‘2025ಕ್ಕೆ ಆರ್ಥಿಕ ಕ್ಷೇತ್ರದಲ್ಲಿ ಭಾರತ ಅಮೆರಿಕಕ್ಕಿಂತ ಮುಂದೆ’

ನ್ಯೂಯಾರ್ಕ್‌ : ಮುಂದಿನ 25 ವರ್ಷಗಳಲ್ಲಿ ಭಾರತ ಮತ್ತು ಚೀನಾ ದೇಶಗಳು ಆರ್ಥಿಕ ಕ್ಷೇತ್ರದಲ್ಲಿ ಅಮೆರಿಕಾ ಮತ್ತು ಯುರೋಪ್‌ಗಳಿಗಿಂತ ಮುಂದೆ ಇರಲಿದೆ ಎಂದು ವಿಶ್ವಬ್ಯಾಂಕ್‌ನ ಮಾಜಿ ಆರ್ಥಿಕ ತಜ್ಞ ಶಾಹಿದ್‌ ಜಾವೆದ್‌ ಬುರ್ಕಿ ಅವರು ಅಭಿಪ್ರಾಯಪಟ್ಟಿದ್ದಾರೆ.

ಜಾಗತಿಕ ಉತ್ಪನ್ನಕ್ಕೆ ಭಾರತ ಹಾಗೂ ಚೀನಾ ದೇಶಗಳ ಪಾಲನ್ನು ಅಮೆರಿಕಾ ಹಾಗೂ ಯುರೋಪ್‌ನೊಂದಿಗೆ ಹೋಲಿಸಿದರೆ, ಅದು 2025ನೇ ಇಸವಿ ಹೊತ್ತಿಗೆ ಸರಿಸಮಾನವಾಗಿರುತ್ತದೆ. ಪ್ರಸಕ್ತ ಆರ್ಥಿಕ ಪರಿಸ್ಥಿತಿಯೇ ಮುಂದುವರಿದಲ್ಲಿ ಭಾರತವು ಜಪಾನ್‌ ಮತ್ತು ಜರ್ಮನಿ ದೇಶಗಳನ್ನು ಹಿಂದೆ ಹಾಕಿ ಮುನ್ನಡೆಯಲಿದೆ.

ಮಿಗಿಲಾಗಿ ವಿಶ್ವದ ಆರ್ಥಿಕ ರಂಗದಲ್ಲಿ ಮೂರನೇ ಸ್ಥಾನವನ್ನು ಪಡೆಯುವ ಸಾಧ್ಯತೆ ಇದೆ. ಚೀನಾ ಕೂಡ ಆ ಹೊತ್ತಿಗೆ ಅಮೆರಿಕೆಗಿಂತ ಮುಂದಾಗಿರುತ್ತದೆ ಎಂದು ಅವರು ಭವಿಷ್ಯ ನುಡಿದಿದ್ದಾರೆ.

ಈಗ ಭಾರತದ ಆರ್ಥಿಕ ಮಟ್ಟ ಅಮೆರಿಕೆಗಿಂತ ಶೇ. 40ರಷ್ಟು ಹೆಚ್ಚಾಗಿದೆ. ವಿಶ್ವ ಆರ್ಥಿಕ ವಲಯದಲ್ಲಿ ಜಪಾನ್‌ ಹಾಗೂ ಜರ್ಮನಿ ನಾಲ್ಕನೇ ಹಾಗೂ 5ನೇ ಸ್ಥಾನದಲ್ಲಿವೆ. ಬ್ರೆಜಿಲ್‌ ಹಾಗೂ ಮೆಕ್ಸಿಕೋಗಳು ಫ್ರಾನ್ಸ್‌ ಹಾಗೂ ಬ್ರಿಟನ್‌ನನ್ನು ಹಿಂದೆ ಹಾಕಿ ಆರು ಮತ್ತು ಏಳನೇ ಸ್ಥಾನವನ್ನು ಆಕ್ರಮಿಸಿವೆ ಎಂದು ಅವರು ಹೇಳಿದ್ದಾರೆ.