ಉಡುಪಿಯಲ್ಲಿ ನರ್ಮದಾ ಬಚಾವೋ ಆಂದೋಲನದ ಮೇಧಾ ಪಾಟ್ಕರ್‌

ಉಡುಪಿ : ದೇಶೀಯರ ಆರ್ಥಿಕ ಸ್ವಾವಲಂಬನೆಯ ಬದುಕನ್ನು ಜಾಗತೀಕರಣ ಕೊಂದು ಹಾಕುತ್ತಿದೆ ಎಂದು ನರ್ಮದಾ ಬಚಾವೋ ಆಂದೋಲನದ ನಾಯಕಿ ಹಾಗೂ ಖ್ಯಾತ ಪರಿಸರವಾದಿ ಮೇಧಾ ಪಾಟ್ಕರ್‌ ಆಪಾದಿಸಿದ್ದಾರೆ.

ಉಡುಪಿಯ ರಥಬೀದಿ ಗೆಳೆಯರು ಸಂಘಟನೆಯ ದ್ವಿಶತಮಾನೋತ್ಸವ ಅಂಗವಾಗಿ ಎಂ.ಜಿ.ಎಂ. ಕಾಲೇಜಿನಲ್ಲಿ ಮಂಗಳವಾರ ಏರ್ಪಡಿಸಿದ್ದ ‘ಜಾಗತೀಕರಣ- ಪರಿಸರ- ನಿರ್ವಸತಿ- ಪ್ರತ್ಯೇಕೀಕರಣ’ ಮುಕ್ತ ಸಂವಾದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡುತ್ತಿದ್ದರು. ಪರಿಸರ, ಸಂಸ್ಕೃತಿ ಹಾಗೂ ಸಮುದಾಯದ ಮೇಲೆ ವಿಶ್ವಬ್ಯಾಂಕ್‌ ಹಾಗೂ ಐಎಂಎಫ್‌ ದಾಳಿ ನಡೆಸುತ್ತಿವೆ ಎಂದು ಅವರು ಟೀಕಿಸಿದರು.

ಭೂಮಿ, ಸಂಪತ್ತು ಹಾಗೂ ನಮ್ಮತನವನ್ನು , ನಮ್ಮದೇ ಆಡಳಿತ ವ್ಯವಸ್ಥೆ ಬಹುರಾಷ್ಟ್ರೀಯರಿಗೆ ಧಾರೆ ಎರೆದಿದೆ. ಜನಪರವಾಗಿರಬೇಕಾದ ಆಡಳಿತ ವ್ಯವಸ್ಥೆ ಬಹುರಾಷ್ಟ್ರೀಯರ ಪರವಾಗಿದೆ ಎಂದು ಮೇಧಾ ಆಕ್ರೋಶ ವ್ಯಕ್ತಪಡಿಸಿದರು. ಒರಿಸ್ಸಾದ ಸಮಾಜವಾದಿ ಜನ ಪರಿಷತ್ತಿನ ಅಧ್ಯಕ್ಷ ಕಿಶನ್‌ ಪಾಟ್ನಾಯಕ್‌, ದೆಹಲಿಯ ಆಶಿಶ್‌ ನಂದಿ, ವೆಲೇರಿಯನ್‌ ರೋಡ್ರಿಗಸ್‌ ಸಂವಾದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

(ಮಂಗಳೂರು ಪ್ರತಿನಿಧಿಯಿಂದ)