ಹಿಂದೂ ಅಲ್ಪಸಂಖ್ಯಾತರಿಗೆ ಚಾದರ ತೊಡಿಸಿದ ತಾಲಿಬಾನ್‌ !

ನವದೆಹಲಿ : ಆಫ್‌ಘಾನಿಸ್ತಾನದಲ್ಲಿನ ಅಲ್ಪಸಂಖ್ಯಾತ ಹಿಂದೂಗಳ ಮೇಲೆ ತಾಲಿಬಾನ್‌ನ ಮೂಲಭೂತವಾದಿ ಆಡಳಿತ ಹಲವಾರು ನಿರ್ಬಂಧಗಳನ್ನು ಹೇರಿದೆ. ಇತ್ತೀಚೆಗಷ್ಟೇ 2 ಸಾವಿರ ವರ್ಷ ಇತಿಹಾಸವುಳ್ಳ ಬುದ್ಧ ಪ್ರತಿಮೆಗಳನ್ನು ನಾಶ ಮಾಡಿದ ತಾಲಿಬಾನ್‌ ಸರ್ಕಾರದ ಹೊಸ ವಿವಾದಾಸ್ಪದ ಕ್ರಮ ಇದಾಗಿದೆ.

ತಾಲಿಬಾನ್‌ ಆಡಳಿತಗಾರರು ಹೊರಡಿಸಿರುವ ಆದೇಶದಲ್ಲಿ ಹಿಂದೂಗಳ ಮೇಲೆ ಹೇರಲಾಗಿರುವ ನಿರ್ಬಂಧಗಳನ್ನು ಪಾಲಿಸದಿದ್ದಲ್ಲಿ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಲಾಗಿದೆ. ನಿರ್ಬಂಧಗಳಲ್ಲಿ ಪ್ರಮುಖವಾದವು-

• ಅಲ್ಪ ಸಂಖ್ಯಾತ ಹಿಂದೂಗಳು ಹಳದಿ ವಸ್ತ್ರ ಧರಿಸಬೇಕು ಹಾಗೂ ಶರಿಯತ್‌ ಅನುಸರಿಸಬೇಕು. ತಾವು ವಾಸಿಸುವ ಮನೆಯ ಮುಂಭಾಗದಲ್ಲಿ ಕನಿಷ್ಠ ಎರಡು ಮೀಟರ್‌ ಉದ್ದದ ಹಳದಿ ಬಟ್ಟೆ ತೂಗುಹಾಕಬೇಕು.
• ಹಿಂದೂ- ಮುಸ್ಲಿಂ ಒಂದೇ ಮನೆಯ ಆವರಣದಲ್ಲಿ ವಾಸಿಸುವಂತಿಲ್ಲ . ಆ ರೀತಿ ವಾಸಿಸುತ್ತಿರುವವರು ಮೂರು ದಿನಗಳಲ್ಲಿ ಮನೆ ಖಾಲಿ ಮಾಡಬೇಕು.
• ಹಿಂದೂ ಪುರುಷರು ಪೇಟ ಧರಿಸುವಂತಿಲ್ಲ . ಮಹಿಳೆಯರು ಕಣ್ಣಿಗೆ ಎರಡು ಕಿಂಡಿಗಳನ್ನು ಹೊರತುಪಡಿಸಿ, ಉಳಿದಂತೆ ದೇಹದ ಸುತ್ತಾ ಹಳದಿ ಚಾದರ ಹೊದ್ದಿರಬೇಕು. ಮಾರುಕಟ್ಟೆಗೆ ಹೋಗಬೇಕಾದರೂ ಮಹಿಳೆಯರಿಗೆ ಕಬ್ಬಿಣದ ನೆಕ್‌ಲೆಸ್‌ ಹಾಗೂ ಚಾದರ ಧಾರಣೆ ಕಡ್ಡಾಯ.
• ಹಿಂದೂಗಳು ಹೊಸ ಪ್ರಾರ್ಥನಾ ಮಂದಿರಗಳನ್ನು ನಿರ್ಮಿಸುವಂತಿಲ್ಲ . ಈಗಿರುವ ಪ್ರಾರ್ಥನಾ ಮಂದಿರಗಳಲ್ಲಿಯೇ ಪ್ರಾರ್ಥನೆ ಸಲ್ಲಿಸಬೇಕು. ಅವು ನಾಶವಾದಲ್ಲಿ ಮಂದಿರಗಳ ಪುನರ್‌ ನಿರ್ಮಾಣಕ್ಕೂ ಅವಕಾಶವಿಲ್ಲ . ಪ್ರಸ್ತುತ ಇರುವ ಮಂದಿರಗಳ ಪಟ್ಟಿ ಕೊಡುವಂತೆ ಹಿಂದೂ ನಾಯಕರಿಗೆ ತಾಲಿಬಾನ್‌ ಆಡಳಿತ ತಿಳಿಸಿದೆ.

(ಇನ್ಫೋ ವಾರ್ತೆ)