ಮೂಗರು, ಕಿವುಡರಿಗೆ ಉಚಿತ ಸ್ವಯಂವರ ವೇದಿಕೆಯಾಗಿ ‘ಮ್ಯಾಚುವರ್ಸ್‌’

ಬೆಂಗಳೂರು : ಮೂಗರು ಮತ್ತು ಕಿವುಡರ ಬದುಕು ಎಲ್ಲರಂತೆ ಚೆಂದಾಗಿರಬೇಕು ಎನ್ನುವ ಉದ್ದೇಶದಿಂದ ನಗರದ ಮ್ಯಾಚುವರ್ಸ್‌ ಸಂಸ್ಥೆ ಉಚಿತ ಸ್ವಯಂವರವೊಂದನ್ನು ಏರ್ಪಡಿಸಿದೆ.

ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಮೂಗರ ಮತ್ತು ಕಿವುಡರ ಸ್ವಯಂವರವನ್ನು ಮೇ 27ರ ಭಾನುವಾರದಂದು ಹಮ್ಮಿಕೊಳ್ಳಲಾಗಿದೆ. ಮ್ಯಾಚುವರ್ಸ್‌ ಸಂಸ್ಥೆಯು ಸ್ವಯಂ ಆಸಕ್ತಿಯಿಂದ, ಮಾತಿನ ಮತ್ತು ಕಿವುಡುತನದ ಸಮಸ್ಯೆಯನ್ನು ಎದುರಿಸುತ್ತಿರುವ ವಧೂ ವರರನ್ನು ಒಂದೆಡೆ ಸೇರಿಸುವ ಕೆಲಸವನ್ನು ಕೈಗೆತ್ತಿಕೊಂಡಿದೆ.

ಉಚಿತ ಸ್ವಯಂವರದಲ್ಲಿ ಭಾಗವಹಿಸುವಂತೆ ಮೂಗರ ಮತ್ತು ಕಿವುಡರ ವಿವಿಧ ಸಂಘಟನೆಗಳನ್ನು ಮ್ಯಾಚುವರ್ಸ್‌ ಸಂಸ್ಥೆ ಸಂಪರ್ಕಿಸಿದ್ದು, ಹೆತ್ತವರೊಂದಿಗೆ ಅಥವಾ ಪಾಲಕರೊಂದಿಗೆ ವಿವಾಹಾಕಾಂಕ್ಷಿಗಳು ಸ್ವಯಂವರಕ್ಕೆ ಬರಬೇಕು. ಬಾಳಸಂಗಾತಿಯ ಆಯ್ಕೆಗೆ ಮಾತ್ರ ಸಂಸ್ಥೆ ವೇದಿಕೆಯನ್ನು ಒದಗಿಸುತ್ತದೆ. ನಂತರ ಮದುವೆ ಸಮಾರಂಭವು ಯಾವ ಸಂಪ್ರದಾಯ ಮತ್ತು ರೀತಿಯಲ್ಲಿ ಆಗಬೇಕು ಎಂಬುದನ್ನು ಪಾಲಕರು ನಿರ್ಧರಿಸಬೇಕು ಎಂದು ಸಂಸ್ಥೆಯ ವಿಜಯ್‌ ಹೇಳಿದ್ದಾರೆ.

ಈ ಬಗೆಗಿನ ಹೆಚ್ಚಿನ ವಿವರಗಳಿಗೆ ಆಸಕ್ತರು ಮ್ಯಾಚುವರ್ಸ್‌ ಸಂಸ್ಥೆಯನ್ನು ಸಂಪರ್ಕಿಸಬಹುದು. ವಿಳಾಸ- ನಂ. 29, ಹಳೇ ಮದರಾಸು ರಸ್ತೆ, ಅಲಸೂರು, ಬೆಂಗಳೂರು - 560 008. ದೂರವಾಣಿ- 5364680, 5367339.

(ಇನ್ಫೋ ವಾರ್ತೆ)