ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಕಿಂಗ್‌ ಕೋಬ್ರಾ ಪ್ರತ್ಯಕ್ಷ!

ಬೆಂಗಳೂರು : ಇಲ್ಲಿನ ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿಗೆ ಬುಧವಾರ ಅನಿರೀಕ್ಷಿತ ಅತಿಥಿಯನ್ನು ಎದುರುಗೊಂಡ ಅಚ್ಚರಿ. ಜೋರ್ಡಾನ್‌ನ ವಿದ್ಯಾರ್ಥಿಯ ತಪಾಸಣೆಯ ಸಂದರ್ಭದಲ್ಲಿ , ಆತನ ಬ್ಯಾಗ್‌ನಲ್ಲಿ ನ ವಸ್ತುವಿನ ಬಗೆಗೆ ಕುತೂಹಲಗೊಂಡ ಅಧಿಕಾರಿಗಳು ತಪಾಸಣೆ ನಡೆಸಿದಾಗ ಎದುರಾದದ್ದು - ಕಿಂಗ್‌ ಕೋಬ್ರಾ. ಅರೆಗಳಿಗೆ ಅಧಿಕಾರಿಗಳಿಗೆ ಉಸಿರುಗಟ್ಟಿದ ಅನುಭವ.

ಮೈಸೂರಿನಲ್ಲಿ ಓದುತ್ತಿರುವ ಜೋರ್ಡಾನ್‌ನ ವಾಸಿಂ ಎನ್ನುವ ಯುವಕ, ಬುಧವಾರ ಷಾರ್ಜಾಕ್ಕೆ ತೆರಳುವ ವಿಮಾನ ಪ್ರವೇಶಿಸುವ ಸಂದರ್ಭದಲ್ಲಿ ನ ತಪಾಸಣೆಯಲ್ಲಿ ಕಿಂಗ್‌ ಕೋಬ್ರಾ ಪತ್ತೆಯಾಯಿತು. ವಾಸಿಂನ ಬ್ಯಾಗ್‌ನಲ್ಲಿ ಯಾವುದೋ ಚಲಿಸುವ ವಸ್ತು ಇರುವುದನ್ನು ಎಕ್ಸರೇ ಸ್ಕ್ಯಾನರ್‌ ಯಂತ್ರ ತೋರಿಸಿದಾಗ, ಕೇಂದ್ರ ಸುರಕ್ಷತಾ ಪಡೆಯ ಸಿಬ್ಬಂದಿ ಜಾಗರೂಕರಾದರು. ಪರಿಶೀಲನೆಯಲ್ಲಿ ದೊರೆತದ್ದು ಹಾವು. ಕಿಂಗ್‌ ಕೋಬ್ರಾನ ವಿಷದ ಹಲ್ಲುಗಳನ್ನು ಕಿತ್ತು ಹಾಕಲಾಗಿದೆ. ಈ ವಿಷಯವನ್ನು ವಿಮಾನ ನಿಲ್ದಾಣದ ಪೊಲೀಸ್‌ ಮೂಲಗಳು ತಿಳಿಸಿವೆ.

ಮುದ್ದು (ಸಾಕು)ಪ್ರಾಣಿಯನ್ನಾಗಿ ಇರಿಸಿಕೊಳ್ಳಲು ಕೋಬ್ರಾ ತೆಗೆದುಕೊಂಡು ಹೋಗುತ್ತಿರುವುದಾಗಿ ವಾಸಿಂ ಪೊಲೀಸರಿಗೆ ತಿಳಿಸಿದ್ದಾನೆ. ಆತನನ್ನು ತಮ್ಮ ವಶಕ್ಕೆ ತೆಗೆದುಕೊಂಡಿರುವ ಪೊಲೀಸರು, ವನ್ಯಜೀವಿ ಸಂರಕ್ಷಣಾ ಕಾಯ್ದೆಯಡಿ ಮೊಕದ್ದಮೆ ದಾಖಲಿಸಿದ್ದಾರೆ.

(ಇನ್ಫೋ ವಾರ್ತೆ)