ಕೋಲಾರ ಜಿಲ್ಲೆಯಲ್ಲಿ ಮಲೇರಿಯಾ : 90 ಜನರು ಅಸ್ವಸ್ಥ

ಕೋಲಾರ : ಕೋಲಾರ ಜಿಲ್ಲೆಯ ವಾನರಾಶಿ ಗ್ರಾಮದಲ್ಲಿ ಮಲೇರಿಯಾ ಕಾಣಿಸಿಕೊಂಡಿದ್ದು, ಸುಮಾರು 90ಕ್ಕೂ ಹೆಚ್ಚು ಮಂದಿ ಜ್ವರದಿಂದ ನರಳುತ್ತಿದ್ದಾರೆ. 15ಕ್ಕೂ ಹೆಚ್ಚು ಜನರು ಕೋಲಾರದ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಗ್ರಾಮದಲ್ಲಿ ಮೂರು ವಾರಗಳ ಹಿಂದೆ ನಡೆದ ಜಾತ್ರೆಯ ನಂತರ ಜ್ವರ ಕಾಣಿಸಿಕೊಂಡಿದೆ. ಆರಂಭದ ನಿರ್ಲಕ್ಷ್ಯದಿಂದ ರೋಗ ವ್ಯಾಪಕವಾಗಿ ಗ್ರಾಮದಲ್ಲಿ ಹಬ್ಬಿದೆ ಎಂಬುದು ಆರೋಗ್ಯಾಧಿಕಾರಿಗಳ ಹೇಳಿಕೆ.

ಈ ಮಧ್ಯೆ ಜಿಲ್ಲೆಯಲ್ಲಿ ಸೊಳ್ಳೆಗಳಿಂದ ಸಾಂಕ್ರಾಮಿಕ ರೋಗ ಹಬ್ಬದಂತೆ ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳಲಾಗಿದೆ. ಸೊಳ್ಳೆಗಳ ನಿಗ್ರಹಕ್ಕಾಗಿ ಚಿಂತಾಮಣಿಯಲ್ಲಿ ಕಿಂಗ್‌ಫಾಗ್‌ ಹೊಗೆ ಬಿಡಲಾಗುತ್ತಿದೆ. ಭಾನುವಾರ ಈ ಹೊಗೆಯಂತ್ರದ ಬಳಕೆಗೆ ವಿದ್ಯುಕ್ತವಾಗಿ ಚಾಲನೆ ನೀಡಲಾಗಿದೆ.

ಸೊಳ್ಳೆಗಳ ನಾಶಕ್ಕಾಗಿ ಚಿಂತಾಮಣಿ ನಗರಸಭೆ ತಲಾ 25 ಸಾವಿರ ರುಪಾಯಿ ಮೌಲ್ಯದ ನಾಲ್ಕು ಕಿಂಗ್‌ಫಾಗ್‌ ಹೊಗೆ ಉಗುಳುವ ಯಂತ್ರಗಳನ್ನು ಖರೀದಿಸಿದೆ. ಸಾಮಾನ್ಯವಾಗಿ ಚಳಿಗಾಲದಲ್ಲಿ ಎರಗುವ ಈ ಚಳಿ ಜ್ವರದ ರೋಗ ಈಬಾರಿ ಬೇಸಿಗೆಯಲ್ಲಿಯೇ ಕಾಣಿಸಿಕೊಂಡಿರುವುದು ಗ್ರಾಮಸ್ಥರನ್ನು ಕಂಗೆಡಿಸಿದೆ.

(ಕೋಲಾರ ಪ್ರತಿನಿಧಿಯಿಂದ)

ಮುಖಪುಟ / ಇವತ್ತು... ಈ ಹೊತ್ತು...