇ ಹಾಗೂ ಬ್ರಿಟಾನಿಯಾದಂಥಾ ಕಂಪನಿಗಳು ಒಟ್ಟಾರೆ ಜಾಹೀರಾತಿನ ಮೇಲೆ ಮಾಡುತ್ತಿರುವ ಖರ್ಚಿಗಿಂತ ಅಧಿಕ.

ಕ್ರಿಕೆಟ್ಟಿಗೆ ಪಕ್ಕಾ ಪ್ರಾಯೋಜಕರನ್ನು ಹುಡುಕುವುದರಲ್ಲಿ ಎತ್ತಿದ ಕೈ ಎಂಬ ಕಾರಣಕ್ಕೆ ಟ್ರಾನ್ಸ್‌ ವರ್ಲ್ಡ್‌ ಇಂಟರ್‌ನ್ಯಾಷನಲ್‌ ಸಂಸ್ಥೆಗೆ ಈ ತಿಂಗಳು ಪ್ರಶಸ್ತಿಯೂ ಸಂದಿತ್ತು. ಪ್ರಶಸ್ತಿಯನ್ನು ಇದು ಸಹಾರ ಕಂಪನಿಯ ಜಾಹೀರಾತನ್ನು ಗೊತ್ತು ಪಡಿಸುವ ಮೂಲಕ ಈಗ ಸಮರ್ಥಿಸಿಕೊಂಡಿದೆ.

ಒಪ್ಪಂದದನ್ವಯ ಸಹಾರ ಕಂಪನಿಯ ಜಾಹೀರಾತುಗಳು ಕ್ರಿಕೆಟಿಗರ ಶರ್ಟು, ಕಿಟ್‌ ಬ್ಯಾಗ್‌ಗಳು, ಟ್ರ್ಯಾಕ್‌ ಸೂಟ್‌ ಮೇಲೆ ಇರುತ್ತವೆ. ಜೊತೆಗೆ 6 ಮಂದಿ ಕ್ರಿಕೆಟಿಗರನ್ನು ತನ್ನ ಜಾಹೀರಾತುಗಳ ಮಾಡೆಲ್‌ಗಳಾಗಿ ಕಂಪನಿ ಉಪಯೋಗಿಸಿಕೊಳ್ಳಲಿದೆ. ಭಾರತ ಜುಲೈನಲ್ಲಿ ಕೈಗೊಳ್ಳಲಿರುವ ಶ್ರೀಲಂಕಾ ಪ್ರವಾಸದಿಂದ ಸಹಾರ ಕಂಪನಿಯ ಜಾಹೀರಾತಿನ ಒಪ್ಪಂದ ಜಾರಿಗೆ ಬರಲಿದೆ.

(ಎಎಫ್‌ಪಿ)