ರೈಲ್ವೆ ಇಲಾಖೆಗೆ ಸಂಪನ್ಮೂಲ ಕೊರತೆ, ಪ್ರಯಾಣ ದರ ಹೆಚ್ಚಳ ?

ರಾಜ್‌ ನಂದಗಾಂನ್‌(ಚತ್ತೀಸ್‌ಗಢ) : ಸಂಪನ್ಮೂಲಗಳ ಕೊರತೆಯನ್ನು ನಿಭಾಯಿಸುವುದು ರೈಲ್ವೇ ಇಲಾಖೆಗೆ ದೊಡ್ಡ ಹೊರೆಯಾಗಿದೆ ಎಂದು ಹೇಳಿರುವ ಕೇಂದ್ರ ರೈಲ್ವೇ ಖಾತೆ ರಾಜ್ಯ ಸಚಿವ ದಿಗ್ವಿಜಯ್‌ ಸಿಂಗ್‌, ಸದ್ಯದಲ್ಲೇ ರೈಲ್ವೇ ಪ್ರಯಾಣ ದರ ಹೆಚ್ಚಿಸುವ ಇಂಗಿತ ವ್ಯಕ್ತಪಡಿಸಿದ್ದಾರೆ.

ರೈಲ್ವೆ ಸಂಪರ್ಕ ಜಾಲ ಅಭಿವೃದ್ಧಿ ಯೋಜನೆಗಳಲ್ಲಿ ಎಲ್ಲ ರಾಜ್ಯಗಳೂ ಭಾಗಿಯಾಗಬೇಕೆಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡ್ತುತಿದ್ದ ದಿಗ್ವಿಜಯ್‌ ಸಿಂಗ್‌ ಮನವಿ ಮಾಡಿದರು. ಪ್ರಸ್ತುತ ತನ್ನೆಲ್ಲ ಯೋಜನೆಗಳ ಜಾರಿಗಾಗಿ ಇಲಾಖೆಗೆ 50 ಸಾವಿರ ಕೋಟಿ ರುಪಾಯಿ ಬೇಕಾಗಿದೆ. ಹೊಸ ರೈಲ್ವೆ ಮಾರ್ಗಗಳ ನಿರ್ಮಾಣಕ್ಕಾಗಿ 20 ಸಾವಿರ ಕೋಟಿ ರು. ಹಾಗೂ ರೈಲ್ವೆ ಹಳಿಗಳನ್ನು ಅಗಲಗೊಳಿಸುವ ಯೋಜನೆಗಳಿಗಾಗಿ 10 ಸಾವಿರ ಕೋಟಿ ರು. ಅಗತ್ಯವಿದೆ ಎಂದು ಅವರು ಹೇಳಿದರು.

ಇಲಾಖೆಯ ಮುಂದಿನ ಯೋಜನೆಗಳು ಬೆಟ್ಟದಷ್ಟಿದ್ದರೂ, ಬಜೆಟ್‌ನ ಬೆಂಬಲ ಕೇವಲ 1 ಸಾವಿರದ 400 ಕೋಟಿ ರುಪಾಯಿ ಮಾತ್ರ. ಈ ರೀತಿಯ ಬೆಂಬಲದಲ್ಲಿ , ನಮ್ಮ ಯೋಜನೆಗಳನ್ನು 25- 30 ವರ್ಷಗಳಲ್ಲಿ ಪೂರೈಸಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು. ಸಂಪನ್ಮೂಲಗಳ ಕ್ರೋಢೀಕರಣಕ್ಕಾಗಿ ಹೆಣಗುತ್ತಿರುವ ಇಲಾಖೆ, ಅಭಿವೃದ್ಧಿ ಕಾರ್ಯಗಳಲ್ಲಿ ಭಾಗವಹಿಸುವಂತೆ ಎಲ್ಲಾ ರಾಜ್ಯಗಳಿಗೂ ಪತ್ರ ಬರೆದಿದೆ ಎಂದು ಸಚಿವರು ತಿಳಿಸಿದರು.

(ಇನ್ಫೋ ವಾರ್ತೆ)