ಭೂಕಂಪ ಸಂತ್ರಸ್ತ ನಿಧಿ ಸಂಗ್ರಹ : ಹೃತಿಕ್‌, ಐಶ್ವರ್ಯಾ ಜೊತೆ ಕ್ಲಿಂಟನ್‌ !

ನ್ಯೂಯಾರ್ಕ್‌ : ಅಮೇರಿಕಾದ ಮಾಜಿ ಅಧ್ಯಕ್ಷ ಬಿಲ್‌ ಕ್ಲಿಂಟನ್‌ರೊಂದಿಗೆ ಹಾಲಿವುಡ್‌ ಹಾಗೂ ಬಾಲಿವುಡ್‌ ತಾರೆಯರನ್ನು ಒಟ್ಟುಗೂಡಿಸಿ, ಜೂನ್‌ 12 ರಂದು ಕಾರ್ಯಕ್ರಮವೊಂದನ್ನು ನಡೆಸುವ ಮೂಲಕ ಗುಜರಾತ್‌ ಭೂಕಂಪ ಸಂತ್ರಸ್ತರಿಗೆ 2 ಮಿಲಿಯನ್‌ ಡಾಲರ್‌ಗಳ ನಿಧಿಯನ್ನು ಒಟ್ಟುಗೂಡಿಸಿ ಕೊಡಲು ಅಮೇರಿಕನ್‌ ಇಂಡಿಯನ್‌ ಫೌಂಡೇಶನ್‌ ಮುಂದಾಗಿದೆ.

ಬಾಲಿವುಡ್‌ನ ಪ್ರಮುಖ ತಾರೆಗಳಾದ ಹೃತಿಕ್‌ ರೋಷನ್‌, ಐಶ್ವರ್ಯಾ ರೈ, ಸಂಜಯ್‌ ದತ್‌, ಅಮಿಶಾ ಪಟೇಲ್‌, ಊರ್ಮಿಳಾ ಮಾತೋಂಡ್ಕರ್‌ ಹಾಗೂ ಭುವನ ಸುಂದರಿ ಪ್ರಿಯಾಂಕ ಚೋಪ್ರ ನ್ಯೂಯಾರ್ಕ್‌ನಲ್ಲಿ ಕ್ಲಿಂಟನ್‌ ನೇತೃತ್ವದಲ್ಲಿ ನಡೆಯುವ ರಂಗಿನ ಕಾರ್ಯಕ್ರಮದಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ. ಹಾಲಿವುಡ್‌ನ ಚುಂಬಕಗಳಾದ ಸ್ಟೀವನ್‌ ಸೀಗಲ್‌ ಹಾಗೂ ಉಮಾ ಥುರ್‌ಮನ್‌ ಕಾರ್ಯಕ್ರಮದಲ್ಲಿ ಭಾಗವಹಿಸುವುದು ಹೆಚ್ಚೂ ಕಡಿಮೆ ಖಚಿತವಾಗಿದೆ.

50 ಸಾವಿರ ಡಾಲರ್‌ ಅಥವಾ ಇನ್ನೂ ಹೆಚ್ಚು ಹಣವನ್ನು ಕೊಡುಗೆಯಾಗಿ ನೀಡುವ ದಾನಿಗಳಿಗೆ ಕ್ಲಿಂಟನ್‌ ಅವರು ಸ್ಮರಣಿಕೆಯನ್ನು ನೀಡಿ ಗೌರವಿಸುವರು. ಎರಡೂವರೆ ತಾಸುಗಳ ಈ ಅದ್ದೂರಿ ಸಮಾರಂಭ, ಪಾಕಿಸ್ತಾನದ ಪ್ರದರ್ಶಕ ರಹತ್‌ ಫತೇಹ್‌ ಆಲಿಖಾನ್‌ ಹಾಗೂ ರೋಹಿತ್‌ ಬಾಲ್‌ ಅವರನ್ನೂ ಒಳಗೊಂಡಿದೆ. ಕಾರ್ಯಕ್ರಮದ ಇದಿಷ್ಟೂ ವಿಷಯವನ್ನು ಮೇಳದ ಉಪಾಧ್ಯಕ್ಷ ವಿಕ್ರಮ್‌ ಚಟ್ವಾಲ್‌ ಸುದ್ದಿಗಾರರಿಗೆ ತಿಳಿಸಿದರು.

ಅಮೇರಿಕಾದಾದ್ಯಂತ ನೆಲೆಸಿರುವ ಭಾರತೀಯ ಸಮುದಾಯದವರಿಂದ ಭೂಕಂಪ ಸಂತ್ರಸ್ತರಿಗೆ ನಿಧಿ ಸಂಗ್ರಹಿಸುವುದು ಮಾತ್ರವಲ್ಲದೆ- ದೇಶ ಅವರಿಂದ ಏನನ್ನು ನಿರೀಕ್ಷಿಸುತ್ತದೆ ಎನ್ನುವ ಅರಿವನ್ನು ಅವರಲ್ಲಿ ಜಾಗೃತಿಗೊಳಿಸುವ ಅಮೇರಿಕನ್‌ ಇಂಡಿಯನ್‌ ಫೌಂಡೇಶನ್‌ ಗುರಿಯಾಗಿದೆ ಎಂದು ಅದರ ನಿರ್ದೇಶಕ ಪ್ರದೀಪ್‌ ಕಶ್ಯಪ್‌ ತಿಳಿಸಿದರು.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...