ರೋರಿಚ್ ಸ್ಮರಣಿಕೆ ರಕ್ಷಣೆ : ಪ್ರಧಾನಿ ಕ್ರಮಕ್ಕೆ ರಷ್ಯಾ ಶ್ಲಾಘನೆ
ಮಾಸ್ಕೋ : ವಿಶ್ವ ಪ್ರಸಿದ್ಧ ಅಂತರರಾಷ್ಟ್ರೀಯ ರೋರಿಚ್ ಟ್ರಸ್ಟ್ ಸಂರಕ್ಷಣೆಗಾಗಿ ಭಾರತದ ಪ್ರಧಾನಿ ವಾಜಪೇಯಿ ಅವರು 2 ಲಕ್ಷ ಡಾಲರ್ ಅನುದಾನ ಬಿಡುಗಡೆ ಮಾಡಿರುವ ಬಗ್ಗೆ ರಷ್ಯಾದ ವಿದೇಶಾಂಗ ಸಚಿವಾಲಯ ತೃಪ್ತಿ ವ್ಯಕ್ತಪಡಿಸಿದೆ.
ಭಾರತದಲ್ಲಿರುವ ರೋರಿಚ್ ಕುಟುಂಬದ ಅಮೂಲ್ಯ ಸ್ಮರಣಿಕೆಗಳ ರಕ್ಷಣೆಗಾಗಿ ಈ ಅನುದಾನವನ್ನು ವಾಜಪೇಯಿ ಬಿಡುಗಡೆ ಮಾಡಿದ್ದಾರೆ. ರೋರಿಚ್ ಅವರ ಕುಟುಂಬದ ಸಂಪನ್ಮೂಲ ಭಾರತ ಹಾಗೂ ರಷ್ಯಾಗಳ ನಡುವಣ ಸಾಂಸ್ಕೃತಿಕ ವಿನಿಮಯಕ್ಕೆ ಸಾಕ್ಷಿಯಾಗಿದೆ ಎಂದು ರಷ್ಯಾ ವಿದೇಶಾಂಗ ಸಚಿವಾಲಯದ ಪ್ರಕಟಣೆ ಬಣ್ಣಿಸಿದೆ.
ಕುಲುವಿನಲ್ಲಿ ರೋರಿಚ್ ಅವರ ಸ್ಮರಣಾರ್ಥವಾಗಿ ಉಳಿದಿರುವ ಎಸ್ಟೆಟನ್ನು ಅಭಿವೃದ್ಧಿಪಡಿಸಲು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿರುವ ಅನುದಾನ ಬಳಕೆಯಾಗುವುದು. ಈ ಎಸ್ಟೇಟನ್ನು ಅಂತರರಾಷ್ಟ್ರೀಯ ಸಾಂಸ್ಕೃತಿಕ ಹಾಗೂ ಪ್ರವಾಸಿ ಕೇಂದ್ರವಾಗಿ ಅಭಿವೃದ್ಧಿಪಡಿಸಲಾಗುವುದು.
1920 ರ ಸುಮಾರಿಗೆ ಭಾರತಕ್ಕೆ ಬಂದು ನೆಲೆಸಿದ ನಿಕೋಲಸ್ ರೋರಿಚ್ (1874- 1947) ವಿಖ್ಯಾತ ಚಿತ್ರಕಾರ, ಲೇಖಕ ಹಾಗೂ ಆರ್ಕಿಯಾಲಜಿಸ್ಟ್ . ಭಾರತ ಹಾಗೂ ಟಿಬೆಟ್ಟಿನ ಸಂಸ್ಕೃತಿಯ ಅಧ್ಯಯನ ನಡೆಸಿದ ರೋರಿಚ್, ಸಮುದಾಯ ಕಾರ್ಯ ಹಾಗೂ ಸಾಂಸ್ಕೃತಿಕ ಸ್ಮರಣಿಕೆಗಳ ಸಂರಕ್ಷಣೆಯಲ್ಲಿ ಗಮನಾರ್ಹ ದುಡಿಮೆ ಮಾಡಿದ್ದಾರೆ.
(ಇನ್ಫೋ ವಾರ್ತೆ)